នាយកប្រតិបត្តិធំៗនៅអាមេរិក​ ដូចជា អេឡុន ម៉ាសក៍ និង ធីម ឃុក ​គ្រោងទៅចិនជាមួយ ត្រាំ

នាយកប្រតិបត្តិនៃក្រុមហ៊ុនយក្សធំៗនៅអាមេរិក ដូចជាលោក អេឡុន ម៉ាសក៍ (Tesla, SpaceX) លោក ធីម ឃុក (Apple) លោក​ Larry Culp ​(GE Aerospace) និងលោក Kelly Ortberg (Boeing) ជាដើមនោះ នឹង​រួមដំណើរទស្សនកិច្ចជាមួយប្រធានាធិបតីអាមេរិក ដូណាល់ ត្រាំ ទៅប្រទេសចិននៅសប្ដាហ៍នេះ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ ដោយស្រង់សម្ដីរបស់ប្រភពពីសេតវិមាន។ ​

ប្រភពពីសេតវិមាន​បាន​ឱ្យដឹងទៀតថា ​ថ្នាក់ដឹកនាំ​ក្រុមហ៊ុនយក្សផ្សេងៗទៀតដែលទៅចិនជាមួយ ត្រាំ រួមមាន​​លោកស្រី Dina Powell McCormick ​ប្រធាន​ក្រុមហ៊ុន Meta, លោក​ Larry Fink ​នាយកប្រតិបត្តិក្រុមហ៊ុន BlackRock, លោក Stephen Schwarzman ​នាយកប្រតិបត្តិក្រុមហ៊ុន Blackstone, លោក Sanjay Mehrotra នាយកប្រតិបត្តិក្រុមហ៊ុន Micron, លោក Michael Miebach នាយកប្រតិបត្តិក្រុមហ៊ុន Mastercard, លោក Cristiano Amon នាយកប្រតិបត្តិក្រុមហ៊ុន Qualcomm, និងលោក Ryan McInerney នាយកប្រតិបត្តិក្រុមហ៊ុន Visa ជាដើម​។

លោក ត្រាំ គ្រោងនឹង​ធ្វើដំណើរទៅដល់ក្រុងប៉េកាំងនៅថ្ងៃពុធនេះ ដើម្បី​ជួបប្រជុំចរចា​ជាមួយ​លោកប្រធានាធិបតីចិន ស៊ី ជីនពីង ដោយផ្ដោតលើបញ្ហាផ្សេងៗ រាប់តាំងពីបញ្ហាពាណិជ្ជកម្ម រ៉ែកម្រ រហូតដល់ជម្លោះអ៊ីរ៉ង់ រួមជាមួយ​បញ្ហាភូមិសាស្រ្តនយោបាយផ្សេងៗ។

រ៉យទ័របាន​ផ្សាយថា ក្រៅពីបញ្ហាទាំងនោះ ចិនត្រូវបាន​គេរំពឹងថានឹង​ប្រកាសពីការទិញយន្តហោះ Boeing ផលិតកម្មកសិកម្ម និងថាមពលរបស់អាមេរិកជាដើម។ ​​មេដឹកនាំកំពូលទាំង២ ក៏នឹងពិភាក្សាអំពី​ការបន្ថែមពេល «បទឈប់បាញ់នៃ​សង្គ្រាមពាណិជ្ជកម្ម​» ដើម្បីឱ្យចិនដកការរឹតត្បឹតលំហូររ៉ែកម្រទៅអាមេរិក។

យោងតាមប្រភពឧស្សាហកម្ម ចិន និងក្រុមហ៊ុន Boeing បានពិភាក្សាអំពីកិច្ចព្រមព្រៀងទិញយន្តហោះ​ Boeing 737 MAX ប្រហែល ៥០០ គ្រឿង និងយន្តហោះធំៗជាច្រើនគ្រឿងដែលដំណើរការដោយម៉ាស៊ីនរបស់ក្រុមហ៊ុន GE Aerospace។ ប្រសិនបើ​កិច្ចព្រមព្រៀងសម្រេចឡើង នោះវានឹងជាការបញ្ជាទិញយន្តហោះ Boeing ដ៏សំខាន់លើកដំបូងរបស់​ចិនចាប់តាំងពីឆ្នាំ ២០១៧ ហើយអាចក្លាយជាការបញ្ជាទិញយន្តហោះដ៏ធំបំផុតមិនធ្លាប់មាន។

យ៉ាងណាមិញ ប្រភព​ពីសេតវិមាន​បាន​ឱ្យដឹងថា លោក Jensen Huang ដែលជា​នាយកប្រតិបត្តិក្រុមហ៊ុនផលិតបន្ទះឈីបយក្ស Nvidia នឹងមិនចូលរួមជាមួយ​លោក ត្រាំ ក្នុងដំណើរទស្សនកិច្ចទៅកាន់ទីក្រុងប៉េកាំងនោះទេ ដោយ​សេតវិមាន​មិនអញ្ជើញលោក ខណៈរដ្ឋបាល ត្រាំ ចង់ផ្ដោតលើ​លើកិច្ចព្រមព្រៀងកសិកម្ម និងអាកាសចរណ៍ រួមទាំងការបញ្ជាទិញយន្តហោះ Boeing។

កន្លងមក លោក ត្រាំ និងលោក Huang បានបង្កើតទំនាក់ទំនងជិតស្និទ្ធ ហើយលោក ត្រាំ បានអនុម័តការនាំចេញបន្ទះឈីប AI H200 របស់ Nvidia ទៅកាន់​ចិន ទោះបីជាអាមេរិកកន្លងមក បាន​រឹតត្បឹតការនាំចេញបន្ទះឈីបទំណើបៗទៅកាន់គូប្រជែងមួយនេះក្ដី។ ​

គួររំឭកថា លោក ត្រាំ បានជួប​លោក ស៊ី ផ្ទាល់មុខគ្នានៅ​កូរ៉េខាងត្បូង​កាលពីខែតុលា ដែលកាលនោះ ​ភាគីទាំង ២ បានយល់ព្រមផ្អាកសង្គ្រាមពាណិជ្ជកម្ម ដែលផ្ទុះឡើងខ្លាំងដោយសារតែពន្ធគយរបស់ ត្រាំ និងការឆ្លើយតបចិន រួមទាំងពន្ធវាយបក និងការរឹតត្បឹតការនាំចេញរ៉ែកម្រ៕ ​

​