ក្រោយស្មើ កម្ពុជា គ្រូអូម៉ង់ ខឹងសម្បា​យ៉ាង​ខ្លាំង​ចំពោះ​ស្នងការ​ប្រកួត

គ្រូបង្គោលរបស់ក្រុមជម្រើសជាតិ អូម៉ង់ អាយុក្រោម ២៣ ឆ្នាំ លោក Badar Al-Maimani បានបង្ហាញការខឹងសម្បា​​យ៉ាង​ខ្លាំង​ចំពោះស្នងការប្រកួត ដែលអនុញ្ញាតឱ្យការប្រកួតវគ្គជម្រុះពូល G ពាន AFC U23 Asian Cup ទល់នឹងក្រុមជម្រើសជាតិ កម្ពុជា នៅពហុកីឡដ្ឋានជាតិ អូឡាំពិក ថ្ងៃទី ០៣ ខែ កញ្ញា ឆ្នាំ ២០២៥ ដំណើរការទាំងមានភ្លៀងខ្លាំង និងទឹកដក់ជោកជាំនៅលើទីលាន។

ថ្លែងនៅក្នុងសន្និសីទសារព័ត៌មាន ក្រោយការប្រកួត លោក Badar Al-Maimani ​និយាយ​ទាំងមិនសប្បាយចិត្ត​ថា៖ «ខ្ញុំអត់សប្បាយចិត្តជាមួយអាកាសធាតុទេ។ ខ្ញុំអត់សប្បាយចិត្តជាមួយស្នងការប្រកួតទេ ដែលគាត់នៅតែឱ្យលេង ទាំងដែលទីលានពោរពេញដោយទឹកដក់ និងភ្លៀងខ្លាំងបែបនេះ។ បើនៅក្រៅវិញ ខ្ញុំគិតថា ប្រហែលជាគេមិនឱ្យលេងនោះទេ ប៉ុន្តែស្នងការនៅតែឱ្យលេង»។

លោក Badar Al-Maimani មិនសប្បាយចិត្តនឹងលទ្ធផលស្មើគ្នាជាមួយនឹងក្រុមជម្រើសជាតិ កម្ពុជា កាល​ពី​យប់​មិញឡើយ។ អ្វីដែលលោកមិនពេញចិត្តថែមទៀតនោះ គឺទៅលើស្នងការរៀបចំការប្រកួត ដែលអនុញ្ញាតឱ្យការប្រកួតនេះ ប្រព្រឹត្តទៅទាំងមានភ្លៀង និងទឹកដក់នៅលើទីលាន។ លោក​ថា បើនៅ​ប្រទេសផ្សេង​វិញ​ ចំពោះស្ថានភាពអាកាសធាតុ និងទីលានដូចយប់មិញនេះ គឺគេនឹងមិនអនុញ្ញាតឱ្យលេងនោះទេ។

គួរបញ្ជាក់ជាថ្មី ថា ការប្រកួតរវាង អូម៉ង់ និង កម្ពុជា បានបញ្ចប់ទៅដោយលទ្ធផលស្មើគ្នា ០-០។ បច្ចុប្បន្នក្រុម អូម៉ង់ កំពុងឈរនៅលេខ ៣ ក្នុងពូល G។ ចំណែក កម្ពុជា​ ឈរលេខ ២, ក្រុមអ៉ីរ៉ាក់ ឈរនៅកំពូលតារាង ខណៈ​ប៉ាគីស្ថាន ស្ថិត​នៅបាតតារាង៕

អត្ថបទ៖ សេម កុសល