ព័ត៌មានអន្ដរជាតិ

ថៃរំពឹងកំណើនសេដ្ឋកិច្ចជាង ៣ ភាគរយ ដោយគោលនយោបាយជំរុញ និងការវិនិយោគបរទេស

បានផុស

១ year មុន

នៅ

ថ្ងៃចន្ទ ២៧ មករា ២០២៥

ដោយ

រដ្ឋមន្ត្រីក្រសួងហិរញ្ញវត្ថុថៃ បាននិយាយនោថ្ងៃចន្ទនេះថា សេដ្ឋកិច្ចរបស់ប្រទេសថៃរំពឹងថានឹងកើនឡើងជាង ៣ ភាគរយ នៅឆ្នាំ ២០២៥ ដែលជំរុញដោយវិធានការជំរុញសេដ្ឋកិច្ច និងការវិនិយោគពីបរទេស។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តី Pichai Chunhavajira បានប្រាប់អ្នកយកព័ត៌មានថា វិនិយោគិនបរទេសមានទំនុកចិត្តកាន់តែច្រើននៅក្នុងប្រទេសថៃ ហើយនឹងមានការវិនិយោគបរទេសធំៗបន្ថែមទៀតនៅឆ្នាំ ២០២៥ នេះ។

លោកបានបន្ថែមថា៖ «ខ្ញុំនៅតែគិតថា (កំណើន) គួរតែមានលើសពី ៣ ភាគរយ។ ប្រសិនបើប្រទេសថៃអាចបង្កើតទំនុកចិត្តក្នុងចំណោមអ្នកវិនិយោគបរទេស ពួកគេនឹងបន្តវិនិយោគនៅក្នុងប្រទេសរបស់យើងនៅឆ្នាំនេះ ដោយបង្កើតឱកាសការងារជាច្រើន»។

សុទិដ្ឋិនិយមរបស់លោក Pichai ខ្ពស់ជាងការព្យាករទុកដែលមានអត្រាទាបជាង ៣ ភាគរយរបស់បណ្ដាធនាគារផ្សេងៗក្នុងស្រុកថៃ។ ប៉ុន្តែវានៅតែបង្ហាញថា កំណើនសេដ្ឋកិច្ចថៃមានសន្ទុះខ្សោយទាបជាងប្រទេសក្នុងតំបន់ផ្សេងៗទៀត។

គួរគូសបញ្ជាក់ថា ប្រទេសថៃបានប្រឈមមុខនឹងសេដ្ឋកិច្ចដើរអូសជើង ដែលត្រដាបត្រដួសដោយបំណុលគ្រួសារ និងកម្សោយតម្រូវការ ដោយប្រទេសនេះត្រូវពឹងផ្អែកខ្លាំងលើការនាំចេញ និងវិស័យសេដ្ឋកិច្ចដើម្បីជំរុញកំណើន។

ក្នុងកិច្ចប្រឹងប្រែងដើម្បីជំរុញកំណើន រដ្ឋាភិបាលនាពេលកន្លងមក បានដាក់ចេញនូវគោលនយោបាយជំរុញផ្សេងៗ ដូចជាការចែកលុយដល់ពលរដ្ឋតាមរយៈគម្រោងកាបូបឌីជីថល ជាដើម។ ទន្ទឹមនឹងនេះ ថៃក៏បានចេញនូវគោលនយោបាយជំរុញវិស័យទេសចរណ៍ ដើម្បីជួញដល់សេដ្ឋកិច្ចផងដែរ។

ក្នុងឆ្នាំ ២០២៤ ធនាគារអភិវឌ្ឍន៍អាស៊ី (ADB) បានរំពឹងកំណើនសេដ្ឋកិច្ចថៃត្រឹម ២,៦ ភាគរយ ហើយអត្រានេះរំពឹងនឹងកើនត្រឹម ២,៧ ភាគរយ ត្រូវគ្នានឹងការព្យាកររបស់ធនាគារថៃ Krungthai Bank។ សមាគមធនាគាថៃ បានព្យាករថា នៅឆ្នាំ ២០២៥ ថៃនឹងមានកំណើនចន្លោះពី ២,៤-២,៩ ភាគរយ៕