ណេតាន់យ៉ាហ៊ូ៖ អ៊ីស្រាអែល​ត្រៀម​​អនុវត្តផែនការ​សន្តិភាពភ្លាមៗ ក្រោយ​​ហាម៉ាស​ព្រមលែង​ចំណាប់ខ្មាំង

រដ្ឋាភិបាលអ៊ីស្រាអែល បាន​ប្រកាស​​នៅ​ថ្ងៃ​សៅរ៍​ទី​៤​ខែតុលា​​នេះ​ថា ខ្លួនកំពុងរៀបចំសម្រាប់«ការអនុវត្តភ្លាមៗ» នូវ​ដំណាក់កាលដំបូងនៃផែនការសន្តិភាពតំបន់ហ្គាហ្សារបស់ប្រធានាធិបតី ដូណាល់ ត្រាំ បន្ទាប់ពី​ក្រុម​ហាម៉ាស​យល់ព្រម​លើ​លក្ខខណ្ឌសំខាន់ៗដែលពាក់ព័ន្ធនឹងការដោះលែងចំណាប់ខ្មាំង។

សេចក្តីថ្លែងការណ៍​ពីការិយាល័យរបស់នាយករដ្ឋមន្ត្រី បេនចាមីន ណេតាន់យ៉ាហ៊ូ បាន​លើក​ឡើង​ថា អ៊ីស្រាអែលនឹងសហការយ៉ាងពេញលេញជាមួយលោក ត្រាំ និងក្រុមការងារ​របស់គាត់។ សេចក្តីថ្លែងការណ៍បានសរសេរថា «ដោយផ្អែក​លើ​ការឆ្លើយតបរបស់ពួកហាម៉ាស [ចំពោះផែនការសន្តិភាព] អ៊ីស្រាអែលកំពុងរៀបចំសម្រាប់ការអនុវត្តភ្លាមៗនៃដំណាក់កាលទីមួយនៃផែនការ​របស់​លោក ត្រាំ ដែលជាការដោះលែងចំណាប់ខ្មាំងទាំងអស់ជាបន្ទាន់»។

ទន្ទឹមនោះ វិទ្យុកងទ័ពអ៊ីស្រាអែល បានរាយការណ៍​ថា រដ្ឋាភិបាលបានណែនាំមេយោធា​ឲ្យ​កាត់បន្ថយប្រតិបត្តិការនៅតំបន់ហ្គាហ្សា និងផ្អាកផែនការសម្រាប់ការលុកលុយលើទឹក​ដីនៃ​ទីក្រុងហ្គាហ្សា។

សេចក្ដីថ្លែងការណ៍​របស់​លោក ណេតាន់យ៉ាហ៊ូ​ ធ្វើ​ឡើង​បន្ទាប់​ពី​លោក ត្រាំ ប្រាប់អ៊ីស្រាអែលថា ត្រូវតែឈប់ទម្លាក់គ្រាប់បែកលើតំបន់ហ្គាហ្សាភ្លាម បន្ទាប់ពីក្រុមហាម៉ាស យល់ព្រមដោះលែងចំណាប់ខ្មាំងទាំងអស់និងឯកភាពលើលក្ខខណ្ឌមួយចំនួន ដើម្បីពន្លត់ភ្លើងសង្គ្រាម។ លោក ត្រាំ បាន​លើក​ឡើង​ថា «អ៊ីស្រាអែល ត្រូវបញ្ឈប់ការទម្លាក់គ្រាប់បែកលើហ្គាហ្សាភ្លាម ដូច្នេះយើងអាចទទួលយកចំណាប់ខ្មាំងដោយសុវត្ថិភាពនិងឆាប់រហ័ស។ យើងត្រៀមរួចជាស្រេចក្នុងកិច្ចពិភាក្សាលើព័ត៌មានលម្អិត ហើយវាមិនមែនតែហ្គាហ្សាទេមួយទេ ប៉ុន្តែនេះគឺពាក់ព័ន្ធនឹងការស្វែងរកសន្តិភាពដ៏ស្ថិតស្ថិរយូរអង្វែងនៅតំបន់មជ្ឈិមបូព៌ាតែម្តង»៕

ដោយ៖ ឈាង