បាក់ឌុបឆ្នាំនេះ បេក្ខជនមានបញ្ហាសុខភាពកើនឡើងទ្វេរដង ប៉ុន្តែចំនួនអវត្តមានតិចជាងឆ្នាំមុន

ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ថ្ងៃទី ២៨ ខែ សីហា ឆ្នាំ ២០២៥ ឆ្នាំនេះ ឃើញថា បេក្ខជនមានបញ្ហាសុខភាពកើនឡើងទ្វេដង ប៉ុន្តែចំនួនអវត្តមានតិចជាងឆ្នាំមុន។ យោងតាមរបាយការណ៍របស់ក្រសួងអប់រំ យុវជន និងកីឡា អំឡុងពេលប្រឡងសញ្ញាបត្រមធ្យមសិក្សាទុតិយភូមិ រយៈពេល២ថ្ងៃ បេក្ខជនមានបញ្ហាសុខភាពមានចំនួន ២៦១ករណី ក្នុងនោះ ៨៦នាក់ត្រូវបានដាក់ឱ្យនៅដាច់ដោយឡែក ក្រោមការយកចិត្តទុកដាក់ពីក្រុមគ្រូពេទ្យ។

តាមរបាយការណ៍នេះ បេក្ខជន​មាន​ជំងឺ​គ្រុនឈាម ១៣​ករណី និង​គ្រោះថ្នាក់​ចរាចរណ៍ ៦​ករណី​។ ចំណែកគណៈ​មេប្រយោគមានបញ្ហាសុខភាពចំនួន ៥៩ ករណី ខណៈ បេក្ខជន​ដក​ខ្លួន​ពី​ការ​ប្រឡង​ដោយសារ​បញ្ហា​សុខភាព​ចំនួន​៣​ករណី។ ជារួម បេក្ខជនមានបញ្ហាសុខភាពឆ្នាំនេះមានការកើន ខណៈសម័យប្រឡងឆ្នាំមុនថ្ងៃ​ទី​៨-៩ ខែ​តុលា ឆ្នាំ ២០២៤​ ​បេក្ខជន​មាន​បញ្ហា​សុខភាព​​ចំនួន ១៣៦ ​នាក់។

សូមជម្រាបថា​ ប្រឡងបាក់ឌុបឆ្នាំនេះបេក្ខជនអវត្តមានសរុប ១,៨៧២នាក់ (ស្រី ៧៥១នាក់) ស្មើនឹង១,២៧ ភាគរយនៃបេក្ខជនមកប្រឡងសរុប ក្នុងនោះបេក្ខជនស្វៃរិនអវត្តមាន ១,៥២២នាក់ (ស្រី ៥៨៦នាក់) និង បេក្ខជនចំណេះទូទៅអវត្តមាន ៣៥០នាក់ (ស្រី ១៦៥នាក់)ក្នុងចំណោមបេក្ខជនចុះឈ្មោះប្រឡងសរុប ១៤៦,៧២០នាក់។ ចំនួនអវត្តមាននេះមានការថយចុះ បើប្រៀបឆ្នាំមុនមានរហូតដល់ ២ ៤០៦ នាក់ ។

សម្រាប់ដំណើរការប្រឡងរយៈពេល២ថ្ងៃ បើទោះបីមានភ្លៀងធ្លាក់នៅរាជធានី ខេត្តចំនួន១៧ ប៉ុន្តែដំណើរការសំណេរនៅតែមានដំណើរការដោយរលូន មានសភាពស្ងប់ស្ងាត់ និងរបៀបរៀបរយល្អ ដោយមានការយកចិត្តទុកដាក់បំពេញតួនាទី ភារកិច្ច និងទំនួលខុសត្រូវខ្ពស់ ពីសំណាក់ គណៈមេប្រយោគទូទាំងប្រទេស គណៈកម្មការអប្បមាទទូទាំងប្រទេស ជំនួយការអប្បមាទទូទាំងប្រទេស ប្រធាន អនុប្រធានមណ្ឌល គណៈកម្មការកណ្តាល គណៈកម្មការត្រួតពិនិត្យអគារ គណៈកម្មការអនុរក្ស ព្រមទាំងមានការចូលរួមសង្កេតការណ៍ដោយអង្គភាពប្រឆាំងអំពើពុករលួយ និងកិច្ចសហការជាមួយសហភាព សហព័ន្ធយុវជនកម្ពុជា មន្ត្រីសុខាភិបាល និងកងកម្លាំងពាក់ព័ន្ធគ្រប់លំដាប់ថ្នាក់។

តាមការគ្រោងទុក លទ្ធផលប្រឡងនឹងត្រូវប្រកាសនៅថ្ងៃទី ២០ ខែកញ្ញា ឆ្នាំ២០២៥ និងផ្សព្វផ្សាយតាមបណ្តាញទំនាក់​ទំនងសង្គមផ្លូវការរបស់ក្រសួងអប់រំ យុវជន និងកីឡា៕

អត្ថបទ៖ សំអឿន