រោងចក្រដំឡើងរថយន្តអគ្គិសនី BYD តម្លៃជាង ៣០ លាន​ដុល្លារ បើកការដ្ឋានសាងសង់​នៅខេត្ត​ព្រះ​សីហនុ

រោងចក្រដំឡើងរថយន្តអគ្គិសនី BYD CAMBODIA CO., LTD. តម្លៃ ៣២ លានដុល្លារ បានបើក​ការដ្ឋាន​សាងសង់ នៅក្នុងតំបន់សេដ្ឋកិច្ចពិសេសក្រុងព្រះសីហនុ នៅថ្ងៃទី ២៨ ខែមេសា ឆ្នាំ ២០២៥ ក្រោមវត្តមាន លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សា​អភិ​វឌ្ឍន៍​កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោង BYD បង្កើតឱកាសការងារ ២០៥ កន្លែង ដែលនឹងដាក់ឱ្យដំណើរការជាផ្លូវ​ការនៅត្រី​មាស​ទី ៤ ឆ្នាំ ២០២៥។

លោកឧបនាយករដ្ឋមន្ត្រីបានលើកឡើងកាលពីថ្ងៃទី ១០ ខែមេសាថា បន្ទាប់ពីរោងចក្រដំឡើង​រថយន្ត​អគ្គិ​សនី​​សាងសង់រួចរាល់ ហើយដាក់ឱ្យប្រតិបត្តិការជាផ្លូវការ នៅអំឡុងត្រីមាសទី៤ ឆ្នាំ២០២៥​នេះ​ អត្រានៃការប្រើប្រាស់រថយន្ត BYD នៅកម្ពុជានឹងមានការកើនឡើងផងដែរ។

រោងចក្ររបស់ BYD មានសមត្ថភាពដំឡើង​រថយន្ដ​ចន្លោះពី ១ម៉ឺនគ្រឿងក្នុងមួយឆ្នាំ ខណៈក្រុមហ៊ុន​នឹង​ដំឡើងរថយន្ត ២ប្រភេទ គឺរថយន្ដ BYD EV ប្រើអគ្គិសនីសុទ្ធ និងរថយន្ដ BYD ដែល​អាច​ប្រើ​ប្រាស់ទាំងសាំង និងអគ្គិសនី។

រាជរដ្ឋាភិបាលបានកំណត់ការប្រើប្រាស់យានយន្តអគ្គិសនីឱ្យបានជិត៨សែនគ្រឿងត្រឹមឆ្នាំ២០៣០ ដើម្បីឱ្យដើរទន្ទឹមគ្នាទៅនឹងនិន្នាការតំបន់​ និងសកល ស្របពេលដែលវិស័យនេះមិនត្រឹមតែរួមចំណែកដល់ការការបរិស្ថានប៉ុណ្ណោះទេ ប៉ុន្តែ​ថែម​ទាំងជំរុញកំណើនសេដ្ឋកិច្ច និងពង្រឹងសន្តិសុខថាមពល ជាពិសេសដើរស្របតាមប្តេជ្ញាចិត្តរបស់រដ្ឋាភិបាលក្នុងការសម្រេចឱ្យបាននូវអព្យាក្រឹតកាបូននៅត្រឹមឆ្នាំ២០៥០៕

អត្ថបទ៖ ឡេង ដេត