សេដ្ឋកិច្ច

តម្លៃប្រេងសកលកើនឡើង ដោយអ្នកជំនាញចង្អុលទៅបញ្ហាភូមិសាស្រ្តនយោបាយ និងតម្រូវការនៅអាមេរិក

បានផុស

២ years មុន

នៅ

ថ្ងៃពុធ ១៩ មិថុនា ២០២៤

ដោយ

តម្លៃប្រេងឆៅសកលបានកើនឡើងលើសពី១ភាគរយកាលពីថ្ងៃអង្គារ ដោយអ្នកសេដ្ឋកិច្ចផ្សារភ្ជាប់ការណ៍នេះ ទៅនឹងការកើនឡើងនៃភាពតានតឹងភូមិសាស្រ្តនយោបាយនៅអឺរ៉ុប និងនៅមជ្ឈិមបូព៌ា ដែលដើរទន្ទឹមគ្នាជាមួយនឹងការរំពឹងទុកនៃកំណើនតម្រូវការប្រេងឥន្ធនៈនៅអាមេរិកនារដូវក្ដៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រេងឆៅនាពេលអនាគតម៉ាក WTI បានជួញដូរនៅតម្លៃ ៨១,៥៧ ដុល្លារ/បារ៉ែលនាថ្ងៃអង្គារ ដោយកើនឡើង ១,២៤ ដុល្លារ ឬ ១,៥៤ ភាគរយ ធៀបនឹងការជួញដូរកាលពីថ្ងៃចន្ទ។ ចំណែកឯប្រេងឆៅម៉ាក Brent វិញ ជួញដូរនៅតម្លៃ ៨៥,៣៣ ដុល្លារ/បារ៉ែល ដោយកើនឡើង ១,០៨ ដុល្លារ ឬ ១,២៨ ភាគរយ។

តម្លៃប្រេងសកលកើនឡើង ចំពេលដែលស្ថានភាពភូមិសាស្រ្តនយោបាយនៅអឺរ៉ុប និងមជ្ឈិមបូព៌ាបន្តតានតឹង។ កាលពីថ្ងៃអង្គារនេះ អ៊ុយក្រែនបានវាយប្រហារដោយដ្រូនលើកំពង់ផែរុស្ស៊ី Azov ដែលជាទីស្ដុកប្រេងនាំចេញចំនួន ២ ដែលនាំចេញប្រេង ២២០ ០០០ តោនក្នុងអំឡុងខែមករា ដល់ខែឧសភា។ លើសពីនេះ ភាពតានតឹងក៏កើនឡើងរវាងក្រុមហេប៊ូឡារបស់លីបង់ និងអ៊ីស្រាអែល ដែលកំពុងមានជម្លោះនៅហ្គាហ្សារួចស្រាប់ទៅហើយនោះ។

អ្នកវិភាគបានគូសភ្ជាប់ហានិភ័យនៃភូមិសាស្រ្តនយោបាយទាំងនេះ ទៅនឹងការកើនឡើងនៃតម្លៃប្រេងឆៅសកល ដោយលើកឡើងថា ទោះបីវាមិនបង្កផលប៉ះពាល់ខ្លាំងលើការផ្គត់ផ្គង់ជាសកលក្ដី ប៉ុន្តែវានៅតែបណ្ដាលឱ្យមានការប្រែប្រួលលឿននៃកំណើនតម្លៃប្រេងឆៅ។

ក្រៅពីនេះ តម្លៃប្រេងឆៅសកលក៏បានកើនឡើងផងដែរ ក្រោយប្រធានធនាគារកណ្តាលទីក្រុងញូវយ៉ក លោក John Williams បាននិយាយថា ធនាគារនឹងទម្លាក់អត្រាការប្រាក់បន្តិចម្តងៗ ប៉ុន្តែមិនបានផ្តល់ពេលវេលាច្បាស់លាស់នោះទេ។ ជាមួយគ្នានេះ វាក៏ពាក់ព័ន្ធផងដែរ ទៅលើការរំពឹងទុកនៃកំណើនតម្រូវការប្រើប្រាស់ប្រេងឥន្ធនៈនៅសហរដ្ឋអាមេរិក ក្នុងអំឡុងរដូវក្ដៅ ពោលគឺជារដូវដែលពលរដ្ឋអាមេរិក ធ្វើដំណើរច្រើន៕

Related Topics: