UN៖ ក្រោយអាមេរិកបន្ថយជំនួយ មនុស្សជាង ៤ លាននាក់អាចស្លាប់ដោយសារអេដស៍នៅឆ្នាំ ២០២៩

អង្គការសហប្រជាជាតិបានព្រមានថា មនុស្សជាង ៤ លាននាក់អាចស្លាប់ដោយសារជំងឺអេដស៍ និង ៦ លាននាក់ទៀតអាចឆ្លងមេរោគអេដស៍នៅឆ្នាំ ២០២៩ ប្រសិនបើសហរដ្ឋអាមេរិកមិនស្តារមូលនិធិដ៏សំខាន់សម្រាប់កម្មវិធីមេរោគអេដស៍ជាសកលឡើងវិញនោះទេ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី១១ខែកក្កដា។

នៅដើមឆ្នាំនេះសហរដ្ឋអាមេរិកបានផ្អាកភ្លាមៗនូវជំនួយដ៏សំខាន់ចំនួន ៤ ពាន់លានដុល្លារ ក្រោមការបញ្ជារបស់ប្រធានាធិបតីអាមេរិកលោក ដូណាល់ ត្រាំ ដែលបង្កឱ្យមានការរំខានយ៉ាងខ្លាំងទៅលើគ្លីនិកពេទ្យឲ្យបង្ខំបិទទ្វារ កង្វះការផ្គត់ផ្គង់ និងបញ្ឈប់កិច្ចខិតខំប្រឹងប្រែងបង្ការជំងឺអេដស៍។

ផលប៉ះពាល់ជាពិសេសទៅលើកម្មវិធីផែនការគ្រាអាសន្នរបស់ប្រធានាធិបតីសហរដ្ឋអាមេរិកសម្រាប់ការសង្គ្រោះជំងឺអេដស៍ (PEPFAR) ដែលបានចាប់ផ្តើមនៅក្នុងឆ្នាំ ២០០៣មកម្លេះ។ កម្មវិធីនេះ បានដើរតួនាទីយ៉ាងសំខាន់ក្នុងការប្រយុទ្ធប្រឆាំងនឹងមេរោគអេដស៍ ជាពិសេសនៅអាហ្វ្រិក ដោយសារកន្លងមកអាមេរិកបានផ្តល់ប្រាក់ជំនួយសម្រាប់ថ្នាំពេទ្យ ការធ្វើតេស្ត និងតាមដានជំងឺអេដស៍។ យោងតាម​​ទីភ្នាក់ងារ​ជំងឺ​អេដស៍​របស់​អង្គការ​សហប្រជាជាតិ (UNAIDS) កម្មវិធីនេះបានជួយព្យាបាលមនុស្សជាង ២០ លាននាក់ និងធ្វើតេស្តមនុស្ស ៨៤ លាននាក់ផ្សេងទៀត។

អ្នកជំនាញផ្នែកសុខភាពនិយាយថា បើគ្មានជំនួយពីសហរដ្ឋអាមេរិកទេ វានឹងពិបាកណាស់ក្នុងការបន្តការងារនេះ ហើយការរីកចម្រើនដែលធ្វើឡើងក្នុងរយៈពេលជាច្រើនឆ្នាំអាចនឹងត្រូវបាត់បង់។ ទោះបីមាន​សង្ឃឹម​ខ្លះ​ក្នុង​ការ​ចាក់​ថ្នាំ​ថ្មី​ឈ្មោះ Yeztugo ដែល​អាច​ការពារ​មេរោគ​អេដស៍​បាន​ ១០០% ប៉ុន្តែវាមានតម្លៃថ្លៃណាស់ ដែលប្រទេសជាច្រើនមិនអាចទិញវាបាន។

អង្គការសហប្រជាជាតិព្រមានថា ប្រសិនបើពិភពលោកមិនចាត់វិធានការភ្លាមៗទេ មនុស្សរាប់លាននាក់ទៀតអាចឆ្លង ឬស្លាប់ដោយសារជំងឺអេដស៍៕

អត្ថបទ៖ ប៊ុន សុភាព