សេដ្ឋកិច្ច

អាកាសចរណ៍សកល រំពឹងថានឹងកើនប្រាក់ចំណេញដល់ប្រហែល ៣០ ប៊ីលានដុល្លារ

បានផុស

២ years មុន

នៅ

ថ្ងៃអង្គារ ៤ មិថុនា ២០២៤

ដោយ

សមាគមដឹកជញ្ជូនតាមផ្លូវអាកាសអន្តរជាតិ (IATA) នៅថ្ងៃចន្ទនេះ បានចេញការព្យាករណ៍របស់ខ្លួន ដោយបង្កើនការរំពឹងទុកលើប្រាក់ចំណេញក្នុងវិស័យអាកាសចរណ៍សម្រាប់ឆ្នាំ ២០២៤ ខណៈប្រាក់ចំណូលរបស់ឧស្សាហកម្មទាំងមូលនឹងកើនឡើងជិត ១ ទ្រីលានដុល្លារ ដោយសារតែកំណត់ត្រានៃអ្នកធ្វើដំណើរកើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

IATA បាននិយាយថា ខ្លួនរំពឹងថា ឧស្សាហកម្មអាកាសចរណ៍ទូទាំងពិភពលោកនឹងរកបានប្រាក់ចំណេញចំនួន ៣០,៥ ប៊ីលានដុល្លារក្នុងឆ្នាំនេះ ពោលគឺខ្ពស់ជាងឆ្នាំ ២០២៣ (២៧,៤ ប៊ីលានដុល្លារ)។

ការរំពឹងទុកវិជ្ជមាននេះ កើតឡើងត្រឹមតែ ៤ ឆ្នាំ ក្រោយឧស្សាហកម្មអាកាសចរណ៍បានដួលរលំដល់ការខាតបង់ ១៤០ ប៊ីលានដុល្លារក្នុងឆ្នាំ ២០២០ ដោយសារតែវិបត្តិកូវីដ១៩។

ប្រធានសមាគម លោក Willie Walsh បានប្រាប់រ៉យទ័រនៅក្រៅកិច្ចប្រជុំប្រចាំឆ្នាំ ដែលចូលរួមដោយសមាជិក IATA ជាង ៣០០ ក្រុមហ៊ុន (ស្មើនឹងជាង ៨០ ភាគរយនៃចរាចរណ៍ផ្លូវអាកាសទូទាំងពិភព) ថា៖ «បរិយាកាសគឺប្រសើរជាងដែលយើងបានរំពឹងទុក ជាពិសេសនៅតំបន់អាស៊ី»។

ទោះជាយ៉ាងណាក៏ដោយ សមាគមបានព្រមានថា សមត្ថភាពរបស់វិស័យក្នុងការស្ទុះងើបឡើងវិញខ្លាំង កំពុងរាំងស្ទះដោយសារតែការរំខានលើខ្សែសង្វាក់ផ្គត់ផ្គង់សកល។

IATA បាននិយាយក្នុងទស្សនវិស័យសេដ្ឋកិច្ចចុងក្រោយថា «ទិន្នផលអ្នកដំណើរ» ដែលគេសំដៅលើចំនួនទឹកប្រាក់ជាមធ្យមដែលអ្នកដំណើរចំណាយដើម្បីហោះហើរ១ម៉ាយនោះ រំពឹងថានឹងកើនឡើង ៣,២ ភាគរយ បើធៀបនឹងឆ្នាំ ២០២៣។

គួរគូសបញ្ជាក់ថា សកម្មភាពក្រុមហ៊ុនអាកាសចរណ៍ ត្រូវបានគេមើលឃើញថាជាឧបករណ៍វាយតម្លៃមួយ សម្រាប់អាជីវកម្ម ឬទំនុកចិត្តអ្នកប្រើប្រាស់ ក៏ដូចជាពាណិជ្ជកម្មផងដែរ៕

Related Topics: