អស់ពី​ជម្លៀសមនុស្ស ឥលូវ វៀតណាម បង្ខំចិត្តបិទអាកាសយានដ្ឋាន២កន្លែង មុនព្យុះសង្ឃរា Kajiki កៀកមកដល់

អាជ្ញាធរអាកាសចរណ៍ស៊ីវិលវៀតណាម (CAAV) បានប្រកាសផ្អាកជើងហោះហើរនៅអាកាសយានដ្ឋានចំនួនពីរ ស្ថិតនៅភាគកណ្តាលប្រទេសវៀតណាម នៅថ្ងៃចន្ទទៅ២៥ សីហានេះ ខណៈដែលព្យុះ Kajiki បានវិវដ្ដទៅជាព្យុះសង្ឃរា កៀកនឹងមកដល់ឆាប់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម vnexpress បានចុះផ្សាយថា អាកាសយានដ្ឋាន Dong Hoi ខេត្ត Quang Binh នឹងបិទពីម៉ោង ៤ ព្រឹក ដល់ម៉ោង ៤ រសៀល នៅថ្ងៃច័ន្ទ ខណៈពេលដែលអាកាសយានដ្ឋាន Tho Xuan នៅ Thanh Hoa នឹងផ្អាកប្រតិបត្តិការពីម៉ោង ១០ព្រឹកដល់ម៉ោង ៩ យប់ នៅថ្ងៃដដែល ដើម្បីធានាសុវត្ថិភាពអ្នកដំណើរ និងឧបករណ៍ផ្សេងៗទៀត។

CAAV បានណែនាំភ្នាក់ងារពាក់ព័ន្ធឲ្យរក្សាការផ្លាស់ប្តូរកាតព្វកិច្ចពេញ២៤ម៉ោង ដើម្បីពិនិត្យហេដ្ឋារចនាសម្ព័ន្ធព្រលានយន្តហោះ និងប្រព័ន្ធទំនាក់ទំនង និងដោះស្រាយការខូចខាតណាមួយភ្លាមៗ។

យោងតាមមជ្ឈមណ្ឌលជាតិសម្រាប់ការព្យាករណ៍ជលសាស្ត្រឧតុនិយមព្យុះ Kajiki ដែលជាព្យុះទី ៥ វាយប្រហារប្រទេសវៀតណាមក្នុងឆ្នាំនេះ ត្រូវបានគេរំពឹងថានឹងបោកបក់នៅក្នុងខេត្ត Thanh Hoa និង Nghe An នៅរសៀលថ្ងៃច័ន្ទ ជាមួយនឹងខ្យល់បក់រហូតដល់ ១៦៦គីឡូម៉ែត្រក្នុងមួយម៉ោង។

ជាងនេះទៀត ភាគខាងជើងវៀតណាមត្រូវបានគេព្យាករណ៍ថានឹងមានភ្លៀងធ្លាក់ និងផ្គររន្ទះពេញមួយសប្តាហ៍ ដោយតំបន់មួយចំនួនប្រឈមនឹងភ្លៀងធ្លាក់ខ្លាំង។ តំបន់កណ្តាល និងទំនាបទំនងជាមានភ្លៀងធ្លាក់ពីមធ្យមទៅច្រើន ផ្គរ រន្ទះ និងភ្លៀងធ្លាក់តាមមូលដ្ឋាន។ ចំណែកឯខេត្ត​ភាគ​កណ្តាល​នឹង​មាន​ភ្លៀង​ធ្លាក់​រាយប៉ាយ និង​មាន​ផ្គរ​រន្ទះ ដោយ​រំពឹង​ថា​នឹងមាន​ភ្លៀង​ធ្លាក់​ខ្លាំង​នៅ​ពេល​ល្ងាច និង​ពេល​យប់ច្រើនបំផុត។

យ៉ាងណាមិញ នៅមុនពេលបិទអាកាសយានដ្ឋានចំនួន២នេះដែរ ប្រទេសវៀតណាមក៏បានចាត់វិធានការប្រុងប្រៀបមុនដោយជម្លៀសមនុស្សរហូតដល់ទៅជាងកន្លះលាននាក់ចេញពីខេត្ត-ក្រុង ដូចជា Thanh Hoa, Quang Tri, Hue និង Da Nang ដើម្បីកាត់បន្ថយហានិភ័យរងគ្រោះព្រោះតែឥទ្ធិពលព្យុះដែលកៀកនឹងមកដល់៕

អត្ថបទ៖ សាង ស្រីល័ក្ខ

ចុចអាន៖វៀតណាម ជម្លៀសមនុស្សជាងកន្លះលាននាក់ មុនព្យុះសង្ឃរា Kajiki វាយប្រហារខ្លាំងក្នុងកម្រិតប្រកាសអាសន្ន