វៀតណាមរំពឹង​កើបចំណូលជាង ៦ ប៊ីលា​នដុល្លារ ពីការនាំចេញបន្លែផ្លែឈើ ត្រឹម ៩ ខែដើមឆ្នាំ

​ក្រសួងកសិកម្ម និងបរិស្ថានវៀតណាម បាន​ប៉ាន់ស្មានថា ​ការនាំចេញផ្លែឈើ និងបន្លែរបស់វៀតណាមអាច​នឹង​កើនលើស ៦,១១ ប៊ីលាន​ដុល្លារ ក្នុងរយៈពេល ៩ ខែដើមឆ្នាំ ដោយ​កើនឡើង ៨,៣ ភាគរយ ធៀប​នឹ​ងរយៈពេលដូចគ្នាឆ្នាំមុន។ ​នេះបើតាមការចុះផ្សាយរបស់​ភ្នាក់ងារព័ត៌មាន VNA។

គិតតែក្នុងខែកញ្ញា ការនាំចេញបន្លែផ្លែឈើវៀតណាម បាន​ហក់ដល់ទៅ ១,២៩ ប៊ីលាន​ដុល្លារ ដែល​ជាអត្រាប្រចាំខែខ្ពស់បំផុតមិនធ្លាប់មាន ដោយ​កើនឡើង ៣៦ ភាគរយ ធៀប​នឹង​ខែសីហា និង ៤១ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ​

ជាមួយនឹងសន្ទុះកំណើនដ៏ខ្លាំងនេះ វៀតណាម​នឹង​អាច​កើបចំណូលបាន​ស្មើ ឬលើសពី ៨ ប៊ីលានដុល្លារពីការនាំចេញបន្លែផ្លែឈើ គិតត្រឹមបំណាច់ឆ្នាំ។ ​

ដើម្បីរក្សាកំណើននេះ​ អ្នកជំនាញជំរុញ​ឱ្យ​ឧស្សាហកម្មបន្លែ និងផ្លែឈើ​វៀតណាម ពង្រឹងវត្តមានរបស់ខ្លួននៅក្នុងទីផ្សារសំខាន់ៗ ជាពិសេសបណ្តាប្រទេសដែលបានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយវៀតណាម ដូចជា​ជប៉ុន ​កូរ៉េខាងត្បូង​ សហភាពអឺរ៉ុប និង​ចិន។ ការកំណត់អាទិភាពគោលដៅទាំងនេះ​ រំពឹងថានឹងកាត់បន្ថយហានិភ័យ និងធានាបាននូវតម្លៃនាំចេញរយៈពេលវែង។

បច្ចុប្បន្ន ក្រសួងកសិកម្ម និងបរិស្ថានវៀតណាម​ គ្រោងបង្កើនការផ្សព្វផ្សាយពាណិជ្ជកម្មសម្រាប់ផលិតផលដែល​អាច​នាំចេញជាផ្លូវការ និងគុណសម្បត្តិទីផ្សារ រួមមាន ដូងស្រស់ ស្រកានាគ ខ្នុរ ចេក ឪឡឹក ស្វាយ មាន​ មង្ឃុត គូលេន​ សាវម៉ាវ ​ផាសិន និងទុរេន។ ក្នុងរយៈពេលវែងជាងនេះ ក្រសួងជំរុញ​ឱ្យ​ក្រុមហ៊ុននាំចេញវៀតណាម​ធ្វើពិពិធកម្មផលិតផលផ្លែឈើ និងបន្លែកែច្នៃ ដែលមាន​គុណភាពត្រូវតាមស្ដង់ដារសកល៕