រាជរដ្ឋាភិបាលកំណត់គោលដៅសម្រាប់ពាណិជ្ជកម្មកសិកម្មដើម្បីបង្កើនGDPឱ្យបាន៣០%ក្នុងឆ្នាំ២០២៥នេះ

លោកស្រី ហោ ម៉ាលីន រដ្ឋលេខាធិកាក្រសួង កសិកម្ម រុក្ខា ប្រម៉ាញ់ និងនេសាទបានឱ្យដឹងថារាជរដ្ឋាភិបាលកម្ពុជាបានកំណត់គោលដៅសម្រាប់ពាណិជ្ជកម្មកសិកម្ម ដើម្បីបង្កើនផលិតផលក្នុងស្រុកសរុប(GDP)ឱ្យបាន៣០%នៅក្នុងឆ្នាំ២០២៥នេះ ខណៈឆ្នាំ២០១៣ កំណើនផលិតផលជាតិសរុបដែលបានមកពីពាណិជ្ជកម្មកសិកម្មមានទំហំស្មើនឹង២៤%ប៉ុណ្ណោះ។

ថ្លែងក្នុងកិច្ចប្រជុំប្រចាំឆ្នាំរបស់សមាគមអ្នកចិញ្ចឹមសត្វកម្ពុជា និងសិក្ខាសាលាស្តីពីដំណោះស្រាយប្រកបដោយ និរន្តរភាពលើវិស័យចិញ្ចឹមសត្វនៅកម្ពុជានៅព្រឹកថ្ងៃទី២១កម្ភៈនេះ លោកស្រីរដ្ឋលេខាធិការបានបន្តថាដើម្បីសម្រេចបានតាមទិសដៅនេះក្រសួងកសិកម្មមានទំនាក់ទំនងយ៉ាងជិតស្និទ្ធជាមួយក្រសួងពាក់ព័ន្ធនិងស្ថាប័នសាធារណៈនានាសំដៅធ្វើយ៉ាងណាឱ្យវិស័យកសិកម្មមានការប្រទាក់ក្រឡាជាមួយវិស័យផ្សេងៗទៀតរួមមាន វិស័យឧស្សាហកម្ម ដឹកជញ្ជូន ការងារ និងពាណិជ្ជកម្ម។ចំណែកគោលនយោបាយជាតិអភិវឌ្ឍន៍វិស័យកសិកម្ម ក៏បានផ្តោតទៅលើការបង្កើនជំនាញ និងចំណេះដឹងពាក់ព័ន្ធ, ផលិតកម្ម, ពិពិធកម្ម, សមត្ថភាពលើការកែច្នៃ, ការស្តុកទុក, ការចែកចាយ និងការស្វែងរកទីផ្សារ ដែលទាំងនេះសុទ្ធតែបាននឹងកំពុងជួយគាំទ្រដល់សហគ្រិនក្នុងអនុវិស័យផលិតកម្មសត្វទាំងអស់។

លោកស្រីបានបន្ថែមថា៖«រាជរដ្ឋាភិបាលមានមហិច្ឆតាក្នុងការធ្វើទំនើបកម្មវិស័យកសិកម្មឱ្យកាន់តែមានភាពប្រកួតប្រជែង បរិយាបន្ន ធន់នឹងការនឹងប្រែប្រួលអាកាសធាតុ និងមាននិរន្តរភាព ដែលចាំបាច់ ត្រូវបង្កើនតម្លៃបន្ថែមសរុបនែវិស័យកសិកម្មឱ្យកើនយ៉ាងតិច៣ភាគរយក្នុងមួយឆ្នាំ ដែលអនុវិស័យចិញ្ចឹមសត្វនឹងត្រូវចូលរួមវិភាគទានដ៏សំខាន់ដើម្បីឱ្យសម្រេចបាននូវគោលដៅនេះ»។

លោកស្រីបានទទួលស្គាល់ថាស្ថិតក្នុងការវិវត្តន៍យ៉ាងលឿនក្នុងរយៈពេលប៉ុន្មានឆ្នាំចុងក្រោយនេះ អនុវិស័យផលិតកម្មសត្វ ពិតជាចូលរួមជួយជំរុញឱ្យក្រសួងកសិកម្ម រុក្ខាប្រមាញ់ និងនេសាទ ឈានហួសដល់គោលដៅនេះយ៉ាងពិតប្រាកដ ដែលក្នុងពេលបច្ចុប្បន្ននេះ មានផលិតផលកសិកម្មកម្ពុជាក្នុងបរិមាណគួរឱ្យកត់សម្គាល់ត្រូវបាននាំចេញទៅកាន់ប្រទេសជិតខាង ហើយមានការនាំចេញជ្រូករស់ពីកម្ពុជាទៅកាន់ទីផ្សារក្រៅប្រទេសផងដែរ ដែលនេះបានបង្ហាញពីវឌ្ឍនភាពមួយគួរជាទីមោទនភាព។

លោកស្រីបានអំពាវនាវដល់សមាជិកសមាជិកាសមាគម បន្តជួយគាំទ្រសកម្មភាពនានារបស់ថ្នាក់ដឹកនាំសមាគមជាបន្តទៀត ដើម្បីធ្វើឱ្យសមាគមអ្នកចិញ្ចឹមសត្វកម្ពុជា កាន់តែរឹងមាំ មានសាមគ្គីភាព និងភាតរៈភាព ដើម្បីចូលរួមកសាង និងពង្រឹងគ្រឹះសេដ្ឋកិច្ចជាតិ ស្របតាមគោលនយោបាយអភិវឌ្ឍន៍សេដ្ឋកិច្ចជាតិរបស់រាជរដ្ឋាភិបាល៕

អត្ថបទ៖សំអឿន