កីឡា

គ្រូ Shan United យកបទពិសោធឆ្នាំមុន មករៀបចំ ដើម្បីឈ្នះ ព្រះខ័នរាជស្វាយរៀង យប់នេះ

បានផុស

១០ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

គ្រូបង្វឹក Shan United លោក Hiroki Ono បានមើលឃើញក្រុម ព្រះខ័នរាជស្វាយរៀង ក្នុងរដូវកាលនេះ ហាក់មានភាពខ្លាំងក្លាជារដូវកាលមុនទៅទៀត ហើយលោកនឹងប្រើប្រាស់បទពិសោធជួបគ្នាឆ្នាំមុន ដើម្បីយកមកកែលម្អក្រុម សម្រាប់ការជួបគ្នាក្នុងពានក្លិប អាស៊ាន ASEAN Club Championship វេលាម៉ោង៦:៣០នាទី យប់ថ្ងៃទី ២១ ខែ សីហា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និសីទសារព័ត៌មាននៅថ្ងៃទី ២០ ខែ សីហា នេះ លោក Hiroki Ono បានមានប្រសាសន៍ថា៖ «ការប្រកួតនេះ នឹងមិនងាយស្រួលនោះទេ។ ពួកយើងនឹងលេងដោយប្រុងប្រយ័ត្ន ហើយព្យាយាមលេងដោយយុទ្ធសាស្ត្រ។ ពួកយើងបានរៀនសូត្រអំពីបទពិសោធកាលពីឆ្នាំមុន ហើយពួកយើងបានយកវា មករៀបចំសមត្ថភាពរបស់ពួកយើងឱ្យល្អបំផុតនៅរដូវកាលនេះ។ គូប្រជែងរបស់យើង នឹងកាន់តែតឹងតែងជាងកាលពីឆ្នាំមុន»។

តាមរយៈការលើកឡើងខាងលើ លោក Hiroki Ono បានទទួលស្គាល់ច្បាស់ពី ព្រះខ័នរាជស្វាយរៀង ជាក្រុមខ្លាំងមួយក្នុងពូល ដោយបទពិសោធនៃការជួបគ្នាកាលពីរដូវកាលមុន ៣ លើក ក្រុម Shan United បានចាញ់ ២ លើក និងឈ្នះ ១ លើក។ បុរសសញ្ជាតិ ជប៉ុន វ័យ ៣៩ ឆ្នាំរូបនេះ ប្រាប់ថា ការប្រកួតលើកទី៤នេះ ក្រុមរបស់លោកនឹងលេងដោយប្រុងប្រយ័ត្នបំផុត ហើយលោកនឹងយកបទពិសោធនៃការជួបគ្នាកាលពីឆ្នាំមុន មករៀបចំក្រុមឱ្យល្អសម្រាប់ការស្វែងរកជ័យជម្នះក្នុងដីដូចឆ្នាំមុនទៀត។

ជួបគ្នា ៣ លើកកាលពីរដូវកាលមុន ព្រះខ័នរាជស្វាយរៀង ឈ្នះ ៤-២ នៅពហុកីឡដ្ឋានជាតិអូឡាំពិក ក្នុងពានរង្វាន់ ASEAN Club Championship និងឈ្នះ ៦-២ នៅពហុកីឡដ្ឋានជាតិមរតកតេជោ សម្រាប់ជើងទី១ និងជើងទី២ Shan United ឈ្នះ ២-១ នៅប្រទេសមីយ៉ាន់ម៉ា ក្នុងពានរង្វាន់ AFC Challenge League៕