ព័ត៌មានអន្ដរជាតិ

តម្លៃនាំចេញកាហ្វេវៀតណាមកើនខ្លាំង ជិត ៧ ប៊ីលានដុល្លារ ត្រឹម ៩ ខែដើមឆ្នាំ

បានផុស

១០ ខែ មុន

នៅ

ថ្ងៃសុក្រ ៣ តុលា ២០២៥

ដោយ

ការនាំចេញកាហ្វេរបស់វៀតណាម បានកើនឡើងខ្លាំងគិតជាតម្លៃ ដល់ប្រមាណ ៦,៩៨ ប៊ីលានដុល្លារ ក្នុងបរិមាណ ១,២៣ លានតោន ត្រឹមរយៈពេល ៩ ខែដើមឆ្នាំ។ នេះបើតាមការចុះផ្សាយរបស់កាសែត VnExpress កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋាននាំចេញ-នាំចូលវៀតណាម បាននិយាយថា ដោយសារតម្លៃកាហ្វេសកលកើនឡើងខ្លាំង តម្លៃការនាំចេញកាហ្វេវៀតណាមបានកើនឡើង ៦១ ភាគរយ ទៅតាមនោះដែរ ចន្លោះពីខែមករា ដល់ខែកញ្ញា ធៀបនឹងរយៈពេលដូចគ្នាកាលពីឆ្នាំមុន។

ការនាំចេញកាហ្វេគ្រាប់ Robusta រួមចំណែកច្រើនជាងគេក្នុងតម្លៃនាំចេញប្រមាណ ៤,៩ ប៊ីលានដុល្លារ ហើយបន្ទាប់មកគឺកាហ្វេកែច្នៃ និងកាហ្វេគ្រាប់ អារ៉ាប៊ីកា។

តម្លៃកាហ្វេបានកើនដល់កំណត់ត្រាខ្ពស់បំផុតនៅដើមឆ្នាំ មុនធ្លាក់ចុះទៅកម្រិតប្រហាក់ប្រហែលកាលពីឆ្នាំមុននៅខែឧសភា និងកក្កដា។ ប៉ុន្តែក្រោយមក បានហក់ឡើងវិញនៅខែសីហា និងខែកញ្ញា។ អ្នកជំនាញបានលើកឡើងថា កំណើននេះរួមចំណែកដោយការធ្លាក់ចុះនៃប្រាក់ដុល្លារ និងការរំខានផ្នែកផ្គត់ផ្គង់ពីប្រេស៊ីល និងឥណ្ឌូណេស៊ី ដោយសារតែបាតុភូតអាកាសធាតុ អែល នីណូ ក្នុងរយៈពេលប៉ុន្មានឆ្នាំចុងក្រោយ។

សមាគមកាហ្វេ និងកាកាវវៀតណាម បាននិយាយថា សហរដ្ឋអាមេរិកបានដាក់ពន្ធ ៥០ ភាគរយ លើទំនិញប្រេស៊ីល ដែលធ្វើឲ្យកាហ្វេពីប្រទេសនេះមានតម្លៃថ្លៃជាងនៅសហរដ្ឋអាមេរិក។ ប៉ុន្តែនេះជាឱកាសដ៏សំខាន់សម្រាប់កាហ្វេវៀតណាមក្នុងការពង្រីកទីផ្សារនៅអាមេរិក ដែលជាប្រទេសនាំចូលធំជាងគេបំផុតមួយរបស់ពិភពលោក៕