កម្ពុជាទទួលបានជើងហោះហើរជាង ១ ម៉ឺនជើង នៅឆមាសទី១ ឆ្នាំ ២០២៤

នៅក្នុងឆមាសទី១ ឆ្នាំ ២០២៤ កម្ពុជាទទួលបានជើងហោះហើរអន្តរជាតិសរុប ១២ ៣៨៦ ជើង ដែលមានមនុស្សចំនួន ១,១៥ លាននាក់ (១ ១៥១ ៨៩០) កើនឡើង ២៦ ភាគរយ ​ក្នុង​នោះ​​អាកាសយានដ្ឋាន​អន្តរ​ជាតិភ្នំពេញ ៨៩៦០ ជើង អាកាសយានដ្ឋានសៀមរាបអង្គរ ៣ ២១៤ ជើង និងអា​កាស​យាន​ដ្ឋានអន្តរជាតិព្រះសីហនុ ២១២ ជើង។ នេះបើយោង​តាមរបាយ​ការណ៍​​របស់​ក្រសួង​ទេស​ចរណ៍។

ជើងហោះហើរអន្តរជាតិចូលឆមាសទី១ ឆ្នាំ២០២៤ សរុប ១២ ៣៨៦ ជើង(៤៨០ ទៅ ៤៩០ ជើង/សប្តាហ៍)និងមានក្រុមហ៊ុនអាកាសចរណ៍ចំនួន ៣១ក្រុមហ៊ុន កំពុងដំណើរការ ក្នុងនោះ ៖ អាកាសយានដ្ឋានអន្តរជាតិភ្នំពេញ (PHN): ៨ ៩៦០ ជើង (៣៣០ ទៅ ៣៥០ ជើង/សប្តាហ៍); អាកាសយានដ្ឋានអន្តរជាតិសៀមរាបអង្គរ (SAI): ៣ ២១៤ ជើង (១២០ ទៅ ១៣០ ជើង/សប្តាហ៍); និងអាកាសយានដ្ឋានអន្តរជាតិព្រះសីហនុ (KOS): ២១២ ជើង (៧ ជើង/សប្តាហ៍)។

លោក ​ហូ វណ្ឌី ​ទីប្រឹក្សា​សមាគម​ទេសចរណ៍​កម្ពុជា​ ប្រាប់កម្ពុជាថ្មីនៅថ្ងៃទី ២៤ ខែកក្កដា ឆ្នាំ ២០២៤ នេះថា អ្នកដំណើរមានកំណើនតាម​ជើងហោះ​ហើរភាគច្រើននៅប្រទេសជាប់ភូមិផងរបងកម្ពុជា ដូចជាប្រទេសថៃ និងប្រទេស​វៀត​ណាម។

ប្រធាន​សមាគមមគ្គុទេសក៏ទេសចរ​អង្គរ លោក ខៀវ ធី បានឱ្យដឹងដែរថា ​កំណើនអ្នកធ្វើដំណើរ​តាមផ្លូវ​អាកាស​ ជាសញ្ញាវិជ្ជមានសម្រាប់វិស័យទេសចរ​នៅកម្ពុជា ​ដែលអាច​ជួយទៅដល់​ប្រជា​ជន​​ក្នុងស្រុក ឱ្យមានការងារធ្វើ ​រាប់ចាប់តាំងពីអ្នកបើកបរ ​មគ្គុទេសទេសចរ អ្នកលក់ដូរ ​សណ្ឋា​គារផ្ទះសំណាក់ ​ហើយក៏បានផល​ទៅដល់អ្នកដាំដុះ ចិញ្ចឹមសត្វផងដែរ ខណៈរដ្ឋាភិបាលក៏​បាន​ពន្ធពី​គ្រប់វិស័យទាំងអស់នោះដែរ។​

យោងតាមរបាយការណ៍របស់ក្រសួងទេសចរណ៍ នៅក្នុងឆមាសទី១ ឆ្នាំ ២០២៤ នេះ កម្ពុជាទទួលបានភ្ញៀវអន្តរជាតិសរុបចំនួនជាង ៣,១៦ លាន​​​នាក់ (៣ ១៦៦ ៤៩៧) មានការកើនឡើង ២២,៧% ធៀបនឹង​រយៈពេល​ដូច​គ្នានៅឆ្នាំ​២០២៣។

ក្នុងចំណោមទេសចរជាង ៣,១៦ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ៩៥៥ ២៥០ នាក់ កើន ៩,៧% វៀតណាមចំនួន ៦៣៩ ៥៤៩ នាក់ កើន ៣៨% ចិន ៣៨៩ ៣៦០ នាក់ កើន ៤៥,២% ឡាវ ១៨៨ ៧២៦ កើន​៣៤,៤% អាមេរិក ១១២ ០៤៣ កើន ១៥,៧%៕

អត្ថបទ៖ ឡេង ដេត