ម្ចាស់ចម្ការដូងនៅខេត្តកំពង់ស្ពឺ ត្រៀមនាំចេញដូងទៅទីផ្សារចិន

លោក តៃ ចាន់តារា ម្ចាស់ចម្ការដូងនៅឃុំជម្ពូព្រឹក ស្រុក​សាមគ្គី​មុនី​ជ័យ ខេត្តកំពង់ស្ពឺ បានឱ្យដឹង​ថា ​ទី​ផ្សារ​ដូងដែលលោកលក់ផ្គត់ផ្គង់ក្នុងស្រុកមានស្ថានភាពល្អប្រសើរ ខណៈលោក​រក​ដូង​លក់​មិន​គ្រប់ត​ម្រូវការ​បញ្ជាទិញ។ ​

លោក តៃ ចាន់តារា ​មានផ្ទៃដីដាំដូង ២០ ហិកតា ​បានឱ្យដឹងថា ​បច្ចុប្បន្ន​ចម្ការ​របស់ខ្លួន ​ផ្គត់ផ្គង់តែទីផ្សារក្នុងស្រុក ខណៈចម្ការរបស់លោកសហការជាមួយក្រុមហ៊ុន Rich Farm ដែលជាក្រុមហ៊ុនជាប់ឈ្មោះនាំចេញផ្លែដូងទៅប្រទេសចិន។ ចម្ការរបស់លោក​ បានត្រៀម​ខ្លួនរួចរាល់ ក្នុងការផ្គត់ផ្គង់ផ្លែដូងទៅប្រទេសចិន។

លោក តៃ ចាន់តារា បញ្ជាក់ថា ក្នុងចំណោម ២០ ហិកតា បច្ចុប្បន្នឱ្យផលតែ ៦ ហិកតា ខណៈ​នៅសល់នឹងឱ្យផលបណ្ដើរៗ នៅពេលខាងមុខ ហើយលោកលក់តែនៅក្នុងស្រុក ដោយ​ក្រសួង​កសិកម្មក៏បានចុះវាយតម្លៃចម្ការដូងរបស់លោកក្នុងការទទួលនាំចេញ​ទៅទីផ្សារ​ចិន​ផង​ដែរ។

កាលពីរដូវប្រមូលផលកន្លងទៅ លោកបេះលក់ផ្គត់ទីផ្សារក្នុងស្រុកបានប្រមាណ ៦០០ ទៅ ១ ពាន់ផ្លែ ក្នុងតម្លៃ ២០០០ រៀល ក្នុងមួយផ្លែ។

គិតត្រឹមឆ្នាំ២០២៣ នៅប្រទេសកម្ពុជា មានផ្ទៃដីដាំដុះដំណាំដូងចំនួនជិត ២ ម៉ឺនហិកតា (១៩.៩៩៨) ក្នុងនោះផ្ទៃដីប្រមូលផលមានចំនួន ១ ម៉ឺន ៤ ពាន់ហិកតា ស្មើនឹង ៧១%។ ទិន្នផលសរុបនៅឆ្នាំ ២០២៣ ទទួលបាន ២៥ ម៉ឺន ៨ ពាន់តោន កើនឡើង ២.៤%៕

អត្ថបទ៖ ឡេង ដេត