TikTok បើក​ដំណើរការ​នៅ​សហរដ្ឋ​អាមេរិកជាថ្មី ក្រោមជំនួយរបស់​ ត្រាំ​ ដែល​ព្យាយាមបិទវេទិកានេះ​កាលពីអាណត្តិមុន

វេទិកាបណ្ដាញ​សង្គម​ TikTok បាន​បើក​ដំណើរការ​ជាថ្មី​នៅ​សហរដ្ឋអាមេរិក​ ត្រឹម​តែ​ប៉ុន្មាន​ម៉ោង​ប៉ុណ្ណោះ​ក្រោយ​បិទដំណើរការ​​ក្រោម​ច្បាប់ហាមឃាត់សហព័ន្ធ​ ដែលចូលជា​ធរមាន​នៅ​ថ្ងៃទី ១៩ មករា (ម៉ោងនៅអាមេរិក​) បន្ទាប់​ពីលោក​ប្រធានាធិបតី​ ដូណាល់ ត្រាំ​ សន្យាចេញ​អធិបញ្ជាបង្វែរច្បាប់ហាមឃាត់ជាបណ្ដោះអាសន្ន។ នេះបើតាម​ការ​ចុះ​ផ្សា​យរបស់​ទីភ្នាក់ងារសារព័ត៌មាន​អន្តរជាតិ​ផ្សេង​ៗ។

ក្នុងសារទៅកាន់អ្នកប្រើ​ប្រាស់​នៅ​សហរដ្ឋ​អាមេរិក​ក្រោយ​បើក​ដំណើរការ​ TikTok បាន​និយាយ​យ៉ាងដូច្នេះថា៖ «ជា​លទ្ធផល​នៃ​កិច្ចប្រឹង​ប្រែង​របស់​ប្រធានាធិបតី ត្រាំ TikTok ត្រឡប់មក​ជាថ្មី​នៅ​សហរដ្ឋ​អាមេរិក​»។

TikTok ក៏​បាន​បង្ហោះ​សារ​នៅ​លើ​បណ្ដាញ​សង្គម X (អតីតធ្វីតធឺរ) ផងដែរ​ថា​៖ «យើង​សូម​អរគុណ​លោកប្រធានាធិបតី ត្រាំ ដែល​បាន​ផ្ដល់​ការ​បញ្ជាក់ចាំបាច់ និង​ការធានា សម្រាប់​អ្នក​ផ្ដល់​សេវាកម្មរបស់​យើង​ផ្សេង​ៗ​ថា​ ពួកគេ​នឹង​មិន​រង​ការ​ផាកពិន័យអ្វីនោះទេ ក្នុងការ​ផ្ដល់សេវាកម្ម​ TikTok ទៅឱ្យ​អ្នក​ប្រើប្រាស់​អាមេរិកជាង​ ១៧០ លាន​នាក់ និង​អនុញ្ញាតឱ្យអាជីវកម្ម​ខ្នាតតូចជាង​ ៧ លាន រីកចម្រើន»។

TikTok បន្តថា ខ្លួន​នឹង​ធ្វើការ​ជាមួយ​លោក​ ត្រាំ ដើម្បី​បង្កើត​ដំណោះស្រាយរយៈពេល​វែង​ ដែល​អាច​ឱ្យ​ TikTok ដំណើរការ​​នៅ​សហរដ្ឋ​អាមេរិក​។

លោក ត្រាំ ដែល​ព្យាយាម​បិទ​ដំណើរការ​ TikTok នៅអាមេរិក​កាល​ពី​អាណត្តិមុនក្រោម​ហេតុផលសន្តិសុខជាតិ បាន​បង្ហោះ​សារ​សន្យានៅ​លើ​បណ្ដាញ​សង្គម Truth Social របស់​លោក​ កាលពី​ថ្ងៃ​អាទិត្យ​ថា លោក​នឹង​ចេញ​អធិបញ្ជាដើម្បី​ពន្យាពេលការអនុវត្តច្បាប់​​ហាមឃាត់នៅ​ពេល​ឡើងកាន់អំណាច​នៅ​ថ្ងៃ​ចន្ទ​នេះ​ «​ដូច្នេះហើយ ​យើង​អាច​ធ្វើ​កិច្ច​ព្រមព្រៀង​ការពារ​សន្តិសុខ​ជាតិ​របស់​យើង»។

គួរ​គូស​បញ្ជាក់ថា​ ច្បាប់ហាមឃាត់​សហព័ន្ធ បាន​កំណត់​មិន​ឱ្យ​ក្រុមហ៊ុនផ្ដល់សេវាកម្ម ដូចជា​ Google ឬ Apple លក់​កម្មវិធី TikTok នៅ​លើ​កន្លែងលក់កម្មវិធីទូរស័ព្ទរបស់​ខ្លួន (ដូចជា Play Store ឬ App Store) ដោយ​លើកឡើង​ពី​កង្វល់សន្តិសុខជាតិ និង​បញ្ហា​ដែល​ថា​ រដ្ឋាភិបាល​កុម្មុយនិស្តចិន​អាច​ចូល​ប្រើ​ប្រាស់​ទិន្នន័យ​របស់​អ្នកប្រើ​ប្រាស់​អាមេរិក​។

ដើម្បីបង្វែរច្បាប់នេះ លុះត្រាតែក្រុមហ៊ុនចិន​ Bytedance ដែលជា​ក្រុមហ៊ុនមេរបស់​ TikTok លក់​ប្រតិបត្តិការ​ TikTok នៅ​អាមេរិ​ករបស់​ខ្លួន​ទៅឱ្យ​ក្រុមហ៊ុន ឬ​បុគ្គលអាមេរិក​។ នេះ​ជា​បញ្ហា​ធ្លាប់កើតមាន​ដូចគ្នា​ ក្រោម​ការទាមទារ​របស់​លោក ត្រាំ​ និងរដ្ឋបាល​របស់​លោក​កាលពី​អាណត្តិមុន​។

យ៉ាងណា​មិញ​ ច្បាប់ហាមឃាត់​មិន​បាន​កំណត់ឱ្យ​ក្រុមហ៊ុន TikTok បិទ​ដំណើរការ​របស់​ខ្លួន​សម្រាប់​អ្នកប្រើ​ប្រាស់ដែល​មាន​ស្រាប់​នោះ​ទេ​។ ប៉ុន្តែ​ TikTok បាន​សម្រេច​ចិត្ត​បិទវា​នៅពេល​ច្បាប់នេះ​ចូលជាធរមាន​​ ដោយ​សម្អាង​ថា​ វា​ងាយស្រួលក្នុងការចាប់ផ្តើមប្រតិបត្តិការឡើងវិញ នៅ​ពេល​មាន​ដំណោះស្រាយ។

ខណៈតុលាការកំពូលអាមេរិក​សម្រេចតម្កល់ច្បាប់ហាមឃាត់ដដែល​កាលពី​ថ្ងៃសុក្រ ​មកទល់ពេល​នេះ​គេ​មិនច្បាស់នៅឡើយ​ទេ ថាតើអាជ្ញាធរផ្នែកច្បាប់អ្វីដែលលោក ត្រាំ នឹងប្រើ​ដើម្បី​​ពន្យារពេលការអនុវត្តច្បាប់ដែលចូលជាធរមាន​កាល​ពី​ថ្ងៃ​អាទិត្យ​នោះ​។ ប៉ុន្តែ​គេ​រំពឹង​ថា រដ្ឋាភិបាល​របស់​លោក​ នឹង​មិន​អនុវត្ត​ការ​ហាមឃាត់​​​ទេ ប្រសិនបើ​លោក​ចេញ​អធិបញ្ជា។

​គួររំឭកថា​ លោក ត្រាំ​ បាន​បង្ហាញ​ពី​ការ​បន្ទន់ជំហរ​ចំពោះ​ការ​ហាមឃាត់​ TikTok ក្រោយជាប់ជា​ប្រធានាធិបតី​អាមេរិកជាថ្មី​​ ដោយ​លោក​លើកឡើងថា​ វា​ជា​ផ្នែក​មួយ​នៃ​ការជំរុញ​យុទ្ធនាការបោះឆ្នោតប្រធានាធិបតីកាល​ពី​ឆ្នាំមុន។ ការវិភាគ​ផ្សេង​ៗ​មើល​ឃើញ​ថា​ TikTok គឺជា​ឧបករណ៍ឃោសនានយោបាយ​ដ៏សំខាន់​នៅ​សហរដ្ឋ​អាមេរិក​ ដែល​ជួញអ្នកនយោបាយ​ភ្ជាប់ទំនាក់ទំនង​ជាមួយ​អ្នកគាំទ្រវ័យក្មេង ដែល​និយមប្រើ​វេទិកា​មួយ​នេះ៕