ក្រោយហ្វឹកហាត់ថ្ងៃដំបូង ឈឿន ដាវីន បង្ហាញភាពខុសគ្នារវាងនៅ កាណាដា និង កម្ពុជា

យុវជន ឈឿន ដាវីន ជាកីឡាករថ្នាលរបស់ក្រុមបាល់ទាត់ York United FC របស់ប្រទេស កាណាដា បានបង្ហាញពីភាពខុសគ្នារវាងការហ្វឹកហាត់នៅ កម្ពុជា និង កាណាដា បន្ទាប់ពីបានហ្វឹកហាត់ថ្ងៃដំបូងជាមួយក្រុមបាល់ទាត់ជម្រើសជាតិ កម្ពុជា អាយុក្រោម ២៣ ឆ្នាំ។

យុវជនខ្មែរ-កាណាដា វ័យ ១៨ ឆ្នាំរូបនេះបាន​ប្រាប់ «កម្ពុជាថ្មី» ថា៖ «ភាពខុសគ្នា គឺគ្រប់គ្នានៅទីនេះភាគច្រើនលេងលឿនៗ។ ការលេងគឺផ្តោតលើល្បឿន តែ​នៅកាណាដា ផ្តោតខ្លាំង​លើកាយសម្បទា។ នៅមានចំណុចជាច្រើនទៀត។ ប៉ុន្តែនៅទីនេះ ពួកគេអាចលេងបានយ៉ាងល្អ។ ពួកគេអាចលេងបានជាមួយបច្ចេកទេស ហើយពួកគេពិតជាលឿនទាំងជាមួយការគ្រប់គ្រងបាល់ និងបញ្ជូនបាល់។ នោះហើយ ជាអ្វីដែលខ្ញុំចង់និយាយ អំពីភាពខុសគ្នារវាងនៅ កាណាដា និង កម្ពុជា»។

ក្រោយបានហ្វឹកហាត់ថ្ងៃដំបូងជាមួយក្រុម កម្ពុជា អាយុក្រោម ២៣ ឆ្នាំ ដាវីន យល់ឃើញថា នៅ កម្ពុជា កីឡាករលេងលេងលឿនៗ បូកផ្សំជាមួយបច្ចេកទេសទាំងការគ្រប់គ្រងបាល់ និងបញ្ជូនបាល់ គឺសុទ្ធតែលឿនៗ។ ចំណែកកាហ្វឹកហាត់នៅ កាណាដា វិញ ក្រៅតែអំពីបច្ចេកទេសលេងបាល់ ភាគច្រើនគឺផ្តោតលើការហ្វឹកហាត់អំពីកាយសម្បទាជាង។

គួរឱ្យដឹងថា គ្រូបង្គោលលោក Koji Gyotoku បានសម្រេចចិត្តកោះហៅ ឈឿន ដាវីន មកចូលរួមជាមួយក្រុម កម្ពុជា អាយុក្រោម ២៣ ឆ្នាំជាមួយកីឡាករ ២៥ នាក់ផ្សេងទៀត ដើម្បីត្រៀមចូលរួមការប្រកួតវគ្គជម្រុះពាន AFC U23 Asian Cup ២០២៦។ កម្ពុជា ស្ថិតនៅពូល G ជាមួយក្រុម អ៉ីរ៉ាក់ អូម៉ង់ និង ប៉ាគីស្ថាន។ ការប្រកួតនឹងធ្វើឡើងនៅប្រទេស កម្ពុជា ចាប់ពីថ្ងៃទី ៣ ដល់ថ្ងៃទី ៩ ខែ កញ្ញា ឆ្នាំ ២០២៥៕

អត្ថបទ៖ សេម កុសល