ការជួយគាំទ្រកម្លាំងជួរមុខ និងជនភៀសសឹក ជាអាទិភាពចម្បងរបស់សមាជិកព្រឹទ្ធសភា អំឡុងពេលជម្លោះព្រំដែន

អនុប្រធានទី២ព្រឹទ្ធសភា លោកបណ្ឌិត ធន់ វឌ្ឍនា លើកឡើងពីអាទិភាពចម្បងបំផុតរបស់សមាជិកព្រឹទ្ធសភាកម្ពុជា គឺការចុះជួយសម្រាលទុក្ខលំបាករបស់ជនភៀសសឹកនៅតាមបណ្តោយព្រំដែន ហើយជាពិសេសការគាំទ្រឧបត្ថម្ភដល់កងកម្លាំងជួរមុខ ក្នុងអំឡុងពេលជម្លោះព្រំដែន។

បើតាមលោកបណ្ឌិត ធន់ វឌ្ឍនា ក្នុងស្ថានភាពដែលកម្ពុជារងការឈ្លានពានពីយោធាថៃ សមាជិកព្រឹទ្ធសភា បានបង្វែរអាទិភាពឆ្ពោះទៅតំបន់ព្រំដែនដែលមានជម្លោះ ដើម្បីគាំទ្រកម្លាំងជួរមុខ និងជនភៀសសឹក តាមរយៈការផ្គត់ផ្គង់អាហារ សម្លៀកបំពាក់ ថ្នាំពេទ្យ និងសម្ភារៈសម្រាប់ការកសាងជម្រកជាដើម។ ជាមួយគ្នានេះ សមាជិកព្រឹទ្ធសភា ក៏បានខិតខំប្រឹងប្រែងជួយស្វែងរកការងារធ្វើសម្រាប់ពលករទើបត្រឡប់ពីប្រទេសថៃវិញផងដែរ។

បើទោះជាបង្វែរអាទិភាពទៅតំបន់ព្រំដែនក៏ដោយ ក៏សមាជិកព្រឹទ្ធសភាមិនភ្លេចនូវតួនាទីភារកិច្ចស្នូលរបស់ខ្លួមផងដែរ គឺការអនុវត្តផែនការរបស់ភូមិភាគ និងគណៈកម្មការជំនាញ ក៏បានប្រតិបត្តិរហូតចប់តាមការគ្រោងទុក។

លោកបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ថា វត្តមានរបស់សមាជិកព្រឹទ្ធសភា ចុះជួយគាំទ្រដល់កងកម្លាំងជួរមុខ និងជនភៀសសឹកនៅតាមបណ្តោយព្រំដែន គឺមានអត្ថន័យ និងចាំបាច់បំផុត ហើយលោកបានវាយតម្លៃខ្ពស់ចំពោះសមាជិកព្រឹទ្ធសភាទាំងអស់ដែលបានបំពេញមុខងាររបស់ខ្លួនប្រកបដោយប្រសិទ្ធភាព និងមានភាពបត់បែនបានល្អក្នុងបរិបទនៃជម្លោះព្រំដែនខ្មែរ-ថៃ។

ការឈ្លានពានរបស់ថៃមកលើកម្ពុជាពេលនេះ លោកអនុប្រធានទី២ព្រឹទ្ធសភា ក៏បានបង្ហាញនូវការមើលឃើញពីសាមគ្គីភាពផ្ទៃក្នុងកាន់តែរឹងមាំរបស់កម្ពុជា តាមរយៈការរួមគ្នាជាធ្លុងមួយនៃជនជាតិខ្មែរប្រឆាំងនឹងឈ្លានពានពីប្រទេសជិតខាងមួយនេះ និងការគាំទ្រផលិតផលខ្មែរ។

ការលើកឡើងខាងលើរបស់លោកអនុប្រធានទី២ព្រឹទ្ធសភា បានធ្វើឡើងក្នុងកិច្ចប្រជុំប្រចាំខែជាមួយគណៈកម្មការជំនាញទាំង១០ និងភូមិភាគទាំង៨ របស់ព្រឹទ្ធសភា កាលពីរសៀលថ្ងៃទី៦ ខែតុលា ឆ្នាំ២០២៥ ហើយក្នុងកិច្ចប្រជុំនោះ លោកក៏បានភ្ជាប់នឹងការលើកឡើងពីបញ្ហាយោធិនទាំង១៨នាក់ដែលត្រូវ​បាន​យោធា​ថៃចាប់​ខ្លួន​ដោយខុសច្បាប់ពីដែនដីកម្ពុជាផងដែរ។ សម្រាប់ករណីនេះ លោកបានបញ្ជាក់ពីការចាំបាច់នៃការរួមគ្នាជាមួយរាជរដ្ឋាភិបាល និងស្ថាប័នពាក់ព័ន្ធ ដើម្បីជំរុញឱ្យមានការដោះលែងយោធិនខ្មែរឱ្យបានឆាប់ ជាមួយនឹងការធ្វើយ៉ាងណាឱ្យព្រំដែនកម្ពុជា-ថៃ វិលត្រឡប់ទៅរកភាពប្រក្រតី និងការស្តារសេដ្ឋកិច្ចព្រំដែនឡើងវិញ៕