សេដ្ឋកិច្ច

តម្លៃនាំចេញកៅស៊ូវៀតណាម កើនឡើងជាង ១០ ភាគរយ ក្នុងរយៈពេល ៤ ខែដើមឆ្នាំ

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ២៣ ឧសភា ២០២៤

ដោយ

សមាគមកៅស៊ូវៀតណាម បានឱ្យដឹងថា ប្រទេសវៀតណាមបាននាំចេញកៅស៊ូចំនួន ៤៩៩ ០០០ តោន ក្នុងតម្លៃ ៧៤៣ លានដុល្លារ ក្នុងរយៈពេល ៤ ខែដំបូងនៃឆ្នាំ ២០២៤ ដែលវាជាការកើនឡើង ៦,៤ ភាគរយលើបរិមាណ និង ១៤ ភាគរយលើតម្លៃ។ នេះបើតាមការចុះផ្សាយរបស់កាសែត VnExpress កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមបាននិយាយថា ដោយសារការងើបឡើងវិញនៃឧស្សាហកម្មរថយន្ត និងសំបកកង់សកល ជាពិសេសក្នុងប្រទេសចិន ការនាំចេញកៅស៊ូរបស់វៀតណាម ទំនងនឹងបន្តទទួលបាននូវលក្ខខណ្ឌអំណោយផល ហើយរំពឹងថានឹងកើនឡើងបន្តទៀតនៅក្នុងត្រីមាសទី២ ឆ្នាំនេះ។

ប្រទេសចិន បន្តជាអ្នកនាំចូលកៅស៊ូវៀតណាមច្រើនជាងគេ ដោយរួមចំណែក ៨០ ភាគរយនៃបរិមាណនាំចេញរបស់វៀតណាម ហើយនៅលេខរៀងបន្ទាប់គឺឥណ្ឌា។

អគ្គលេខាធិការសមាគមលោក Vo Hoang An បានថ្លែងថា វានៅតែមានឱកាសសម្រាប់វៀតណាម ក្នុងការបង្កើនការនាំចេញវត្ថុធាតុដើមកៅស៊ូរបស់ខ្លួន ដោយសារប្រទេសនេះអាចផលិតជ័រកៅស៊ូបាន ១,៣ លានតោនក្នុងមួយឆ្នាំ ប៉ុន្តែវិស័យកែច្នៃកៅស៊ូក្នុងស្រុក ត្រូវការតែជាង ៣០០ ០០០ តោនប៉ុណ្ណោះ។

បើតាម VnExpress ក្រោមយុទ្ធសាស្ត្រអភិវឌ្ឍន៍ការដាំដុះដំណាំរហូតដល់ឆ្នាំ ២០៣០ ទិន្នផលកៅស៊ូនឹងកើនឡើងដល់ ១,៨ ទៅ ២ តោនក្នុងផ្ទៃដី១ហិកតា។

តួលេខពីអគ្គនាយកដ្ឋានគយរបស់ប្រទេស វៀតណាមបាននាំចេញកៅស៊ូចំនួន ២,១៤ លានតោនកាលពីឆ្នាំមុន ដោយរកចំណូលបាន ២,៨៩ ប៊ីលានដុល្លារ។ តួលេខនេះ បង្ហាញពីការកើនឡើង ០,០៤ ភាគរយលើបរិមាណ និងការធ្លាក់ចុះ ១២,៧ ភាគរយលើតម្លៃ បើធៀបនឹងរយៈពេលដូចគ្នាក្នុងឆ្នាំ ២០២២។

យ៉ាងណាមិញ សមាគមកៅស៊ូវៀតណាមបាននិយាយថា ការនាំចេញកៅស៊ូរំពឹងថានឹងឈានដល់ចន្លោះពី ៣,៣ ទៅ ៣,៥ ប៊ីលានដុល្លារនៅឆ្នាំនេះ៕

Related Topics:ជ័រកៅស៊ូ