សេដ្ឋកិច្ច

លោក ឃឹម ប៊ុនឡែន៖ ការដឹកជញ្ជូនតាមផ្លូវអាកាស នឹងជួយរក្សារសជាតិទុរេនខ្មែរកាន់តែខ្ពស់

បានផុស

១១ ខែ មុន

នៅ

ថ្ងៃអង្គារ ១២ សីហា ២០២៥

ដោយ

ស្ថាបនិក និងជានាយកប្រតិបត្តិ សហគមន៍ចម្ការស្តេចទុរេន លោក ឃឹម ប៊ុនឡែន បានឱ្យដឹងថា ការបើកឱ្យមានការដឹកជញ្ជូនទុរេនតាមជើងយន្តហោះ ទៅកាន់ទីផ្សារប្រទេសចិន គឺពិតជាមានលក្ខណៈល្អប្រសើរខ្លាំង ដែលអាចជួយរក្សាគុណភាព និងរសជាតិទុរេនខ្មែរកាន់តែខ្ពស់ ព្រោះទុរេនជាផលិតផលមួយដែលងាយនិងខូចខាតប្រសិនបើប្រើពេលនៅក្នុងការដឹកជញ្ជូនយូរពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងមកកាន់«កម្ពុជាថ្មី» នៅព្រឹកថ្ងៃទី១២ ខែសីហា ឆ្នាំ២០២៥ នេះ លោក ឃឹម ប៊ុនឡែន បានលើកឡើងថា៖«ទុរេនខ្មែរយើង មានគុណភាពល្អស្រាប់ហើយ ប៉ុន្តែប្រសិនបើការដឹកជញ្ជូនចំណាយពេលយូរពេក ក៏អាចធ្វើឱ្យគុណភាពទុរេនមានការបាត់បងដូចគ្នាដែរ ដូច្នេះការដឹកជញ្ជូនតាមយន្តហោះ ជាមធ្យោបាយមួយល្អបំផុត ដែលអាចធានាបាននូវគុណភាពរស់ជាតិទុរេនខ្មែរ និងអាចទទួលបាននូវទុរេនដែលមានគុណភាពខ្ពស់»។

លើសពីនេះទៀត លោកថា ចំពោះការដឹកជញ្ជូនតាមយន្តហោះនេះទៀតសោត គឺយើងអាចកាត់ទុរេនស្រគាល ឬមានកម្រិតទុំខ្ពស់ ដែលទុកត្រឹមរយៈពេល ៣-៤ ថ្ងៃទុំ នោះរសជាតិរបស់ទុរេនកាន់តែឆ្ងាញ់។ ដោយឡែកសម្រាប់ការដឹកជញ្ជូនតាមផ្លូវទឹក ឬផ្លូវគោក គឺយើងកាត់ទុរេន ដែលកម្រិតទុំនៅមានទាប ដែលបញ្ហានេះ ក៏អាចធ្វើឱ្យទុរេនខ្មែរបាត់បង់រសជាតិផងដែរ។

ជាមួយគ្នានេះ លោកក៏បានបញ្ជាក់ដែរថា ក្រៅតែពីទីផ្សារប្រទេសចិន ក៏មានការចាប់អារម្មណ៍ច្រើនពីអាមេរិក កាណាដា អូស្ត្រាលី ញូសេឡែន អឺរ៉ុប បារាំងជាដើម ចាប់ផ្តើមទាក់ទងមកជាបន្តបន្ទាប់ ជាពិសេសប្រជាពលរដ្ឋខ្មែរដែលរស់នៅទីនោះ ដែលចង់ទទួលទានទុរេនខ្មែរ។

ទន្ទឹមនេះ លោកក៏បានបញ្ជាក់ផងដែរពីការពង្រីកការដាំដុះទុរេនបន្ថែមទៀតចន្លោះពី ១ពាន់ តៅ ២ពាន់ដើម ដើម្បីអាចឆ្លើយតបទៅនិងផែនការរបស់រាជរដ្ឋាភិបាលក្នុងការបើកទីផ្សារនាំចេញទៅកាន់ប្រទេសចិននេះ។

សូមរំលឹកថា កាលពីខែកក្កដា កន្លងទៅនេះ កម្ពុជាទទួលបានការអនុញ្ញាតជាផ្លូវការពីរដ្ឋបាលទូទៅគយចិន (GACC) ដើម្បីចាប់ផ្តើមនាំចេញទុរេនស្រស់ដោយផ្ទាល់ទៅកាន់ទីផ្សារប្រទេសចិន បន្ទាប់ពីបានចុះហត្ថលេខាលើពិធីសារកាលពីខែមេសា។

ជាក់ស្តែង កាលពីថ្ងៃទី០៩ ខែសីហារ កម្ពុជាបានចាប់ផ្ដើមដឹកជញ្ជូនទុរេនស្រស់តាមរយៈក្រុមហ៊ុន Air Cambodia ចំនួន ២ តោន ដំបូងទៅកាន់ខេត្តហេណាន ទៅកាន់ប្រទេសចិន ដោយមធ្យោបាយធ្វើដំណើរតាមអាកាសនេះត្រូវការពេលតែ ៤ ម៉ោងប៉ុណ្ណោះ។ ធុរេន ជាផ្លែឈើស្រស់ទី៥ របស់កម្ពុជា ដែលទទួលបានទីផ្សារប្រទេសចិនដោយផ្ទាល់ បន្ទាប់ពីចេក ស្វាយ មៀន និងដូង។

បច្ចុប្បន្នកសិផលកម្ពុជាចំនួន៩ ត្រូវបានអនុញ្ញាតឱ្យនាំចេញទៅកាន់ទីផ្សារប្រទេសចិន រួមមាន អង្ករ និងអង្កាម ស្វាយចន្ទី ចេក ដំឡូងមី ម្ទេស ស្វាយ វែង ពោត និងដូង។ សមិទ្ធិផលនេះ បានឆ្លុះបញ្ចាំងពីកិច្ចសហប្រតិបត្តិការដ៏រឹងមាំ និងមានប្រសិទ្ធភាពរវាងប្រទេសទាំងពីរ៕

ដោយ៖ ឌិន ថារី