ព័ត៌មានអន្ដរជាតិ

ការនាំចេញថៃប្រចាំខែកក្កដា កើនឡើងជាង ១៥ ភាគរយ ខ្ពស់បំផុតក្នុងរយៈពេល ២៨ ខែ

បានផុស

២ years មុន

នៅ

ថ្ងៃពុធ ២៨ សីហា ២០២៤

ដោយ

ក្រសួងពាណិជ្ជកម្មថៃ បានឱ្យដឹងកាលពីថ្ងៃអង្គារថា ការនាំចេញរបស់ប្រទេសថៃប្រចាំខែកក្កដា បានកើនឡើង ១៥,២ ភាគរយ ធៀបនឹងរយៈពេលដូចគ្នាកាលពីឆ្នាំមុន ដោយសារតែកំណើននៃតម្រូវការក្នុងបណ្ដាទីផ្សារនាំចូលពេលអតិផរណាពិភពលោកធ្លាក់ចុះ។ នេះបើតាមការចុះផ្សាយរបស់កាសែត The Nation ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្មរបស់ក្រសួង លោក Poonpong Naiyanapakorn បាននិយាយថា តម្លៃនៃការនាំចេញគិតតែក្នុងខែកក្កដា បានឈានដល់ ២៥,៧២ ប៊ីលានដុល្លារ ដែលនេះជាកម្រិតខ្ពស់បំផុតរាប់តាំងពីខែមីនា ឆ្នាំ ២០២២។ ទោះបីជាមិនរាប់បញ្ជូលនូវប្រេង មាស និងអាវុធ ក៏ការនាំចេញរបស់ថៃនៅតែកើនឡើង ៩,៣ ភាគរយ ក្នុងអត្រាប្រចាំឆ្នាំផងដែរ។

លោក Poonpong បាននិយាយថា កំណើនការងារ និងប្រាក់ឈ្នួលក្នុងប្រទេសនាំចូល បានរួមចំណែកដល់ការស្ទុះងើបឡើងវិញនៃអំណាចទិញរបស់អ្នកប្រើប្រាស់ ដែលនាំឱ្យការនាំចេញរបស់ថៃមានកំណើនជាវិជ្ជមាន។

ការនាំចេញផលិតផលកសិកម្ម និងឧស្សាហកម្ម រួមមានកៅស៊ូ អង្ករ សាច់មាន់ស្រស់ និងទឹកកក អាហារសមុទ្រកំប៉ុង និងកែច្នៃ ប្រេងឥន្ធនៈ កុំព្យូទ័រ និងម៉ាស៊ីនត្រជាក់ បានកើនឡើង។ ប៉ុន្តែការនាំចេញផ្លែឈើស្រស់ និងក្លាសេ ដំឡូងមី ស្ករ ភេសជ្ជៈ រថយន្ត សៀគ្វីអគ្គិសនី និងឧបករណ៍អេឡិចត្រូនិក បានធ្លាក់ចុះ។

បើគិតក្នុងរយៈពេល៧ខែដំបូងដើមឆ្នាំនេះ ការនាំចេញរបស់ថៃមានប្រមាណ ១៧១,០១ ប៊ីលានដុល្លារ កើនឡើង ៣,៨ ភាគរយ ក្នុងអត្រាប្រចាំឆ្នាំ។ យ៉ាងណាមិញ ថៃនៅតែប្រឈមមុខនឹងឱនភាពពាណិជ្ជកម្មប្រមាណ ៦,៦១ ប៊ីលានដុល្លារ ដោយការនាំចូលក្នុងរយៈពេល៧ខែដដែល មានប្រមាណរហូតដល់ ១៧៧,៦២ ប៊ីលានដុល្លារ។

លោក Poonpong រំពឹងថា នឹងមានការងើបឡើងវិញបន្តិចម្តងៗនៅក្នុងការនាំចេញរបស់ថៃ ស្របតាមការស្ទុះងើបឡើងវិញនៃសេដ្ឋកិច្ច និងពាណិជ្ជកម្មពិភពលោក ក៏ដូចជាសញ្ញានៃការងើបឡើងវិញនៃផលិតកម្មសកល។ ប៉ុន្តែហានិភ័យដែលអាចដាក់សម្ពាធលើការនាំចេញនៅតែមាន ដូចជាជម្លោះភូមិសាស្ត្រនយោបាយ និងភាពមិនច្បាស់លាស់នៅក្នុងគោលនយោបាយសេដ្ឋកិច្ច និងពាណិជ្ជកម្ម បន្ទាប់ពីការបោះឆ្នោតតាមបណ្ដាប្រទេសសំខាន់ៗមួយចំនួន៕