សេដ្ឋកិច្ច

កំណើនសេដ្ឋកិច្ចអឺរ៉ុបប្រសើរឡើងនៅកម្រិតតិចតួច ០,៣ ភាគរយក្នុងត្រីមាសទី១

បានផុស

១០ ខែ មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

កំណើនសេដ្ឋកិច្ចរបស់ប្លុកអឺរ៉ុប ហាក់ប្រសើរឡើងនៅកម្រិតស្ដួចស្ដើង ០,៣ ភាគរយក្នុងត្រីមាសទី១ដើមឆ្នាំនេះ ធៀបនឹងត្រីមាសចុងក្រោយកាលពីឆ្នាំមុន។ នេះបើតាមការរាយការណ៍របស់ទីភ្នាក់ងារសារព័ត៌មាន AP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណើនតិចតួចនេះ កើតមានឡើងដោយសារតែភាពធូរស្រាលនៃអតិផរណា ដែលជួយសម្រួលបន្ទុកចំណាយរបស់អ្នកប្រើប្រាស់ ខណៈសេដ្ឋកិច្ចជាប់គាំងរបស់អាល្លឺម៉ង់ ដែលមហាអំណាចសេដ្ឋកិច្ចប្រចាំទ្វីប បង្ហាញពីសញ្ញានៃការស្ទុះងើបឡើងវិញ។

តួលេខផ្លូវការដែលចេញផ្សាយកាលពីថ្ងៃអង្គារ ដោយទីភ្នាក់ងារស្ថិតិរបស់សហភាពអឺរ៉ុប Eurostat បានបង្ហាញថា កំណើនសេដ្ឋកិច្ច ០,៣ ភាគរយ គឺជាកំណត់ត្រាដំណើរការសេដ្ឋកិច្ចវិជ្ជមានបំផុតរបស់តំបន់ចាយប្រាក់អឺរ៉ូដែលមានប្រទេសចំនួន ២០ រាប់ចាប់តាំងពីត្រីមាសទី៣ ឆ្នាំ ២០២២ ដោយងើបឡើងពីការធ្លាក់ចុះ ០,១ ភាគរយក្នុងត្រីមាសទី៣ និងទី៤ ឆ្នាំមុន។

គួរគូសបញ្ជាក់ថា សេដ្ឋកិច្ចបានចុះខ្សោយដោយសារអតិផរណាខ្ពស់ ដែលបានកាត់បន្ថយការទិញរបស់អ្នកប្រើប្រាស់ និងដោយសារការកើនឡើងតម្លៃថាមពល ក្រោយរុស្ស៊ីបានកាត់ផ្តាច់ការផ្គត់ផ្គង់ឧស្ម័នធម្មជាតិមួយផ្នែកធំ។

បញ្ហាប្រឈមទាំងនេះ បានធូរស្រាលឡើងវិញ នៅពេលតម្លៃថាមពលធ្លាក់ចុះ ហើយអតិផរណាថយដល់ ២,៤ ភាគរយក្នុងខែមេសា។ ប៉ុន្តែកំណត់ត្រាអត្រាការប្រាក់ខ្ពស់ពីធនាគារកណ្តាលអ៊ឺរ៉ុប ក្នុងគោលបំណងជំរុញឱ្យអតិផរណាធ្លាក់ចុះ បានបន្ថែមឧបសគ្គមួយទៀត គឺការបង្កើនថ្លៃដើមឥណទានសម្រាប់អាជីវកម្ម និងអ្នកប្រើប្រាស់។

ទន្ទឹមនឹងនេះ ភាពប្រសើរឡើងនៃកំណើនសេដ្ឋកិច្ចអាល្លឺម៉ង់ ប្រមាណ ០,២ ភាគរយក្នុងត្រីមាសទី១ ក៏រួមចំណែកដល់សេដ្ឋកិច្ចអឺរ៉ុបផងដែរ ខណៈសេដ្ឋកិច្ចប្រទេសនេះធ្លាក់ចុះដល់ ០,៥ ភាគរយ ក្នុងត្រីមាសចុងក្រោយនៃឆ្នាំ ២០២៣។

ក្នុងត្រីមាសខែមករា-ឧសភាដូចគ្នា បារាំង ដែលជាប្រទេសមានសេដ្ឋកិច្ចធំជាងគេទី២នៅតំបន់ចាយប្រាក់អឺរ៉ូ មានកំណើន ០,២ ភាគរយ ខណៈអេស្ប៉ាញ គឺជាប្រទេសនាំមុខគេមួយក្នុងកំណើន ០,៧ ភាគរយ។ បើតាម Eurostat តួលេខតំបន់ចាយប្រាក់អឺរ៉ូទាំងមូល មានភាពប្រសើរឡើងដោយសារតែការកើនឡើង ១,១ ភាគរយ ក្នុងប្រទេសអៀរឡង់ ដែលប្រទេសនេះមានវត្តមានក្រុមហ៊ុនពហុជាតិធំៗរបស់ពិភពលោកជាច្រើន៕

Related Topics: