ក្រសួង​ហិរញ្ញវត្ថុ​ថៃទម្លាក់​ការ​ព្យាករណ៍​កំណើន​សេដ្ឋកិច្ច​របស់ខ្លនមកត្រឹម២,៤%នៅឆ្នាំនេះ

ទីក្រុងបាងកក៖ក្រសួងហិរញ្ញវត្ថុថៃកាលពីថ្ងៃចន្ទបានបន្ទាបការព្យាករណ៍កំណើនសេដ្ឋកិច្ចរបស់ខ្លួនមកនៅត្រឹម ២,៤%សម្រាប់ឆ្នាំនេះ ពោលគឺធ្លាក់ចុះពីការព្យាករណ៍ពីមុន​ក្នុង ២,៨%នៅក្នុងខែមករា។

លោក Pornchai Thiraveja អគ្គនាយកនៃការិយាល័យគោលនយោបាយសារពើពន្ធ (FPO) នៃក្រសួងហិរញ្ញវត្ថុបាននិយាយថា សេដ្ឋកិច្ចថៃឥឡូវនេះកំពុងប្រឈមមុខនឹងបញ្ហាសំខាន់ៗចំនួនបួន រួមទាំងការនាំចេញទាបជាងការរំពឹងទុក ជាពិសេសទំនិញឧស្សាហកម្ម។

​លើសពីនេះ ខាងផលិតកម្មក៏មានការធ្លាក់​ផងដែរ ដូចដែលបានបង្ហាញដោយសន្ទស្សន៍ផលិតកម្ម ជាពិសេសនៅក្នុងប្រភេទផលិតកម្មដូចជា រថយន្ត និងសៀគ្វីអេឡិចត្រូនិចជាដើម។​

ជាងនេះទៅទៀត វិស័យកសិកម្មត្រូវបានរងផលប៉ះពាល់ដោយគ្រោះរាំងស្ងួតដែលបណ្តាលមកពីបាតុភូត El Niño ខណៈដែលថវិការបស់រដ្ឋាភិបាលមិនទាន់ត្រូវបានបញ្ចេញឱ្យពេញលេញនៅឡើយ។ ជាមួយគ្នានេះដែរច្បាប់ស្តីពីការចំណាយថវិកាសារពើពន្ធទើបតែត្រូវបានប្រកាសកាលពីថ្ងៃទី ២៦ ខែមេសាកន្លងទៅនេះ។ ការណ៍នេះនឹងបណ្តាលឱ្យមានការពន្យារពេលរយៈពេលប្រាំមួយខែនៅក្នុងថវិកាចំណាយសារពើពន្ធ ២០២៤ ។

ក្រសួងក៏បានកាត់បន្ថយការព្យាកររបស់ខ្លួនសម្រាប់កំណើនការនាំចេញរបស់ប្រទេសមកត្រឹម ២,៣%ធ្លាក់ចុះពីការប៉ាន់ប្រមាណ ៤,២%កាលពីខែមករា ខណៈដែលការព្យាករណ៍អតិផរណារបស់ខ្លួនធ្លាក់ចុះមកត្រឹម ០,៦%ពី ១% មុន។

អត្រាប្តូរប្រាក់បាតថៃក្នុងឆ្នាំ ២០២៤ ត្រូវបានគេរំពឹងថានឹងមានចំនួន ៣៦ បាតក្នុងមួយដុល្លារ ធ្លាក់ចុះ ៣,៤%ធៀបនឹងឆ្នាំមុន ដែលផ្តល់អត្ថប្រយោជន៍សម្រាប់ការនាំចេញរបស់ប្រទេសថៃ ខណៈដែលតម្លៃប្រេងឆៅឌូបៃនៅឆ្នាំនេះត្រូវបានគេរំពឹងថានឹងមានចំនួន ៨៦ ដុល្លារក្នុងមួយបារ៉ែល ដែលខ្ពស់ជាងតម្លៃ ការព្យាករណ៍ពីមុនគឺ ៨២ ដុល្លារ។

ប្រទេសថៃត្រូវបានគេរំពឹងថានឹងទទួលបានភ្ញៀវទេសចរចំនួន ៣៥,៧លាននាក់នៅឆ្នាំនេះ កើនឡើងពី ៣៣,៥%លាននាក់ក្នុងការព្យាករណ៍ពីមុន ខណៈដែលការបញ្ចេញថិវការចំណាយសាធារណៈត្រូវបានប៉ាន់ប្រមាណថាមានចំនួន ៩២,៣%នៃថវិកាសរុប ជាមួយនឹងការចំណាយទៀងទាត់ ៩៩,៥%និងការចំណាយលើការវិនិយោគនៅ ៦៤%៕