រហូតមកដល់ពេលនេះ វិបត្តិសេដ្ឋកិច្ចនៅចក្រភពអង់គ្លេស មិនទាន់ដោះស្រាយបាននៅឡើយទេ ប៉ុន្តែទោះជាយ៉ាងណា នៅក្នុងឆ្នាំ​២០២៣ នេះ រដ្ឋាភិបាលអង់គ្លេសបានបញ្ចេញថវិកាឧបត្ថម្ភដល់គ្រួសារ​ដែលមានចំណូលទាបរាប់លាននាក់នៅទូទាំងប្រទេស ដោយក្នុងមួយគ្រួសារទទួលបាន ៩០០ ផោន (១,០៨៤ ដុល្លារ) ។

ជំនួយជាសាច់ប្រាក់ដល់គ្រួសារក្រីក្រនេះ ត្រូវបានប្រកាសដោយអធិការបតីអង់គ្លេសលោក Jeremy Hunt នៅក្នុងសេចក្តីថ្លែងការណ៍ឆ្នាំថ្មីរបស់លោក រួមជាមួយនឹងការបង្កើនពន្ធ និងការចំណាយសាធារណៈកាន់តែតឹងរ៉ឹង ។

ជាមួយគ្នានោះផងដែរ ចំពោះជនពិការជាង ៦ លាននាក់ក៏ទទួលបានការឧបត្ថម្ភដាច់ដោយឡែក​ផងដែរចំនួន ១៥០ ផោន (១៨១ ដុល្លារ) និង​ ៣០០ ផោន (៣៦២ ដុល្លារ) ទៀត​សម្រាប់ប្រាក់សោធននិវត្តន៍ជាង ៨ លាននាក់ ។

ទន្ទឹមនោះ កញ្ចប់ជំនួយចុងក្រោយបំផុតនេះគឺធ្វើតាមកម្មវិធីជំនួយសាច់ប្រាក់ ១,២០០ ផោន (១,៤៥០ ដុល្លារ) សម្រាប់គ្រួសារដែលមានចំណូលទាបកាលពីឆ្នាំមុន ខណៈដែលចក្រភពអង់គ្លេសកំពុងតស៊ូជាមួយវិបត្តិថ្លៃចំណាយការរស់នៅ ចំពេលបរិយាកាសសេដ្ឋកិច្ចកំពុងតែលំបាក ។

គួរឲ្យដឹងថា ចក្រភពអង់គ្លេស បានធ្លាក់ចូលក្នុងវិបត្តិអតិផរណាខ្ពស់បំផុត ១១.១ ភាគរយកាលពីខែវិច្ឆិកា ឆ្នាំ ២០២២ កន្លងទៅ ដែលនាំឲ្យសេដ្ឋកិច្ច​អង់គ្លេសធ្លាក់ចូលក្នុងវិបត្តិរហូតមកដល់សព្វថ្ងៃ ខណៈក្នុងឆ្នាំ ២០២៣ នេះផងដែរ សេដ្ឋវិទូជាច្រើនក៏បានព្យាករណ៍ដែរថា សេដ្ឋកិច្ចចក្រភពអង់គ្លេស នឹងនៅតែបន្តជួបវិបត្តិ ហើយអាចអាក្រក់ជាងមុនទៅទៀត ៕

ប្រែសម្រួលដោយ ៖ នាង រតនៈ

ប្រភព ៖ Euro News