​ប្រេស៊ីល ​សម្រេច​​​ផ្អាក វ៉ាក់សាំងគ្រុនឈាម ចាក់ត្រឹមតែ​១ដូស ក្រោយសង្ស័យធ្វើឲ្យមនុស្សស្លាប់២ករណី​

ប្រេស៊ីល បានប្រកាសកាលពីថ្ងៃទី ៨ ខែមិថុនា ថា ខ្លួនកំពុងឲ្យ​ផ្អាកជាបណ្តោះអាសន្ន នូវ​ការប្រើប្រាស់វ៉ាក់សាំងបង្ការជំងឺគ្រុនឈាមប្រភេទចាក់តែមួយដូស ដំបូងគេបង្អស់នៅលើពិភពលោក បន្ទាប់ពីមាន ការ​ស្លាប់២ករណីដ៏​គួរឲ្យសង្ស័យ​កើតឡើង។ នេះបើយោងតាមទីភ្នាក់ងារសារព័ត៌មាន AFP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្សជាងកន្លះលាននាក់ បានទទួលវ៉ាក់សាំង​បង្ការនេះនៅក្នុងឆ្នាំ ២០២៦ ដែលជាវ៉ាក់សាំងត្រូវបានអភិវឌ្ឍឡើងដោយមូលនិធិសាធារណៈនៅប្រេស៊ីល និងទទួលបានការអនុម័តពីអាជ្ញាធរសុខាភិបាល កាលពីខែវិច្ឆិកាកន្លងទៅ។ នេះគឺជាវ៉ាក់សាំងចាក់តែមួយដូស ដំបូងបង្អស់សម្រាប់ប្រឆាំងនឹងវីរុសគ្រុនឈាមដែលចម្លងដោយមូសខ្លា វាអាចបង្កឲ្យមានអាការគ្រុនក្តៅខ្លាំង ឈឺក្បាល, ឈឺសាច់ដុំ, ចង្អោរ, កន្ទួលក្រហមនៅលើស្បែក ហើយក្នុងករណីកម្រខ្លះអាចបណ្តាលឲ្យស្លាប់បាន។

ក្នុងចំណោមប្រជាពលរដ្ឋ​ជាង​​៥០ម៉ឺនាក់ (៥០១,០៤៤ នាក់) ដែលបានចាក់វ៉ាក់សាំងចន្លោះពីខែមករា ដល់ខែមីនា មានចំនួន ៣,៧០៣ នាក់ (ស្មើនឹង ០,៧ ភាគរយ) បានបង្ហាញរោគសញ្ញាស្រដៀងនឹងជំងឺគ្រុនឈាម។ ទន្ទឹមនឹងនេះ យោងតាមក្រសួងសុខាភិបាល មានមនុស្សចំនួន ៤២ នាក់មាន ប្រតិកម្មធ្ងន់ធ្ងរ។

ជាក់ស្ដែង អាជ្ញាធរបានកត់ត្រាពីករណីធ្ងន់ធ្ងរបំផុតចំនួន ៣ ករណី រួមទាំងករណីចំនួន ២ ដែលបានបណ្តាលឲ្យបាត់បង់ជីវិតបុរសអាយុ ៥៨ ឆ្នាំម្នាក់ និងស្ត្រីអាយុ ៤៨ ឆ្នាំម្នាក់។ ចំណែកឯស្ត្រីអាយុ ៣៨ ឆ្នាំម្នាក់ទៀត ត្រូវបានបញ្ជូនទៅសង្គ្រោះបន្ទាន់នៅក្នុងបន្ទប់ ICU ប៉ុន្តែបច្ចុប្បន្នត្រូវបានអនុញ្ញាតឲ្យចាកចេញពីមន្ទីរពេទ្យហើយ។

រដ្ឋមន្ត្រីក្រសួងសុខាភិបាល លោក Alexandre Padilha បានប្រាប់នៅក្នុងសន្និសីទសារព័ត៌មានមួយថា មិនទាន់មានទិន្នន័យគ្រប់គ្រាន់ ដើម្បីបញ្ជាក់ពីមូលហេតុ និងផលប៉ះពាល់ រវាងវ៉ាក់សាំង និងករណីធ្ងន់ធ្ងរទាំង ៣ នេះនៅឡើយទេ ប៉ុន្តែវាគឺជាសញ្ញាព្រមានមួយ។ លោកបញ្ជាក់បន្ថែមថា ដើម្បីជាការប្រុងប្រយ័ត្ន «យើងបានសម្រេចចិត្តផ្អាកការចាក់វ៉ាក់សាំងនេះជាបណ្តោះអាសន្ន» ដោយមិនបានបញ្ជាក់លម្អិតអំពីលក្ខខណ្ឌតម្រូវសម្រាប់ការដាក់ឲ្យប្រើប្រាស់វ៉ាក់សាំងនេះឡើងវិញនោះទេ។

លោករដ្ឋមន្ត្រីបានបន្តថា ផលប៉ះពាល់ដែល «មិននឹកស្មានដល់ទាល់តែសោះ» ទាំងនេះ មិនត្រូវបានរកឃើញឡើយក្នុងកំឡុងពេលធ្វើតេស្តសាកល្បងលើអ្នកស្ម័គ្រចិត្តជាង ១៦,០០០ នាក់នៅទូទាំងរដ្ឋចំនួន ១៤ របស់ប្រេស៊ីល។ ការសាកល្បងទាំងនោះបានកត់ត្រាពីអត្រាប្រសិទ្ធភាព រហូតដល់ ៩១,៦ ភាគរយ ក្នុងការប្រឆាំងនឹងទម្រង់ធ្ងន់ធ្ងរបំផុតនៃជំងឺនេះ។

ដោយឡែក យោងតាមអង្គការសុខភាពពិភពលោក (WHO) វ៉ាក់សាំងគ្រុនឈាមមួយប្រភេទទៀត ដែលមានឈ្មោះថា TAK-003 តម្រូវឲ្យចាក់ចំនួន ២ ដូស ដោយរក្សាគម្លាតគ្នា ៣ ខែឯណោះ។ ដូច្នេះ វ៉ាក់សាំងមួយដូស អាចជួយពន្លឿន និងសម្រួលដល់យុទ្ធនាការចាក់វ៉ាក់សាំងទ្រង់ទ្រាយធំ ឲ្យកាន់តែងាយស្រួលជាងមុន។

គួររំលឹកផងដែរថា ប្រេស៊ីលបានកត់ត្រាចំនួនអ្នកស្លាប់ដោយសារជំងឺគ្រុនឈាមច្រើនជាង ៦,០០០ នាក់ក្នុងឆ្នាំ ២០២៤ ដែលស្ទើរតែស្មើនឹងពាក់កណ្តាលនៃចំនួនអ្នកស្លាប់ដែលបានកត់ត្រានៅទូទាំងពិភពលោក ប៉ុន្តែស្ថានភាពនេះបានធូរស្រាល និងកែលម្អឡើងវិញយ៉ាងខ្លាំង នៅក្នុងឆ្នាំ ២០២៥ កន្លងទៅ៕

អត្ថបទ ៖ សាង ស្រីល័ក្ខ