សម្ដេចតេជោស្នើតែងតាំងមន្ត្រីជាន់ខ្ពស់ឥណ្ឌូណេស៊ី ជាទីប្រឹក្សា ដើម្បីជួយគាំទ្រកិច្ចការអតីតយុទ្ធជនកម្ពុជា

លោក Dato Sri Prof. Dr. Tahir សមាជិកក្រុមប្រឹក្សាពិគ្រោះយោបល់របស់ប្រធានាធិបតីឥណ្ឌូណេស៊ី ត្រូវបានស្នើតែងតាំងជាទីប្រឹក្សារបស់សម្តេចតេជោ ហ៊ុន សែន ប្រធានព្រឹទ្ធសភា។ សំណើតែងតាំងនេះ ត្រូវបានទម្លាយឱ្យដឹងដោយសម្ដេចតេជោ ក្នុងជំនួបជាមួយលោក Dato Sri Prof. Dr. Tahir នាព្រឹកថ្ងៃទី១៦ ខែកក្កដានេះ នៅវិមានព្រឹទ្ធសភា រាជធានីភ្នំពេញ។

សម្ដេចតេជោ ហ៊ុន សែន ចាត់ទុកតួនាទីលោក Dato Sri Prof. Dr. Tahir ជាទីប្រឹក្សាពេលនេះ នឹងរួមចំណែកជាផ្នែកក្នុងការចូលរួមអភិវឌ្ឍន៍កម្ពុជា ជាពិសេសទៅលើវិស័យសង្គមកិច្ច ក៏ដូចជាការជួយជំរុញនូវការពង្រឹងបន្ថែមទៀតទំនាក់ទំនងរវាងកម្ពុជានិងឥណ្ឌូណេស៊ី។ នេះបើតាមការថ្លែងឱ្យដឹងក្រោយជំនួបដោយអ្នកនាំពាក្យព្រឹទ្ធសភា លោក ជា ធីរិទ្ធ។

បើតាមអ្នកនាំពាក្យរូបនេះ ក្នុងជំនួប លោក Dato Sri Prof. Dr. Tahir សមាជិកក្រុមប្រឹក្សាពិគ្រោះយោបល់របស់ប្រធានាធិបតីឥណ្ឌូណេស៊ី និងជាស្ថាបនិកក្រុមហ៊ុន Mayapada Group បានសម្ដែងក្ដីរីករាយដែលលោកត្រូវបានសម្ដេចស្នើតែងតាំងជាប្រឹក្សា។ លោក ក៏បានជម្រាបសម្តេចអំពីគោលបំណង និងសកម្មភាពការងារនានារបស់លោក ដោយផ្ដោតលើកិច្ចការមនុស្សធម៌ ហើយលោក គូសបញ្ជាក់ថា កិច្ចការមនុស្សធម៌ គឺជាកិច្ចការគ្មានព្រំដែនកំណត់។

សម្តេចតេជោ ប្រធានព្រឹទ្ធសភា បានចង្អុលបង្ហាញអំពីវិស័យដែលអាចពិចារណារួមចំណែកនៅកម្ពុជា ដូចជាការអភិវឌ្ឍជនបទ ជាពិសេសការគាំទ្រទៅលើកិច្ចការអតីតយុទ្ធជនកម្ពុជា រួមមានការសាងសង់ផ្ទះ និងអណ្តូងទឹក ជាដើម។ ដែលកិច្ចការទាំងនេះ សម្ដេច ថា គឺមានលក្ខណៈ និងសកម្មភាពស្របទៅនឹងទិសដៅដែលលោក Dato Sri Prof. Dr. Tahir។

សម្តេចតេជោ បានគូសបញ្ជាក់ពីការផ្តោតការយកចិត្តទុកដាក់ខ្ពស់ទៅលើកិច្ចការអតីតយុទ្ធជននេះ ដោយសម្តេច បានសង្កត់ធ្ងន់ថា ជាគុណធម៌ មិនមែនប្រើយុទ្ធជនពេលត្រូវការ ហើយបោះបង់ចោលនោះទេ។ ក្នុងន័យនេះ សម្តេចបានស្នើលោក Dato Sri Prof. Dr. Tahir ពិនិត្យលទ្ធភាពរៀបចំអភិវឌ្ឍភូមិអតីតយុទ្ធជនមួយ ដើម្បីរួមចំណែកនៅក្នុងបុព្វហេតុនេះផងដែរ៕