សេដ្ឋកិច្ច

អតីតប្រធានអ្នកវិទ្យាសាស្ត្ររបស់ OpenAI បើកក្រុមហ៊ុន AI ថ្មី

បានផុស

២ years មុន

នៅ

ថ្ងៃព្រហស្បតិ៍ ២០ មិថុនា ២០២៤

ដោយ

សហស្ថាបនិក និងអតីតប្រធានអ្នកវិទ្យាសាស្ត្រក្រុមហ៊ុនបញ្ញាសិប្បនិម្មិត OpenAI លោក Ilya Sutskever បានឱ្យដឹងកាលពីថ្ងៃពុធថា លោកកំពុងចាប់ផ្តើមបើកក្រុមហ៊ុនបញ្ញាសិប្បនិម្មិត (AI) ថ្មីមួយ ដោយចូលដៃគ្នាជាមួយអ្នកវិទ្យាសាស្រ្តបច្ចេកវិទ្យាប៉ុន្មានរូបទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការប្រកាសរបស់លោកនៅលើបណ្ដាញសង្គម X ក្រុមហ៊ុនថ្មីនោះមានឈ្មោះថា Safe Superintelligence Inc. (SSI) និងជាកន្លែងស្រាវជ្រាវ AI ផ្ដោតលើការបង្កើតបរិយាកាស AI ប្រកបដោយសុវត្ថិភាព ខណៈក្រុមហ៊ុនបច្ចេកវិទ្យាធំៗមួយចំនួន កំពុងស៊កខ្លួនប្រឡូកចូលក្នុងការរីកសាយភាយនៃ AI ដែលមានមុខងារបង្កើត (Generative AI)។

កំណត់ត្រាលើគេហទំព័ររបស់ SSI មានសរសេរយ៉ាងដូច្នេះថា ការបង្កើតឱ្យមានអង្គបច្ចេកវិទ្យាដ៏ឆ្លាតវៃហួសដែនកំណត់របស់មនុស្សប្រកបដោយសុវត្ថិភាព «គឺជាបញ្ហាបច្ចេកទេសដ៏សំខាន់បំផុតនៃពេលវេលារបស់យើង»។ ដូច្នេះ SSI មានគោលបំណង និងផលិតផលតែមួយគត់ គឺធ្វើឱ្យបរិយាកាស AI ប្រកបដោយសុវត្ថិភាព។

កំណត់ត្រាបន្តថា៖ «យើងជាក្រុមហ៊ុនអាមេរិកដែលមានការិយាល័យនៅក្រុង Palo Alto (អាមេរិក) និងក្រុង Tel Aviv (អ៊ីស្រាអែល) ជាកន្លែងដែលយើងមានឫសគល់យ៉ាងជ្រៅ និងសមត្ថភាពក្នុងការជ្រើសរើសអ្នកបច្ចេកទេសកំពូលៗ។

គួរគូសបញ្ជាក់ថា ក្នុងការបង្កើត SSI លោក Sutskever បានចាប់ដៃជាមួយអតីតអ្នកស្រាវជ្រាវរបស់ក្រុមហ៊ុន OpenAI លោក Daniel Levy រួមជាមួយសហស្ថាបនិកអតីតកម្មវិធីស្វែងរក (Search Engine) Cue និងអតីតអ្នកដឹកនាំផ្នែក AI នៅក្រុមហ៊ុន Apple លោក Daniel Gross៕

Related Topics:AI