ធនាគារធំមួយរបស់ អាមេរិក ខាតប្រាក់បញ្ញើជាង ១០០ ពាន់លានដុល្លារ​ក្នុងត្រីមាសទី ១

ធនាគាររបស់អាមេរិក First Republic Bank បានខាតបង់ប្រាក់បញ្ញើជាង ១០០ ពាន់លានដុល្លារ ក្នុងអំឡុងត្រីមាសទី ១ បន្ទាប់ពីការដួលរលំរបស់ធនាគារ Silicon Valley និង Signature Bank ដែលជំរុញឲ្យមានការដកប្រាក់ពីអ្នកផ្តល់កម្ចីក្នុងតំបន់ ហើយប្រាក់ចំណេញបានធ្លាក់ចុះជាង ៣៣ ភាគរយ ។

តាមរយៈរបាយការណ៍នេះ ប្រាក់ចំណេញរបស់ធនាគារ First Republic បានធ្លាក់ចុះពី ៤០១ លានដុល្លារ​មកនៅត្រឹមតែ ២៦៩ លានដុល្លារកាលពីឆ្នាំមុន ខណៈប្រាក់ចំណូលនេះបានធ្លាក់ចុះ ១៣ ភាគរយ ឬធ្លាក់ចុះដល់ ១.២ ពាន់លានដុល្លារ ។

មិនតែប៉ុណ្ណោះ ភាគហ៊ុន First Republic បាត់បង់ជាង ៩០ ភាគរយនៃតម្លៃរបស់ពួកគេ ចាប់តាំងពីវិបត្តិធនាគារក្នុងខែមីនា ។ ទន្ទឹមគ្នានេះ ធនាគារត្រូវបានគេដឹងថា កំពុងព្យាយាមកាត់បន្ថយបុគ្គលិករបស់ខ្លួន និងកាត់បន្ថយប្រាក់ខែនាយកប្រតិបត្តិផងដែរ ។

ស្របពេលជាមួយគ្នានេះ របាយការណ៍បានកត់សម្គាល់ទៀតថា ភាគហ៊ុនធនាគារបានធ្លាក់ចុះ ១៥ ភាគរយ បន្ទាប់ពីការចេញផ្សាយ​ពីទិន្នន័យ​ប្រចាំត្រីមាសទី ១ ។

គួរបញ្ជាក់ថា ធនាគារ First republish Bank បានទាក់ទាញការយកចិត្តទុកដាក់យ៉ាងខ្លាំងពីសំណាក់វិនិយោគិនធំៗ បន្ទាប់ពីធនាគារ Silicon Valley និងធនាគារ Signature Bank បានដួលរលំកាលពីខែមុន ដោយធ្វើឲ្យប៉ះពាល់ដល់ការជឿទុកចិត្តរបស់ប្រជាជនអាមេរិកជាមួយធនាគារក្នុងតំបន់ និងធ្វើឲ្យអតិថិជនជាច្រើន នាំគ្នាសម្រុកដកប្រាក់បញ្ញើរចេញយកទៅដាក់នៅធនាគារធំៗជំនួសវិញ ៕

ប្រែសម្រួល ៖ នាង រតនៈ

ប្រភព ៖ Sputnik