ស្រីលង្កា រកចំណូលពីទេសចរបានជាង ៧០០ លានដុល្លារ ក្នុងរយៈពេល ៤ ខែ

ប្រទេសស្រីលង្ការកចំណូលបានជិត ៧០០ លានដុល្លារពីវិស័យទេសចរណ៍ក្នុងរយៈពេល ៤ ខែដំបូងនៃឆ្នាំ ២០២៣ ពោលគឺកើនឡើង ១៧.៨ ភាគរយ បើធៀបនឹងរយៈពេលដូចគ្នាកាលពីឆ្នាំមុន ។

ប្រធានអាជ្ញាធរអភិវឌ្ឍន៍ទេសចរណ៍ស្រីលង្កា (SLTDA) លោក Priantha Fernando បានប្រាប់ប្រព័ន្ធផ្សព្វផ្សាយថា គ្រាន់តែនៅក្នុងខែមេសា ស្រីលង្ការកបានចំណូល ១៦៦.៥ លានដុល្លារទៅហើយពីវិស័យទេសចរណ៍នេះ ។

បើយោងតាមតួលេខពីអាជ្ញាធរទេសចរបានឲ្យដឹងថា ប្រទេសស្រីលង្កាបានទទួលភ្ញៀវទេសចរចំនួនជាង ៣៣ ម៉ឺននាក់ក្នុងរយៈពេល ៣ ខែដំបូងនៃឆ្នាំនេះ ។

ដោយឡែក កាលពីខែមុន លោក Fernando បាននិយាយថា ឧស្សាហកម្មទេសចរណ៍របស់ប្រទេសស្រីលង្កាមានគោលបំណងទាក់ទាញភ្ញៀវទេសចរចំនួន ២ លាននាក់ក្នុងឆ្នាំ ២០២៣ ធៀបនឹងគោលដៅមុនចំនួន ១.៥ លាននាក់ ។

គួរបញ្ជាក់ថា វិស័យទេសចរ ដែលជាប្រភពចំណូលឈានមុខគេសម្រាប់ប្រទេស បានទទួលរងនូវការធ្លាក់ចុះជាខ្លាំង ដោយសារតែជំងឺរាតត្បាតកូវីដ ១៩ និងវិបត្តិសេដ្ឋកិច្ចនៅក្នុងប្រទេសមួយនេះ៕

ប្រែសម្រួលដោយ ៖ នាង​ រតនៈ

ប្រភព ៖ Xinhua