រាជរដ្ឋាភិបាល គ្រោងប្រកាសលទ្ធផលជំរឿនសេដ្ឋកិច្ចឆ្នាំ ២០២២ នៅខែសីហា ឬកញ្ញាឆ្នាំក្រោយ

អ្នកនាំពាក្យក្រសួងផែនការ បានអះអាងថា រាជរដ្ឋាភិបាលកម្ពុជា គ្រោងប្រកាសផ្សព្វផ្សាយលទ្ធផលជំរឿនសេដ្ឋកិច្ចឆ្នាំ ២០២២ នៅខែសីហា ឬកញ្ញា ឆ្នាំ ២០២៣ខាងមុខនេះ ខណៈការធ្វើជំរឿនបានបិទបញ្ចប់ កាលពីថ្ងៃទី ៣១ ខែមីនា ឆ្នាំ ២០២២។

លោក ស្រី ដា អ្នកនាំពាក្យក្រសួងផែនការ បានឲ្យដឹងនៅថ្ងៃទី ១ ខែមេសានេះថា ការធ្វើជំរឿនសេដ្ឋកិច្ចឆ្នាំ ២០២២នេះ ក្រសួងផែនការបានប្រើរយៈពេល ១ខែ គឺចាប់អនុវត្តពីថ្ងៃទី ១ ខែមីនា រហូតដល់ថ្ងៃទី ៣១ ខែមីនា ឆ្នាំ ២០២២។ លោកបន្តថា គិតត្រឹមល្ងាចថ្ងៃទី ២៩ ខែមីនា លទ្ធផលជំរឿនសេដ្ឋកិច្ចសម្រេចបាន ៩៦% នៅទូទាំងប្រទេស តែរាជធានីភ្នំពេញ គឺនៅមានភាពយឺតយ៉ាវជាងគេ។

លោកបន្តទៀតថា «ជារួមក្នុងក្របខណ្ឌទូទាំងប្រទេស គឺសម្រេចបាន​ ៩៦% តែរាជធានី​ភ្នំពេញ មានភាពយឺតយ៉ាវជាងគេ ​ដោយទើបសម្រេចបានប្រមាណ​ ៧០%ប៉ុណ្ណោះ។ ភាព​យឺតយ៉ាវនេះ គឺដោយសារកត្តាមួយចំនួនដូចជា ​ចំនួនសហគ្រាសមានការកើនឡើង បើធៀប​ទៅ​នឹង​ការស្រង់​បញ្ជីសហគ្រាសកាលពីឆ្នាំ ២០២០ និងដោយសារចំនួនមន្រ្តីប្រមូលទិន្នន័យ​ មាន​ចំនួន​កំណត់»។

លោកបានបន្ថែមថា ចំពោះ​ករណីនៅរាជធានីភ្នំពេញនេះ នឹងអាចពន្យារពេលប្រមូលទិន្នន័យ ព្រោះសហគ្រាសខ្លះ ក៏បានសុំពន្យារពេល​ដើម្បីបំពេញព័ត៌មាន​លម្អិត ​ជូន​មន្រ្តីសម្ភាសន៍។ ចំពោះខេត្តផ្សេងៗទៀត ស្ទើរតែសម្រេចបាន ១០០%ហើយ ដោយគេកំពុងទុកពេលពិនិត្យផ្ទៀងផ្ទាត់សិន។

លោក ស្រី ដា បានបញ្ជាក់ថា ទិន្នន័យជំរឿនសេដ្ឋកិច្ច គឺពិតជាមានសារៈសំខាន់បំផុត ដែលត្រូវធ្វើមិនអាចខ្វះបាន ដើម្បីឆ្លើយតបសេចក្តីត្រូវការប្រើប្រាស់ទិន្នន័យ សម្រាប់ជាធាតុចូលដ៏សំខាន់ ក្នុងការរៀបចំគោលនយោបាយអភិវឌ្ឍន៍សេដ្ឋកិច្ច បរិស្ថាន សង្គម វប្បធម៌ និងសុខុមាលភាពរបស់ប្រជាជនកម្ពុជា និងផ្តល់សូចនាករសម្រាប់ចំណុចដៅ នៃគោលដៅអភិវឌ្ឍន៍ ប្រកបដោយចីរភាពឆ្នាំ ២០១៦-២០៣០។

ការធ្វើជំរឿនសេដ្ឋកិច្ច បានធ្វើជាលើដំបូងនៅឆ្នាំ ២០១១ ហៅថា “ជំរឿនសហគ្រាសនៅព្រះរាជាណាចក្រកម្ពុជាឆ្នាំ២០១១” និងបានធ្វើ “អង្កេតចន្លោះជំរឿនសហគ្រាស នៅព្រះរាជាណាចក្រកម្ពុជាឆ្នាំ២០១៤”។

ផ្អែកលើរបាយការណ៍លទ្ធផលបឋម ស្តីពី ការស្រង់បញ្ជីអង្គភាពសេដ្ឋកិច្ច នៅតាមរាជធានីខេត្ត ទាំង២៥ បានឲ្យដឹងថា  មានចំនួនអង្គភាពសេដ្ឋកិច្ចសរុប ៧៤៣ ៥៣២ ទីតាំងមូលដ្ឋាន នៅឆ្នាំ២០២១ ក្នុងទូទាំងប្រទេស។ ចំនួនអង្គភាពសេដ្ឋកិច្ច បានកើនទ្បើងប្រមាណ ៤៧% បើធៀបនឹងឆ្នាំ២០១១ នៃជំរឿនសហគ្រាសឆ្នាំ ២០១១ហើយបានកើនទ្បើងប្រមាណ ៤៥% បើធៀបនឹងឆ្នាំ ២០១៤ ផ្នែកទិន្នន័យអង្កេតចន្លោះជំរឿនសហគ្រាសឆ្នាំ ២០១៤៕

អត្ថបទ៖ សំអឿន