រោងចក្រកែច្នៃគ្រាប់ស្វាយចន្ទីរបស់ក្រុមហ៊ុនសិង្ហបុរី CSNC គ្រោងដាក់ឱ្យដំណើរការនៅដើមឆ្នាំ ២០២៥

គម្រោងសាងសង់រោងចក្រកែច្នៃគ្រាប់ស្វាយចន្ទីដ៏ធំនៅកម្ពុជារបស់ក្រុមហ៊ុនសិង្ហបុរី CSNC នៅ​ក្នុង​ខេត្តកំពង់ធំ សម្រេច​​បានការ​សាង​សឹងតែ ១០០% ​នឹងត្រៀមដាក់ឱ្យ​ដំណើរ​ការ​នៅ​ដំ​ណាច់​​ខែកុម្ភៈ ឆ្នាំ ២០២៥ ដែលមានសមត្ថភាពកែច្នៃគ្រាប់ស្វាយចន្ទី ៤០ តោនក្នុងមួយថ្ងៃ។

លោក ស៊ុយ កុកធាន អនុប្រធានសមាគមស្វាយចន្ទីកម្ពុជា ប្រាប់កម្ពុជាថ្មីនៅថ្ងៃទី ០៨ ខែមករា ឆ្នាំ ២០២៥ នេះថា ដំណើរការសាងសង់រោងចក្រកែច្នៃគ្រាប់ស្វាយចន្ទីរបស់ក្រុមហ៊ុនសិង្ហបុរី CSNC គ្រោង​បញ្ចប់នៅដំណាច់ខែកុម្ភៈ ឆ្នាំ ២០២៥ ខាងមុខ។

លោក ស៊ុយ កុកធាន ប្រាប់ថា៖ «ឥឡូវនេះ យើងនៅតែចាក់បេតុងបាតក្រោម និងជញ្ជាំង ដែលការចាក់​បេតុង​នឹងចាប់ផ្ដើម ២ ថ្ងៃទៀត ហើយនៅពេលរោងចក្រដំណើរការ គឺយើង​ប្រមូលទិញ​គ្រាប់​ស្វាយ​ចន្ទីដោយផ្ទាល់ពីសហគមន៍ កសិករ និងអ្នកប្រមូលទិញមួយចំនួន ខណៈរោងចក្រ​នឹង​ធ្វើ​ការ​​កែច្នៃផង និងនាំចេញផង»។

រោងចក្រ CSNC មានសមត្ថភាពកែច្នៃគ្រាប់ស្វាយចន្ទី ៤០ តោនក្នុងមួយថ្ងៃ ឬស្មើនឹង ១ ម៉ឺន ២ ពាន់តោន ក្នុងមួយឆ្នាំ ប៉ុន្តែ ក្រុមហ៊ុននេះ ចង់បន្ថែមការទិញគ្រាប់ពាក់កណ្ដាលសម្រេច​ពីសហ​គ្រាស​ក្នុងស្រុក ដើម្បីយកទៅកែច្នៃ បន្តលក់ទៅក្រៅប្រទេស ដែលក្រុមហ៊ុននេះ មានទីផ្សារ​លក់​រាយ​​នៅប្រទេសចិន និងអឺរ៉ុប។

ក្រុមហ៊ុន CSNC Agriculture Co.,Ltd ជាក្រុមហ៊ុនមកពីប្រទេសសឹង្ហបុរី បានបើកការដ្ឋានសាង​សង់​រោង​ចក្រកែច្នៃគ្រាប់ស្វាយចន្ទីជាមួយទុនវិនិយោគតម្លៃ ១២ លានដុល្លារ ស្ថិតនៅភូមិស្នោ ឃុំត្រពាំងប្ញស្សី ស្រុកកំពង់ស្វាយ ខេត្ត​កំពង់ធំ កាលពីថ្ងៃទី ០៦ ខែធ្នូ ឆ្នាំ ២០២៣។

រោងចក្រ​នេះ សាងសង់​នៅលើ​ផ្ទៃដី​សរុប​ ១៤ ហិកតា​ ដោយមាន​ផ្ទៃដី​ចាក់សាប​ទំហំ ៦​ ហិ​ក​តា និង​ឃ្លាំង​ស្តុក មួយចំនួន ដែល​ត្រូវការ​កម្លាំង​ពលកម្មជិត​ ២០០​ នាក់​។

នៅក្នុងឆ្នាំ ២០២៤ កម្ពុជាផលិតគ្រាប់ស្វាយចន្ទីបានចំនួន ៨៥ ម៉ឺនតោន កើនឡើង២៦.៨% ក្នុង​នោះ​នាំចេញទៅក្រៅប្រទេសចំនួនជាង ៨១ ម៉ឺនតោន គិតជាទឹកប្រាក់ ១,១៥០ ពាន់លានដុល្លារ កើនឡើង៣១% ធៀបនឹងឆ្នាំ ២០២៣​ ដែលមានទឹកប្រាក់ត្រឹមតែ ៨៣៧ លានដុល្លារ។ នេះបើយោងតាមរបាយការណ៍​របស់ស​មាគម​ស្វាយ​ចន្ទី​កម្ពុជា។

យោងតាមក្រសួងកសិកម្ម កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត