រដ្ឋបាលខណ្ឌចំការមន បង្ក្រាបទីតាំងសង្ស័យប្តូរប្រាក់ឌីជីថល (Crypto) ខុសច្បាប់ នៅកោះពេជ្រ

បិទឃ្លុំចំនួន ០១បន្ទប់ នៅអគារមួយកន្លែង ក្រោយរកឃើញេ laptop ០៤គ្រឿង និងទូរស័ព្ទ ១០គ្រឿង ពាក់ព័ន្ធការប្តូរប្រាក់ឌីជីថល ( Crypto ) ។ កាលពីរសៀលថ្ងៃទី២៩ ខែមិថុនា ឆ្នាំ២០២៦ គណៈបញ្ជាការឯកភាពខណ្ឌចំការមន ដឹកនាំដោយលោក កៀង លក្ស័ អភិបាលនៃគណៈអភិបាលខណ្ឌចំការមន រួមមានការសម្របសម្រួលពី លោកស្រី ភី ស៊ីថង ព្រះរាជអាជ្ញារង, ក្រុមការងារចម្រុះដឹកនាំដោយ លោក ម៉ៅ បូណែត អភិបាលរងខណ្ឌ បានចុះត្រួតពិនិត្យបន្ទប់សង្ស័យក្នុងអគារ DTT RESIDENCE ទីក្រុងកោះពេជ្រ សង្កាត់ទន្លេបាសាក់ បន្ទាប់ពីទទួលព័ត៌មានរាយការណ៍ពីប្រជាពលរដ្ឋ ។

ជាលទ្ធផលចំណុចអគារខាងលើ មាន ចំនួន ៦០ បន្ទប់ រកឃើញមនុស្សស្នាក់នៅ ២៧ នាក់ (ស្រី ១០ នាក់) មានលិខិតឆ្លងដែន និងទិដ្ឋាការត្រឹមត្រូវ (ពុំមានជនបរទេសស្នាក់នៅខុសច្បាប់ឡើយ)។ ការបង្ក្រាប នៅបន្ទប់លេខ ១២១៨ (គ្រប់គ្រងដោយក្រុមហ៊ុន ChaoChi Group) សមត្ថកិច្ចបានរកឃើញសម្ភារសង្ស័យរួមមាន Laptop ០៤គ្រឿង និងទូរស័ព្ទ ១០គ្រឿង ។

ផ្អែកលើការធ្វើវិភាគកោសល្យវិច័យ ពីការិយាល័យប្រឆាំងបទល្មើសបច្ចេកវិទ្យា ទីតាំងនេះត្រូវបានសន្និដ្ឋានថាជាករណី សង្ស័យប្តូររូបបិយប័ណ្ណឌីជីថល (Crypto) ខុសច្បាប់ ចំណែកបន្ទប់ខាងលើត្រូវបាន ឃ្លុំជាបណ្តោះអាសន្ន។

បច្ចុប្បន្នសម្ភារវត្ថុតាងទាំងអស់ត្រូវបានប្រគល់ជូន ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីជំនាញ៕ អត្ថបទ ៖ រដ្ឋា