សេដ្ឋកិច្ច

ថៃរំពឹងការសន្យាវិនិយោគជាង ២០ ប៊ីលានក្នុងឆ្នាំ ២០២៤ នេះ

បានផុស

២ years មុន

នៅ

ថ្ងៃសុក្រ ១៤ មិថុនា ២០២៤

ដោយ

រដ្ឋាភិបាលថៃបានឱ្យដឹងនាថ្ងៃសុក្រនេះថា ប្រទេសថៃរំពឹងថានឹងទទួលបានការសន្យាសម្រាប់ការវិនិយោគសរុបជាទឹកប្រាក់យ៉ាងហោចណាស់ ៨០០ ប៊ីលានបាត (២១,៧៨ ប៊ីលានដុល្លារ) ក្នុងឆ្នាំ ២០២៤ ខណៈប្រទេសនៅតែបន្តស្វែងរកការទាក់ទាញវិនិយោគិនបន្ថែមទៀត ដើម្បីជួយស្តារសេដ្ឋកិច្ចឡើងវិញ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរដ្ឋាភិបាល តម្លៃវិនិយោគដែលមាននៅក្នុងពាក្យស្នើសុំក្នុងត្រីមាសទី១នៃឆ្នាំ ២០២៤ បានកើនឡើងដល់ ២២៨ ប៊ីលានបាត ស្មើនឹង ៣១ ភាគរយ ធៀបនឹងរយៈពេលដូចគ្នាកាលពីឆ្នាំមុន ។ ក្នុងឆ្នាំ ២០២៣ កន្លងទៅ ការសន្យាវិនិយោគសរុប មានចំនួន ៨៤៨ ប៊ីលានបាត ដោយកើនឡើង ៤៣ ភាគរយ ធៀបនឹងឆ្នាំ ២០២២ និងមានចិនជាប្រទេសនាំមុខលើការវិនិយោគ។

រដ្ឋាភិបាលថៃ បាននិយាយថា ខ្លួនបានត្រៀមខ្លួនជាស្រេចដើម្បីសម្រួលដល់អ្នកវិនិយោគ។

ជាមួយគ្នានេះ នាយករដ្ឋមន្ត្រីថៃ លោក សេដ្ឋា ថាវីស៊ីន បានថ្លែងនៅលើបណ្ដាញសង្គម X នាថ្ងៃសុក្រនេះថា របៀបវារៈមួយរបស់រដ្ឋាភិបាលខ្ញុំ គឺការជំរុញការវិនិយោគផ្ទាល់ពីបរទេស ជាពិសេសតាមរយៈការធ្វើឱ្យប្រសើរឡើងនូវភាពងាយស្រួលនៃការធ្វើអាជីវកម្មនៅក្នុងប្រទេស»។

ក្នុងសេចក្តីថ្លែងការណ៍ដាច់ដោយឡែក រដ្ឋាភិបាលថៃបាននិយាយថា ក្រុមហ៊ុន AstraZeneca (នៅថៃ) គ្រោងនឹងវិនិយោគចំនួន ៦,២ ប៊ីលានបាតក្នុងប្រទេសក្នុងរយៈពេល ៣ ឆ្នាំ ដោយចាប់ផ្តើមនៅឆ្នាំ ២០២៤ ហើយខ្លួនបានត្រៀមខ្លួនរួចរាល់ហើយ ដើម្បីពិភាក្សាអំពីកិច្ចសហប្រតិបត្តិការបន្ថែមទៀតនៅក្នុងវិស័យវិទ្យាសាស្ត្រ និងការច្នៃប្រឌិត។

ជាមួយគ្នានេះផងដែរ ក្រុមប្រឹក្សាវិនិយោគថៃ (BOI) បាននិយាយនៅថ្ងៃសុក្រដដែលថា ខ្លួនបានអនុម័តគម្រោងចំនួន៨ ដែលមានតម្លៃសរុប ៥៧ ប៊ីលានបាត រួមទាំងគម្រោងរោងចក្រជីវអេទីឡែន។ BOI បាននិយាយបន្តក្នុងសេចក្តីថ្លែងការណ៍ថា ការលើកទឹកចិត្តថ្មី ក៏ត្រូវបានអនុម័តផងដែរសម្រាប់អ្នកផលិតគ្រឿងបន្លាស់រថយន្ត ដែលវិនិយោគដើម្បីបង្កើនបច្ចេកវិទ្យា និងផលិតភាពរបស់ពួកគេ ឬដើម្បីផ្លាស់ប្តូរប្រតិបត្តិការរបស់ពួកគេ ដើម្បីបម្រើឧស្សាហកម្មថ្មីៗ ដូចជាបរិក្ខារពេទ្យ ឬវិស័យអាកាសចរណ៍ជាដើម៕

Related Topics: