អាជ្ញាធរខណ្ឌដូនពេញផ្លាស់ប្តូរប្រព័ន្ធលូថ្មី ប្រវែងជាង ២០០ម៉ែត្រ ក្នុងមូលដ្ឋានសង្កាត់ផ្សារកណ្តាលទី២

បន្ទាប់ពីមើលឃើញពីការលំបាករបស់ប្រជាពលរដ្ឋនៅពេលមានភ្លៀងធ្លាក់ដោយសារទឹកហូរមិនទាន់ធ្វើឲ្យផ្លូវមួយចំនួនត្រូវជន់លិចដោយទឹកភ្លៀងនៅកំណាត់ផ្លូវលេខ ១៩ កែងផ្លូវ ១៣០ ប្រវែងជាង ២០០ម៉ែត្រ ក្នុងសង្កាត់ផ្សារកណ្តាលទី០២ អាជ្ញាធរខណ្ឌដូនពេញបានសម្រេចផ្លាស់ប្ដូរប្រព័ន្ធលូចាស់ ជំនួសដោយលូថ្មី ដើម្បីសម្រួលចរន្ដទឹកហូរឲ្យបានលឿនជាងមុន។

លោក នី សាមិត្ត ប្រធានការិយាល័យសាធារណការខណ្ឌដូនពេញ បានអោយដឹងថា ការផ្លាស់ប្តូរប្រព័ន្ធលូនេះ ជាគម្រោងថវិកាមូលនិធិរបស់សង្កាត់ផ្សារកណ្តាលទី០២ សម្រាប់អភិវឌ្ឍន៍ភូមិឃុំសង្កាត់ ៣ឆ្នាំរំកិល ឆ្នាំ២០២៥។ លោកបានបន្តថា កន្លងមកនៅតំបន់ក្បែរនោះ អាជ្ញាធរធ្លាប់បានដាក់ប្រព័ន្ធលូថ្មីរួចរាល់ហើយ សម្រាប់រំដោះទឹកកុំអោយមានការជនលិច ប៉ុន្តែដោយសារចំណុចនេះអាជ្ញាធរមិនទាន់ផ្លាស់ប្តូរ ទើបកម្លាំងជំនាញបានដាក់គ្រឿងចក្រចុះកាយសម្រួលប្រព័ន្ធលំហូរទឹក ដោយផ្លាស់ប្ដូរប្រព័ន្ធលូចាស់ ដាក់ជំនួសលូថ្មី មានទំហំមុខកាត់ ៦តឹក ប្រវែងជាង ២០០ម៉ែត្រ ដើម្បីធានាបានថា គ្មានការជនលិចបន្តទៀតក្នុងមូលដ្ឋាន។

អ្នកស្រី លីន ចិត្រា ពលរដ្ឋរស់នៅអមសងខាងផ្លូវនេះប្រាប់អោយដឹងថា ចំណុចផ្លូវលេខ ១៩នេះ តែងមានការជនលិច ពិបាកខ្លាំងក្នុងការរស់នៅ រហូតធ្វើអោយស្ទះលូក្នុងផ្ទះជានិច្ចកាល ដោយសារតែប្រព័ន្ធលូចាស់ ហូរយឺត ទើបបង្កការលំបាកដល់ពួកគាត់ជាប្រជាពលរដ្ឋ។ ពលរដ្ឋបន្តថា នៅពេលដល់រដូវវស្សា មេឃចាប់ផ្តើមភ្លៀង តំបន់នេះលិចដក់ទឹកលើផ្លូវ ទាល់តែម្ចាស់ផ្ទះនីមួយៗចេញមកកាយកាកសំណល់នៅមាត់លូទើបហូរលឿន។ ប៉ុន្តែមួយរយៈក្រោយនេះ មិនមានទឹកលិច និងដក់បន្តទៀតទេ ព្រោះអាជ្ញាធរតែងមានវត្តមានចុះមកដោះស្រាយបញ្ហាទាំងនេះ ទាន់ពេលមិនថាយប់ឬថ្ងៃ។ ជាមួយគ្នានោះ ពលរដ្ឋក្នុងមូលដ្ឋាន បានកោតសរសើរចំពោះអាជ្ញាធរ និងអរគុណបន្ទាប់ពីបានដាក់គ្រឿងចក្រកាយលូចាស់ ដាក់លូថ្មីជូនពួកគាត់ ដើម្បីកុំអោយមានការលិចលង់ពិបាករស់នៅបន្តទៀត។

អាជ្ញាធរខណ្ឌដូនពេញ ក៏បានសំណូមពរពលរដ្ឋដែលប្រកបអាជីវកម្ម និងរស់នៅជាលក្ខណៈគ្រួសារក្នុងមូលដ្ឋាន មេត្តាទុកដាក់សម្រាមអោយត្រឹមត្រូវតាមម៉ោងកំណត់ និងជួយថែរក្សាអនាម័យទាំងអស់គ្នា ជៀសវាងមានកាកសំណល់ ឬ ថង់ប្លាស្ទិចហូរចូលលូ ដែលងាយរាំងស្ទះប្រ័ពន្ធលំហូរទឹកធ្វើអោយទៅជាជនលិច៕

អត្ថបទ៖ រដ្ឋា