កសិដ្ឋានចិញ្ចឹមសត្វមួយកន្លែងបានប្រែក្លាយជា​កន្លែងកម្សាន្ត កំពុងទទួលបានការគាំទ្រខ្លាំង

សហគ្រិនខ្មែរម្នាក់បានប្រែក្លាយកសិដ្ឋានចិញ្ចឹមសត្វរបស់ខ្លួន ចេញជាកន្លែងកម្សាន្តបែបធម្មជាតិ កំពុងទទួលការគាំទ្រខ្លាំង ពីសំណាក់ភ្ញៀវទេសចរជាតិ និងអន្តរជាតិ។

លោក ប៊ុន ចាន់វីរៈ ជាម្ចាស់កសិដ្ឋានចិញ្ចឹមចៀមធម្មជាតិ ស្ថិតនៅស្រុកទឹកផុស ខេត្តកំពង់ឆ្នាំង បានប្រាប់ កម្ពុជាថ្មី ថា កសិដ្ឋានចិញ្ចឹមសត្វរបស់លោកនាពេលបច្ចុប្បន្នកំពុងទទួលបានការគាំទ្រយ៉ាងច្រើនកុះករ តាមរយៈការកែច្នៃកសិដ្ឋានចេញជាកន្លែងកម្សាន្តសម្រាប់មនុស្សទូទៅ ពិសេសគឺភ្ញៀវទេសចរ នាពេលចុងសប្ដាហ៍។

វីរៈ បានឱ្យដឹងទៀតថា ដំបូងឡើយកសិដ្ឋានរបស់លោកគ្រាន់តែជាកន្លែងចិញ្ចឹមសត្វតែប៉ុណ្ណោះ។ ប៉ុន្តែក្រោយមក លោកបាននឹកឃើញគំនិតមួយ ដែលនឹងប្រែក្លាយកសិដ្ឋានរបស់ខ្លួនឱ្យទៅជាកន្លែងទេសចរមួយសម្រាប់ភ្ញៀវទេសចរមកចូលលេងកម្សាន្ត ពិសេសទៀតនោះ វីរៈ ក៏អាចទាញចំណូលបន្ថែមតាមរយៈការលក់សំបុត្រក្នុងតម្លៃមនុស្សម្នាក់២ម៉ឺនរៀល។

សម្រាប់ពេលបច្ចុប្បន្ន កសិដ្ឋានរបស់វីរៈ កំពុងទទួលបានភ្ញៀវទេសចរយ៉ាងច្រើនកុះករ ដែលមកចូលរួមទស្សនាកម្សាន្តអំពីការចិញ្ចឹមសត្វចៀម ការចិញ្ចឹមជ្រូក និងការចិញ្ចឹមសត្វផ្សេងៗទៀត ដែលមាននៅក្នុងសិដ្ឋានរបស់លោក។

ចំពោះថ្ងៃចុងសប្ដាហ៍ និងថ្ងៃបុណ្យ កសិដ្ឋានរបស់វីរៈ ទទួលបានភ្ញៀវជាង៣០០នាក់ ដែលភាគច្រើនភ្ញៀវទាំងនោះអញ្ជើញមកជាលក្ខណៈគ្រួសារ និងខ្លះទៀតជាសិស្សានុសិស្សដែលអញ្ជើញមកពីបណ្ដាសាលារៀនផ្សេងៗផងដែរ។

អ្វីដែលភ្ញៀវទេសចរទាំងអស់នោះ ទទួលបានពីកសិដ្ឋានរបស់វីរៈ ពួកគាត់អាចទទួលបានភេសជ្ជៈ១កែវ និងការដើរកម្សាន្តមើលសត្វចិញ្ចឹម ការឡើងភ្នំលក្ខណៈជាក្រុម ការអង្គុយលេងមាត់ស្ទឹងគយគន់ណ៍មើលទេសភាពដ៏ស្រស់ស្អាត និងការភ្លក្សទឹកដោះពពែ ដែលមាននៅទីនោះស្រាប់តែម្ដង៕

អត្ថបទ ៖ សួស សិត