ធនាគារជាតិឱ្យស្ថានប័នផ្ដល់ប្រាក់កម្ចី ប្រគល់ ឯក​សារបញ្ចាំ ជូនអតិថជនវិញយ៉ាងយូរ ៧ ថ្ងៃ ក្រោយបង់ផ្ដាច់

ធនាគារជាតិនៃកម្ពុជានៅថ្ងៃទី ២៣ ខែកញ្ញា ឆ្នាំ ២០២៤ បានណែនាំឱ្យគ្រឹះស្ថានធនាគារ និងហិរញ្ញវត្ថុ ប្រគល់ឯកសារទ្រព្យធានា ជូនអតិថិជនវិញ យ៉ាងយូរត្រឹម ៧ ថ្ងៃ ក្រោយការទូទាត់សងផ្ដាច់។

សារាចរណ៍ណែនាំរបស់ធនាគារជាតិនៃកម្ពុជា បញ្ជាក់ថា៖ «ក្នុងគោលបំណងរួមចំណែកដល់ការរក្សាទំនុកចិត្តរបស់អតិ​ថិជនចំពោះប្រព័ន្ធ ធនាគារជាតិនៃកម្ពុជា សូមណែនាំដល់គ្រឹះស្ថានធនាគារ និងហិរញ្ញវត្ថុទាំងអស់​ឱ្យផ្តល់វិញ្ញាបនបត្រសម្គាល់ម្ចាស់អចលនវត្ថុ ឬបណ្ណសម្គាល់សិទ្ធិកាន់កាប់អចលនវត្ថុ ដែលជាទ្រព្យធានានៅគ្រឹះ​ស្ថានធនាគារ និងហិរញ្ញវត្ថុ និងលិខិតបញ្ជាក់ពីការរួចបំណុល ជូនអតិថិជនក្នុងរយៈពេលយ៉ាងយូរ ០៧ ថ្ងៃ បន្ទាប់ពីអតិថិជនបានបំពេញកាតព្វកិច្ចទូទាត់សងឥណទានចប់ជាស្ថាពរ»។

នៅក្នរយៈពេល ៧ ខែ ចាប់ពីខែមករា ដល់ខែកក្កដា ឆ្នាំ ២០២៤ សមាគមធនាគារនៅ​កម្ពុជា​ទទួល​បណ្ដឹងចំនួន ១១៧ ករណី ក្នុងនោះបានដោះស្រាយ និងសម្របសម្រួល​រួចរាល់​ចំនួន ៩៩​ ករណី។

លោក សុខ ចាន់ នាយកបរិយាបន្នហិរញ្ញវត្ថុ និងទំនាក់ទំនងសារធារណៈ​នៃសមាគមធនា​គារ​នៅ​កម្ពុជា បានឱ្យដឹងថា ករណីបណ្តឹងទាំងនេះភាគច្រើនគឺពាក់ព័ន្ធនឹងការស្នើសុំបង់ផ្តាច់, ការ​ដក​ទ្រព្យ​ធានា​ឥណ​ទាន, សមត្ថភាពនៃ​ការ​បង់​សងត្រឡប់ឥណទាន, ការស្នើសុំអនុគ្រោះ និង​ការ​ការស្នើសុំរៀបចំឥណទានឡើងវិញ។

លោក សុខ ចាន់ បញ្ជាក់ថា បន្ទាប់ពីសមាគមជួយសម្របសម្រួល គ្រឹះស្ថានហិរញ្ញវត្ថុ បានចូល​រួម​សហការក្នុងការដោះស្រាយជាមួយអតិថិជនបានទាន់ពេលវេលា។

យោងតាមរបាយការណ៍របស់ការិយាល័យ​ធានា​ឥណ​ទានកម្ពុជា (CBC) បានបង្ហាញថា គិត​ត្រឹម​​​​រយៈពេល ៣ ខែត្រីមាសទី២ ឆ្នាំ២០២៤ គុណភាពឥណទានរបស់​អាជីវកម្មខ្នាតតូច​មានការ​ធ្លាក់ចុះ ជាមួយនឹងការកើនឡើងគណនីប្រាក់កម្ចី និងការសងត្រឡប់យឺតលើសពី ៣០ ថ្ងៃ កើនឡើង​រហូតដល់ជាង ៨%។

យោងតាមរបាយការណ៍របស់ធនាគារជាតិនៃកម្ពុជា (NBC) គិតត្រឹមឆមាសទី១ ឆ្នាំ ២០២៤ មានអតិ​ថិជនប្រមាណ ៥ លាននាក់ កំពុងប្រើប្រាស់កម្ចីពីប្រព័ន្ធធនាគារ និងហិរញ្ញវត្ថុ ក្នុងនោះ​ឥណ​ទាន​​អតិថិជនបានកើន ២,៦% ដែលមានទំហំទឹកប្រាក់ប្រមាណ ៥៨,៩ ប៊ីលានដុល្លារ៕