ព័ត៌មានអន្ដរជាតិ

មេដឹកនាំឥណ្ឌូណេស៊ីថ្មី បញ្ជាឱ្យពន្លឿនការអភិវឌ្ឍដីស្រែ ៣ លានហិចតា បន្ថែម

បានផុស

១ year មុន

នៅ

ថ្ងៃអង្គារ ២៩ តុលា ២០២៤

ដោយ

ប្រធានាធិបតីឥណ្ឌូណេស៊ីថ្មី លោក ប្រាបូវូ ស៊ូប៊ីយ៉ានតូ បានបញ្ជាឱ្យក្រសួងកសិកម្មឥណ្ឌូណេស៊ីពន្លឿនកម្មវិធីអភិវឌ្ឍន៍ផ្ទៃដីស្រែថ្មីចំនួន ៣ លានហិកតា ដើម្បីពង្រឹងសន្តិសុខស្បៀង ខណៈប្រទេសនេះនាំចូលអង្កររាប់លានតោនក្នុងមួយ ឆ្នាំៗ។ នេះបើតាមការចុះផ្សាយរបស់កាសែត Antara កាលពីថ្ងៃចន្ទ។

រដ្ឋមន្ត្រីក្រសួងកសិកម្ម លោក Andi Amran Sulaiman បានលើកឡើងក្រោយកិច្ចប្រជុំជាមួយលោកប្រធានាធិបតី ប្រាបូវូ នៅទីក្រុងហ្សាកាតា កាលពីថ្ងៃចន្ទថា៖ «យើងបានទទួលភារកិច្ចពីប្រធានាធិបតី ឱ្យពន្លឿនការអភិវឌ្ឍដីស្រែដែលយើងបានរៀបចំឡើងនៅខេត្តប៉ាពួខាងត្បូង និងកាលីម៉ាន់តាន់កណ្តាល។

លោករដ្ឋមន្ត្រីបានគូសបញ្ជាក់ផងដែរថា នាពេលអនាគត កម្មវិធីបង្កើតវាលស្រែក៏នឹងមាននៅខេត្តកាលីម៉ាន់តាន់ខាងត្បូង ខេត្តកាលីម៉ាន់តាន់ខាងលិច ខេត្តស៊ូម៉ាត្រាខាងត្បូង និងខេត្តផ្សេងៗទៀតផងដែរ។ លោកបន្ថែមថា រដ្ឋាភិបាលឥណ្ឌូណេស៊ីនឹងរក្សាការយកចិត្តទុកដាក់លើការជួយដល់តម្រូវការសំខាន់ៗរបស់កសិករ ជាពិសេសទាក់ទងនឹងកន្លែងផលិត រួមទាំងជីកសិកម្ម។

អនុរដ្ឋមន្ត្រីក្រសួងកសិកម្មឥណ្ឌូណេស៊ី លោក Sudaryono បានគូសបញ្ជាក់ពីគោលដៅមហិច្ឆិតារបស់រដ្ឋាភិបាលក្នុងការអភិវឌ្ឍន៍ផ្ទៃដីស្រែចំនួន ៣ លានហិកតា ក្នុងរយៈពេលពី ៣ ទៅ ៤ ឆ្នាំ ខណៈការពង្រីកដីស្រែបែបនេះ ធ្វើឡើងដើម្បីបំពេញតម្រូវការស្បៀងក្នុងស្រុក នៅពេលប្រជាជនកើនឡើង ប៉ុន្តែដីស្រែផលិតស្រូវមិនកើនឡើង។

គួរបញ្ជាក់ថា ការពង្រឹងស្បៀងក្នុងស្រុក គឺជាផែនការមួយនៃរដ្ឋាភិបាលថ្មីរបស់លោក ប្រាបូវូ។ គិតត្រឹមតែរយៈពេល ៨ ខែដើមឆ្នាំនេះ ឥណ្ឌូណេស៊ីបាននាំចូលអង្ករប្រមាណ ៣,០៥ លានតោន ក្នុងតម្លៃ ១,៩១ ប៊ីលានដុល្លារ។ ការិយាល័យស្ថិតិបាននិយាយកាលពីដើមខែតុលានេះផងដែរថា ទិន្នផលស្រូវរបស់ឥណ្ឌូណេស៊ីរំពឹងថានឹងធ្លាក់ចុះ ២,៤៣ ភាគរយ នៅឆ្នាំ ២០២៤ មកនៅត្រឹម ៣០,៣៤ លានតោន ដោយសារតែការពន្យារពេលដាំដុះ និងប្រមូលផល ដោយសារគ្រោះរាំងស្ងួតអូសបន្លាយយូរខុសពីធម្មតានៅឆ្នាំមុន៕