សេដ្ឋកិច្ច

អ្នកជំនាញវៀតណាមស្នើឲ្យយកពន្ធលើការជួញដូរមាស ដើម្បីទប់ស្កាត់ការប្រែប្រួលទីផ្សារ

បានផុស

១០ ខែ មុន

នៅ

ថ្ងៃអង្គារ ១១ មិថុនា ២០២៤

ដោយ

អ្នកជំនាញវៀតណាមបានផ្តល់អនុសាសន៍ ឱ្យអនុវត្តពន្ធលើប្រតិបត្តិការជួញដូរមាស ដើម្បីជួយទប់ស្កាត់ការប្រមូលទិញពីក្រុមវិនិយោគិនមួយចំនួន ជាពិសេសអ្នកដែលចូលរួមក្នុងសកម្មភាពក្រឡុកទីផ្សារ ឬបំផុសបំផុលតម្លៃមាស។ នេះបើតាមការចុះផ្សាយរបស់កាសែត Vietnam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនេះ ធ្វើឡើងខណៈបច្ចុប្បន្ន វិស័យវិនិយោគផ្សេងទៀតនៅវៀតណាមដូចជា មូលបត្រ និងអចលនទ្រព្យ ត្រូវបង់ពន្ធលើប្រាក់ចំណូលផ្ទាល់ខ្លួន ប៉ុន្តែប្រតិបត្តិការជួញដូរមាសនៅតែមិនជាប់ពន្ធ។

ក្នុងកិច្ចប្រជុំផ្តោតលើគោលនយោបាយសម្រាប់ការគ្រប់គ្រងទីផ្សារមាស ដែលរៀបចំដោយធនាគាររដ្ឋវៀតណាម (SBV) កាលពីថ្ងៃទី ៩ ខែមិថុនា លោកស្រីសាស្រ្តាចារ្យបណ្ឌិត Nguyen Thi Mùi សមាជិកក្រុមប្រឹក្សាប្រឹក្សាគោលនយោបាយហិរញ្ញវត្ថុ និងហិរញ្ញវត្ថុជាតិ បានស្នើថា អាជ្ញាធរនិយតកម្មគួរតែ ផ្តល់អនុសាសន៍ឱ្យបង្កើតគោលនយោបាយពន្ធ ប្រហាក់ប្រហែលគ្នាទៅនឹងពន្ធក្នុងវិស័យវិនិយោគផ្សេងៗទៀត។

លោកស្រីលើកឡើងថា ដំណោះស្រាយផ្អែកលើពន្ធ អាចជះឥទ្ធិពលលើចិត្តសាស្ត្រអ្នកប្រើប្រាស់ ដែលនាំឱ្យពួកគេផ្លាស់ប្តូរឆ្ពោះទៅរកបណ្តាញវិនិយោគផ្សេងៗទៀត ដែលការណ៍នេះនឹងជួយគ្រប់គ្រងតម្លៃមាសឱ្យកាន់តែប្រសើរឡើង ខណៈការអនុវត្តពន្ធក៏នឹងធានាបាននូវភាពយុត្តិធម៌បន្ថែមទៀត ក្នុងអាជីវកម្មជួញដូរមាសផងដែរ។

ចំណែកឯសាស្រ្តាចារ្យបណ្ឌិតម្នាក់ទៀត គឺលោក Hoàng Văn Cường ដែលជាអនុប្រធានសាកលវិទ្យាល័យសេដ្ឋកិច្ចជាតិវៀតណាម បានយល់ស្របនឹងគំនិតនេះ ដោយលើកឡើងថា ខណៈការនាំចូលមាសឆៅ (មិនទាន់កែច្នៃ) និងមាសដុំ អាចមានវត្ថុបំណងខុសគ្នា ប៉ុន្តែការប្រមូលពន្ធត្រូវតែធ្វើលើង ក្នុងករណីណាមួយ។

បន្ថែមពីលើគ្នានេះ អតីតអនុប្រធានគណៈកម្មការត្រួតពិនិត្យហិរញ្ញវត្ថុជាតិវៀតណាម លោក Lê Xuân Nghĩa ក៏បានសង្កត់ធ្ងន់ថា ការយកពន្ធគឺជាឧបករណ៍ដ៏មានប្រសិទ្ធភាពបំផុត ក្នុងការដោះស្រាយបញ្ហានៃការរត់ពន្ធមាស និងការក្រឡុកទីផ្សារ។ លោកថ្លែងយ៉ាងដូច្នេះថា៖ «ការពឹងផ្អែកតែលើវិធានការរដ្ឋបាល ដើម្បីប្រយុទ្ធប្រឆាំងនឹងការរត់ពន្ធ ជួនកាលមានប្រសិទ្ធភាពតិចជាងការប្រើប្រាស់វិធានការដាក់ពន្ធ»។

យោងតាមអ្នកជំនាញ ដំណើរការជួញដូរមាសមានភាពប្រសើរជាងជម្រើសវិនិយោគផ្សេងទៀតឆ្ងាយ ចាប់តាំងពីដើមឆ្នាំមក ប្រសិនបើគេនិយាយពីផលចំណេញ។ ក្នុងរយៈពេល៥ខែកន្លងមកនេះ ដុំមាសបានឃើញអត្រានៃប្រាក់ចំណេញប្រហែល ២២ ភាគរយ ដែលលើសពីទិន្នផលបានមកពីការសន្សំធនាគារ មូលបត្រ ឬសញ្ញាប័ណ្ណ។

ទន្ទឹមនឹងនេះផងដែរ SBV កន្លងមក ក៏បានណែនាំដល់សាខាខេត្ត និងក្រុងរបស់ខ្លួន ឱ្យអនុវត្តបទប្បញ្ញត្តិយ៉ាងតឹងរ៉ឹងលើការប្តូរប្រាក់បរទេស និងការជួញដូរមាស។ អាជ្ញាធរត្រូវបានបញ្ជាឱ្យពង្រឹងការត្រួតពិនិត្យ និងបង្ក្រាបលើការរំលោភបំពាន ដូចជាការប្តូរ និងផ្ទេររូបិយប័ណ្ណបរទេសដោយគ្មានការអនុញ្ញាត ព្រមទាំងការទិញ និងលក់ដុំមាសដោយគ្មានអាជ្ញាប័ណ្ណ៕

Related Topics: