ទំនុកចិត្តអ្នកប្រើប្រាស់​ថៃ ធ្លាក់ចុះទាបបំផុតក្នុងរយៈពេល ៨ ខែ ដោយសារសម្ពាធសេដ្ឋកិច្ច

​សន្ទស្សន៍ទំនុកចិត្តអ្នកប្រើប្រាស់របស់ប្រទេសថៃ បានធ្លាក់ចុះមកត្រឹម ៥០,៦ ពិន្ទុ ក្នុងខែមេសា ពី ៥១,៨ ពិន្ទុ នៅខែឧសភា ​ដែល​ជាកម្រិតទាបបំផុតក្នុងរយៈពេល ៨ ខែ ​ចំពេលដែលប្រជាជនថៃប្រឈមមុខនឹង​សម្ពាធសេដ្ឋកិច្ច​ដើរអូសជើង។ ​នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សាកលវិទ្យាល័យសភាពាណិជ្ជកម្មថៃ (UTCC) ដែលចេញរបាយការណ៍ស្ទង់មតិស្ដីពី​សន្ទស្សន៍នេះកាលពីថ្ងៃអង្គារ បាន​ឱ្យដឹងថា ​ទំនុកចិត្តរបស់អ្នកប្រើប្រាស់ថៃ ​រង​ផល​ប៉ះពាល់ដោយតម្លៃថាមពលខ្ពស់​ ដែលបង្កឡើងពីជម្លោះនៅមជ្ឈិមបូព៌ា។

​សាលកវិទ្យាល័យបានបន្ថែមថា តម្លៃជី​ហក់ឡើងខ្ពស់ ខណៈ​តម្លៃផលិតផលកសិកម្មនៅតែបន្ត​ថោក។

​ក្នុងចំណោមនោះ ​មាន​អារម្មណ៍វិជ្ជមានមួយចំនួន​ដែល​កើតចេញពី​ស្ថិរភាព​នយោបាយ និងគោលនយោបាយរបស់រដ្ឋាភិបាល​ ដើម្បីគាំទ្រដល់ការចំណាយលើការរស់នៅសម្រាប់ក្រុមប្រជាជន​ងាយរងគ្រោះ​។

ប៉ុន្តែ ទំនុកចិត្តលើសេដ្ឋកិច្ច ការងារ និងប្រាក់ចំណូលនាពេលអនាគត បានធ្លាក់ចុះទាំងអស់។ ទំនុកចិត្តអ្នកប្រើប្រាស់នៅតែទាបជាង ១០០ ពិន្ទុ ខណៈការស្ទុះងើបឡើងវិញនៃសេដ្ឋកិច្ចថៃនៅតែមាន​សភាពយឺតយ៉ាវ ​ហើយប្រជាជនថៃត្រូវចំណាយច្រើនសម្រាប់ការរស់នៅប្រចាំថ្ងៃ ហើយ​ជម្លោះអាមេរិក-អ៊ីរ៉ង់ នៅតែបង្កភាពមិនប្រាកដប្រជា។

​វិស័យកសិកម្មក៏មិនដំណើរការបានល្អ។ ​នេះបើតាមសាកលវិទ្យាធិការនៃសាកលវិទ្យាល័យ UTCC ​លោក Thanavath Phonvichai ​ដែល​បន្ថែមថា ការវិនិយោគ និងការប្រើប្រាស់កំពុងថយចុះ ទោះបីជាការមកដល់របស់ភ្ញៀវទេសចរ​ស្ទុះងើបឡើងវិញក៏ដោយ។

គេមើលឃើញថា សេដ្ឋកិច្ច​ថៃ​នៅ​តែ​មាន​ភាព​យឺតយ៉ាវ​ដោយសារតែកម្សោយនៃ​ការ​ចំណាយ​ក្នុង​ស្រុក​​ បំណុល​គ្រួសារ​ខ្ពស់ ថ្លៃ​​រស់នៅ​កើនឡើង និង​ភាព​មិន​ប្រាកដប្រជា​ពី​ជម្លោះ​សកល​ ដែល​ជំរុញ​ឱ្យ​តម្លៃ​ប្រេង​ឡើង​ថ្លៃ។

កាលពីដើមខែមេសា នាយករដ្ឋមន្រ្តីថៃ និងរដ្ឋាភិបាលរបស់លោក បានចាប់ផ្ដើមយុទ្ធនាការ «ថៃជួយថៃ»​​ ដើម្បីប្រយុទ្ធប្រឆាំងនឹង​កំណើនថ្លៃ​រស់នៅ ដែលបណ្តាលមកពីតម្លៃថាមពលខ្ពស់​ និងជម្លោះនៅមជ្ឈិមបូព៌ា។ គំនិតផ្តួចផ្តើមនេះ ផ្តល់ជូនការបញ្ចុះតម្លៃរហូតដល់ ៥៨% លើទំនិញសំខាន់ៗ ដោយពង្រីកទៅជាដំណាក់កាលថ្មីៗដូចជា «តម្លៃទាបក្នុងស្រុក​» ដើម្បីគាំទ្រទាំងអ្នកប្រើប្រាស់ និងអ្នកផលិតក្នុងស្រុក។ យ៉ាងណាមិញ អ្នកសេដ្ឋកិច្ចមើលឃើញថា វាគ្រាន់តែជាគោលនយោបាយរយៈពេលខ្លីប៉ុណ្ណោះ ហើយវាអាចបង្កើតភាពតានតឹងផ្នែកហិរញ្ញវត្ថុសម្រាប់រដ្ឋាភិបាល និងបង្ខូចទីផ្សារ៕