ប្រជាជនខ្មែរភាគច្រើននៅមិនទាន់យល់ច្បាស់ថា តើពាក្យ “និយាយ” ត្រូវប្រើទៅកាន់ព្រះសង្ឃបែបណា? មានពាក្យ៣ នៅក្នុងសង្ឃសព្ទ ដែលប្រជាជនច្រឡំនឹងពាក្យ “និយាយ” ទៅកាន់ព្រះសង្ឃគឺ “ពុទ្ធដីកា” “សង្ឃដីកា” និង “ថេរដីកា”។ តើពាក្យ៣នេះ មួយណាត្រឹមត្រូវ?

ព្រះតេជព្រះគុណ សាន សុជា បានលើកឡើងថា ពាក្យដែលត្រឹមត្រូវរបស់ព្រះសង្ឃ ប្រើចំពោះពាក្យនិយាយគឺ “ថេរដីកា”។ ពាក្យ “ពុទ្ធដីកា” គឺមិនត្រឹមត្រូវសម្រាប់ប្រើសំដៅដល់ថេរដីការបស់ព្រះសង្ឃឡើយ។ “ពុទ្ធដីកា” សំដៅលើ ពុទ្ធដីការបស់ព្រះពុទ្ធ ឬ ពាក្យសម្តីរបស់ព្រះពុទ្ធ។ រីឯ ពាក្យ “សង្ឃដីកា” ក៏មិនត្រឹមត្រូវដែល។ ពាក្យនេះ ប្រើចំពោះតែការសម្រេចបញ្ញត្តិរបស់ព្រះសង្ឃ ឬ ការប្រកាសរបស់ព្រះសង្ឃប៉ុណ្ណោះ។

ដូច្នេះ ប្រជាពលរដ្ឋខ្មែរ ត្រូវយល់ពីអត្ថន័យនេះឱ្យបានច្បាស់លាស់ ចៀសវាងការប្រើប្រាស់ខុសទៅនឹងពាក្យសព្ទរបស់ព្រះសង្ឃតទៅទៀត។ សរុបមក ប្រសិនជាព្រះសង្ឃមានថេរដីកាពីអ្វីមួយ គឺប្រើពាក្យ “ថេរដីកា” នេះ៕

ដោយ៖ អុន ស្រីមាន