រាជរដ្ឋាភិបាលកម្ពុជា ប្តេជ្ញាចូលរួមលើកស្ទួយវិស័យសហគ្រិនភាពនៅកម្ពុជាឱ្យកាន់តែប្រសើរ

មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានអះអាងថា រាជរដ្ឋាភិបាលកម្ពុជា បានប្តេជ្ញាចិត្តក្នុងការចូលរួមលើកស្ទួយវិស័យសហគ្រិនភាពនៅកម្ពុជាឱ្យកាន់តែប្រសើរ ដើម្បីជាកម្លាំងចលករក្នុងការអូសទាញកំណើនសេដ្ឋកិច្ចជាតិ។ ការលើកឡើងបែបនេះ ធ្វើឡើងនៅក្នុងកម្មវិធី “ប្រគល់ពានរង្វាន់សហគ្រិនខ្មែរឆ្នាំ២០២១” ដែលរៀបចំឡើងដោយសហគ្រិនខ្មែរនៅសណ្ឋាគារសូហ្វីតែលភ្នំពេញភូគីត្រា កាលពីថ្មីៗនេះ។

លោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ប្រមុខរដ្ឋាភិបាលកម្ពុជា មានចក្ខុវិស័យវែងឆ្ងាយក្នុងការកសាង និង លើកស្ទួយសហគ្រិនភាពនៅក្នុងការដឹកនាំវិស័យឯកជន ដែលជាដៃគូរក្នុងកិច្ចអភិវឌ្ឍរបស់រាជរដ្ឋាភិបាល និងជាកម្លាំងចលករក្នុងការអូសទាញកំណើនសេដ្ឋកិច្ចជាតិ។

លោក វង្សី វិស្សុត បន្តថា កម្មវិធីប្រគល់ពានរង្វាន់សហគ្រិនខ្មែរឆ្នាំ២០២១ ជាសកម្មភាពមួយក្នុងចំណោមកម្មវិធីស្នូលរបស់សហគ្រិនខ្មែរក្នុងការលើកស្ទួយវិស័យសហគ្រិនភាពនៅកម្ពុជាឱ្យកាន់តែប្រសើរ តាមរយៈការបង្កើតបរិយាកាសអំណោយផលដល់សហគ្រិនឲ្យបានសិក្សារៀនសូត្រ សាកល្បងសមត្ថភាព និងកសាងបណ្ដាញក្នុងប្រព័ន្ធអេកូឡូស៊ីសហគ្រិនភាពឱ្យកាន់តែមានភាពប្រទាក់ក្រឡា និងរឹងមាំ ដើម្បីកសាងមេទ័ព ឬអ្នកដឹកនាំពូកែៗក្នុងវិស័យឯកជន ប្រកួតប្រជែងក្នុងសមរភូមិសេដ្ឋកិច្ចក្នុងគោលដៅនៃការកសាងភាពរឹងមាំ ភាពធន់ និងទ្រទ្រង់ចីរភាពកំណើននៃសេដ្ឋកិច្ចជាតិក្នុងរយៈពេលវែង។

ចំណែក លោក បណ្ឌិត ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ បានមានប្រសាសន៍ថា សហគ្រិនខ្មែរមានចក្ខុវិស័យក្លាយជាថ្នាលជាតិក្នុងការលើកកម្ពស់ប្រព័ន្ធអេកូឡូស៊ីសហគ្រិនភាពគ្រប់តំបន់នៅក្នុងប្រទេសកម្ពុជាឲ្យបានទូលំទូលាយ និងគ្របដណ្តប់សហគ្រិនគ្រប់ប្រភេទសំដៅបង្កើនសហគ្រិនជំនាន់ថ្មី ដែលនឹងជំនួស ឬបន្ថែម ជាធនធានមនុស្ស ដើម្បីបង្កើតអាជីវកម្មបែបថ្មីឲ្យកាន់តែច្រើន។

គួរបញ្ជាក់ថា កម្មវិធី “ប្រគល់ពានរង្វាន់សហគ្រិនខ្មែរឆ្នាំ២០២១” ត្រូវបានរៀបចំឡើងអស់រយៈពេលពេញ១ឆ្នាំ ដោយមានជ័យលាភីសរុបចំនួន ១៤ ពាន ក្នុងនោះ “ពានរង្វាន់ពន្លកសហគ្រិនខ្មែរ” មាន៣ពាន “ពានរង្វាន់សហគ្រិនក្នុងធុរកិច្ចបង្កើតថ្មី” មាន៦ពាន និង“ពានរង្វាន់សហគ្រិនវ័យក្មេងកម្ពុជា” មាន៥ពានរង្វាន់៕

អត្ថបទ ៖ សំអឿន