ព័ត៌មានអន្ដរជាតិ

ភ្នាក់ងារសម្ងាត់ ៦នាក់ ត្រូវផ្អាកការងារព្រោះធ្វេសប្រហែសក្នុងពេលមានការប៉ងធ្វើឃាត ត្រាំ កាលពីឆ្នាំ២០២៤

បានផុស

៧ ថ្ងៃ មុន

នៅ

ថ្ងៃសុក្រ ១១ កក្កដា ២០២៥

ដោយ

ភ្នាក់ងារសម្ងាត់អាមេរិកចំនួនប្រាំមួយនាក់ត្រូវបានផ្អាកការងារដោយគ្មានប្រាក់ឈ្នួលពី ១០ទៅ ៤២ ថ្ងៃបន្ទាប់ពីបរាជ័យក្នុងការទប់ស្កាត់ការប៉ុនប៉ងធ្វើឃាតប្រធានាធិបតីអាមេរិកលោក ដូណាល់ ត្រាំ នៅឯការប្រមូលផ្តុំនៅរដ្ឋ Pennsylvania នៅថ្ងៃទី ១៣ ខែកក្កដាឆ្នាំ ២០២៤។ នេះបើយោងតាមការចេញផ្សាយរបស់សារព័ត៌មានAl Jazeera នៅថ្ងៃទី ១១ ខែ កក្កដា។

ដូណាល់ ត្រាំ ត្រូវបានអ្នកយាមជួយក្នុងអំឡុងពេលមានការធ្វើឃាតក្នុងពេលប្រមូលផ្តុំគ្នាក្នុងយុទ្ធនាការមុនបោះឆ្នោតក្នុង រដ្ឋ Pennsylvania កាលពីថ្ងៃទី ១៣ ខែកក្កដា ឆ្នាំ ២០២៤។ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួររម្លឹកថាបុរសម្នាក់កាន់កាំភ្លើងបានឡើងលើដំបូលផ្ទះក្បែរកន្លែងដែលលោក ត្រាំ ជួបជុំជាមួយអ្នកគាំទ្រមុនការបោះឆ្នោតកាលពីឆ្នាំ ២០២៤ ហើយបានបាញ់មកលើលោក ត្រាំ ប៉ុន្តែជាសំណាងល្អ លោកត្រូវរបួសតែបន្តិចប៉ុណ្ណោះចំត្រច្រៀក។ យ៉ាងណាក្នុងហេតុការណ៍នេះមានមនុស្សម្នាក់នៅក្នុងហ្វូងមនុស្សជាច្រើនបានស្លាប់។ ទោះបីភ្នាក់ងារសម្ងាត់បានបាញ់សម្លាប់ខ្មាន់កាំភ្លើងក៏ដោយ ប៉ុន្តែក្រោយមកទីភ្នាក់ងារបានសារភាពថាវាជា «កំហុសរបស់ខ្លួនក្នុងប្រតិបត្តិការការពារលោកត្រាំ»។

លោក ត្រាំ ធ្លាប់បានប្រាប់ Fox News ថាការវាយប្រហារអាចត្រូវបានបញ្ឈប់ប្រសិនបើមានភ្នាក់ងារសង្គេតមើលលើដំបូល ខណៈភ្នាក់ងារសម្ងាត់បាននិយាយថា បញ្ហាទំនាក់ទំនង បញ្ហាបច្ចេកវិទ្យា និងកំហុសរបស់ភ្នាក់ងារនាំឱ្យមានការធ្វេសប្រហែស។ ឥឡូវនេះភ្នាក់ងារទាំងប្រាំមួយមិនមានកាតព្វសកម្មដូចពីមុនទៀតទេ។

ចាប់តាំងពីពេលនោះមក ភ្នាក់ងារសម្ងាត់បានធ្វើការផ្លាស់ប្តូរ និងអនុវត្តតាមអនុសាសន៍សុវត្ថិភាពចំនួន ២១ ក្នុងចំណោម ៤៦ ដើម្បីការពារឧប្បត្តិហេតុស្រដៀងគ្នានេះនាពេលអនាគត។ ទីភ្នាក់ងារនេះក៏បានចែករំលែកព័ត៌មានលម្អិតអំពីការប៉ុនប៉ងធ្វើឃាតមួយផ្សេងទៀតនៅរដ្ឋ Florida ផងដែរ ដែលបុរសម្នាក់ឈ្មោះ Ryan Routh បានលាក់ខ្លួននៅជិតទីលានវាយកូនហ្គោលរបស់លោក ត្រាំ ជាមួយនឹងកាំភ្លើងកាលពីខែកញ្ញា ឆ្នាំ២០២៤ តែត្រូវបានបញ្ឈប់ទាន់មុនពេលគាត់អាចធ្វើសកម្មភាព។

ភ្នាក់ងារសម្ងាត់បានគូសបញ្ជាក់ថា ព្រឹត្តិការណ៍ទាំងនេះគឺជាការរំលឹកដ៏រឹងមាំថា ការងាររបស់ភ្នាក់ងារសម្ងាត់ទាំងអស់ត្រូវធ្វើយ៉ាងល្អឥតខ្ចោះ ដោយគ្មានកន្លែងណាមានកំហុស៕