រដ្ឋមន្ត្រីមហាផ្ទៃ ថា កម្ពុជាកំពុងមានប្រៀបលើសមរភូមិក្នុងការវាយទប់ទល់នឹងទ័ពថៃឈ្លានពាន

រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស សុខា អះអាងថា ក្រោយការវាយប្រហារគ្នាដោយអាវុធនៅតំបន់ព្រំដែន ដែលកងទ័ពថៃជាអ្នកផ្ដើមមុននោះ កងទ័ពកម្ពុជាកំពុងមានប្រៀបលើសមរភូមិនេះក្នុងកិច្ចការពារដែនដីពីការឈ្លានពានដោយសត្រូវ។

លោក ស សុខា លើកឡើងថា៖ «ក្រោមបទបញ្ជាដឹកនាំដ៏ម៉ឺងម៉ាត់របស់សម្ដេចធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កម្លាំងកងយោធពលខេមរភូមិន្ទ និងនគរបាលការពារព្រំដែនដ៏អង់អាចក្លាហានរបស់យើង បាននិងកំពុងម្ចាស់ការលើសមរភូមិវាយខ្មាំងថៃដ៏សាមាន្យ ដែលបើកការវាយប្រហារលើទីតាំងឈរជើងរបស់ខ្មែរ នៅប្រាសាទតាមាន់ធំ ប្រាសាទតាក្របី ក្នុងខេត្តឧត្តរមានជ័យ និងពង្រីកភូមិសាស្ត្រវាយប្រហារដល់តំបន់មុំបី ខេត្តព្រះវិហារ»។

លោករដ្ឋមន្ត្រីមហាផ្ទៃ ក៏បានបញ្ជាក់ពីទំនុកចិត្ត និងជឿជាក់ខ្ពស់លើការដឹកនាំរបស់សម្ដេចធិបតី និងភាពមោះមុតនៃកងកម្លាំងប្រដាប់អាវុធ ដែលបាននិងកំពុងឈរជើងការពារបូរណភាពទឹកដី។ ទន្ទឹមនឹងការជឿជាក់លើរដ្ឋាភិបាល និងកងកម្លាំង លោក ស សុខា ក៏អំពាវនាវដល់ប្រជាពលរដ្ឋ ដែលជាសមរភូមិក្រោយ រក្សាភាពស្ងាត់ស្ងៀម មានលំនឹងក្នុងចិត្ត និងបន្តការងារក្នុងជីវភាពប្រចាំថ្ងៃជាប្រក្រតីផងដែរ។

លោក បានលើកទឹកចិត្តដល់ពលរដ្ឋខ្មែរបន្តរួបរួមគ្នាជ្រោងឱ្យខ្ពស់ត្រដែតនូវស្មារតីជាតិ បេះដូងដើរក្នុងចង្វាក់ខ្មែរតែមួយ គាំទ្រ និងលើកទឹកចិត្តឱ្យបានសកម្មខ្លាំងក្លា តាមគ្រប់រូបភាពដល់កងកម្លាំងជាតិ ដែលឈរជើងនៅសមរភូមិជួរមុខ៕

ដោយ៖ ធឿន វ៉ាន់សុង