សេដ្ឋកិច្ច

ចិននាំចូលឧបករណ៍ផលិតបន្ទះឈីបពាក់កណ្ដាលពីជប៉ុន ដោយសារអាមេរិករឹតត្បឹត

បានផុស

២ years មុន

នៅ

ថ្ងៃពុធ ១២ មិថុនា ២០២៤

ដោយ

ឧបករណ៍ផលិតបន្ទះឈីបរបស់ជប៉ុនរួមចំណែកប្រហែល ៥០ ភាគរយនៃការនាំចូលរបស់ប្រទេសចិនសរុបនៅត្រីមាសទី១ឆ្នាំនេះ ខណៈតម្រូវការឧបករណ៍មិនសូវទំនើបកើនឡើង ដោយសារតែការរឹតត្បឹតពាណិជ្ជកម្មបន្ទះឈីបទំនើបរបស់សហរដ្ឋអាមេរិកលើចិន។ នេះបើតាមការចុះផ្សាយរបស់កាសែត Nikkei Asia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពាណិជ្ជកម្មរបស់ជប៉ុន បានបង្ហាញថា ចិនរួមចំណែកលើពាក់កណ្តាលនៃការនាំចេញរបស់ជប៉ុន នូវឧបករណ៍ផលិតបន្ទះឈីប គ្រឿងបន្លាស់សម្រាប់ឧបករណ៍នេះ ក៏ដូចជាឧបករណ៍សម្រាប់ផលិតអេក្រង់រាបស្មើ។

តម្លៃនៃការនាំចេញទាំងនេះទៅកាន់ប្រទេសចិន បានកើនឡើង ៨២ ភាគរយក្នុងត្រីមាសទី១ឆ្នាំនេះ ដល់ ៣,៣២ ប៊ីលានដុល្លារ ដែលនេះជាតួលេខខ្ពស់បំផុតនៅក្នុងទិន្នន័យរាប់តាំងពីឆ្នាំ ២០០៧ មក។

កាលពីខែកក្កដាឆ្នាំមុន ជប៉ុនបានចាប់ផ្តើមទាមទារការយល់ព្រមពីក្រសួងពាណិជ្ជកម្ម ដើម្បីបញ្ជូនឧបករណ៍ផលិតសម្រាប់ឧបករណ៍អេឡិចត្រូនិកទំនើបៗ ទៅកាន់គោលដៅផ្សេងៗក្រៅពីប្រទេសជាមិត្ត។

ការកើនឡើងនៃការនាំចេញទៅកាន់ប្រទេសចិន កើតឡើងដោយសារការសម្រុកទិញរបស់ចិនក្រោមការរឹតត្បឹតដឹកនាំដោយអាមេរិក។ ប្រទេសនេះបាននាំចូលឧបករណ៍ផលិតបន្ទះឈីបចំនួន ៥,២ ប៊ីលានដុល្លារកាលពីខែកញ្ញា ឆ្នាំមុន ដោយកើនឡើងប្រហែលពាក់កណ្តាល ធៀបនឹងរយៈពេលដូចគ្នាឆ្នាំ ២០២២។ នេះបើតាមទិន្នន័យគយចិន ដែលបង្ហាញថា ការទិញពីប្រទេសជប៉ុន និងហូឡង់កើនឡើង។

ទិន្នន័យរដ្ឋាភិបាលចិន បង្ហាញពីការនាំចូលប្រចាំខែសម្រាប់ប្រភេទមុខទំនិញដដែល បន្តកើនឡើងដល់ខែមេសា ទៀត ក្នុងទំហំប្រហែល ៤ ប៊ីលានដុល្លារ។

លោក Kazuma Kishikawa អ្នកជំនាញមកពីវិទ្យាស្ថានស្រាវជ្រាវ Daiwa បានថ្លែងថា៖ «ក្រុមហ៊ុនផលិតរបស់ចិន ដែលមិនអាចប្រើឧបករណ៍ផលិតបន្ទះឈីបទំនើប កំពុងប្តូរទៅផលិតបន្ទះឈីបដែលប្រើជាទូទៅ»។

គួរគូសបញ្ជាក់ថា ពាណិជ្ជកម្មបន្ទះឈីបជាធម្មតាមានវដ្តឡើងចុះ ដែលមានរយៈពេលពី ៣-៤ ឆ្នាំ។ ទីផ្សារពិភពលោក បានធ្លាក់ចុះនៅក្នុងពាក់កណ្តាលចុងក្រោយឆ្នាំ ២០២២ ដោយសារតែភាពចលាចលក្រោយវិបត្តិកូវីដ ប៉ុន្តែឥឡូវនេះបង្ហាញសញ្ញាពន្លកចេញពីចំណុចបាតមកវិញ។ ក្នុងរយៈពេល៣ ខែដើមឆ្នាំនេះ ការនាំចេញបន្ទះឈីបជប៉ុន បានកើនឡើង ១៣ ភាគរយ ធៀបនឹងត្រីមាសមុន ដែលជាការកើនឡើងលើកដំបូងក្នុងរយៈពេល៥ត្រីមាស៕

Related Topics: