តម្លៃអង្ករនាំចេញវៀតណាមធ្លាក់ចុះយ៉ាងគំហុក ក្នុង​និន្នាការធ្លាក់ចុះសកល

ប្រទេសវៀតណាមបាននាំចេញអង្ករជាង ៧ លានតោន ចាប់ពីដើមឆ្នាំរហូតដល់ថ្ងៃទី ១៥ ខែតុលា ប៉ុន្តែតម្លៃនាំចេញ​បានធ្លាក់ចុះយ៉ាងគំហុក ​ដោយសារតែកម្សោយ​តម្រូវការពីឈ្មួញនាំចេញ ចំពេលដែល​តម្លៃអង្ករអន្តរជាតិធ្លាក់ចុះ។ នេះបើតាមការចុះផ្សាយរបស់កាសែត VnExpress កាលពីថ្ងៃចន្ទ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមស្បៀងអាហារវៀតណាម (VFA) បាន​ឱ្យដឹងថា ការនាំចេញអង្ករសរុបរបស់ប្រទេស​ បានឈានដល់ ៧,០២ លានតោន ​ជាមួយ​នឹង​តម្លៃជិត ៣,៥៩ ប៊ីលានដុល្លារអាមេរិក។ ប៉ុន្តែតួលេខនេះ បង្ហាញពីការធ្លាក់ចុះ ៤,៥ ភាគរយ ​គិតជា​បរិមាណ និងរហូតដល់ទៅ ២១,៩ ភាគរយ បើគិត​ជាតម្លៃ ​ធៀបនឹង​រយៈ​ពេលដូចគ្នាកាលពីឆ្នាំមុន។

កាលពីសប្តាហ៍មុន អង្ករផ្កាម្លិះបាក់ ៥% ត្រូវបានលក់ក្នុងតម្លៃ ៤២០-៤៣៥ ដុល្លារ/តោន ដែលជិតដល់កម្រិតទាបបំផុតក្នុងរយៈពេល ២ ខែ។ ពាណិជ្ជករម្នាក់នៅទីក្រុងហូជីមិញបាននិយាយថា ការជួញដូរក្នុងស្រុកនៅតែស្ងប់ស្ងាត់ ខណៈ​ក្រុមហ៊ុននាំចេញជាច្រើនបានបន្ថយការទិញស្រូវពីកសិករ ដោយសារតែតម្រូវការនៅបរទេសចុះខ្សោយ។

មែនទែនតម្លៃ អង្ករវៀតណាម និងអន្តរជាតិ​បាន​ធ្លាក់ចុះនៅឆ្នាំនេះ រហូតដល់ក្រោម ៤០០ ដុល្លារ/តោន ខណៈកាលពីឆ្នាំមុន តម្លៃអង្ករវៀតណាម​បាន​លក់ជាមធ្យមប្រមាណ ៦០០ ដុល្លារ/តោន។ ​

ការធ្លាក់ចុះនៃតម្លៃអង្ករសកលបែបនេះ បណ្ដាលមកពីកម្សោយតម្រូវការពីប្រទេសនាំចូល ឬបិទការនាំចូលជាពិសេសប្រទេសទិញធំៗ រួមមានឥណ្ឌូណេស៊ី និងហ្វីលីពីនជាដើម ចំពេលដែលផលិតកម្មស្រូវសកល​ហក់​ឡើងដោយសារតែអំណោយផលអាកាសធាតុ។​

កាលពីខែសីហា ហ្វីលីពីន ដែលជាប្រទេសនាំចូលអង្ករកំពូលលើពិភពលោក បាន​ប្រកាសបិទការនាំចូលរយៈពេល ៦០ ថ្ងៃ ចាប់ពីថ្ងៃទី ១ កញ្ញា ហើយក្រោយ​មកប្រកាសបន្តបិទដល់ខែមេសា ឆ្នាំ ២០២៦ ដោយ​អនុញ្ញាតឱ្យនាំចូលតែនៅខែមករា ប៉ុណ្ណោះ។ ការណ៍នេះ កំពុងបង្កក្ដីបារម្ភសម្រាប់ប្រទេសនាំចេញធំៗ រួមទាំងវៀតណាម និងថៃ ពីការធ្លាក់ចុះតម្លៃស្រូវអង្ករ ដែល​អាច​បង្កការខាតបង់ធ្ងន់ធ្ងរ​សម្រាប់កសិករ៕