ការលក់រថយន្ត Tesla ​នៅអឺរ៉ុបទាំងមូល ធ្លាក់ចុះគំហុកនៅខែមេសា

ការលក់រថយន្ត Tesla របស់លោក អេឡុន ម៉ាសក៍ នៅអឺរ៉ុបទាំងមូល បានធ្លាក់ចុះ​ជាគំហុកនៅខែមេសា ចំពេលក្រុមហ៊ុនផលិតរថយន្តអគ្គិសនីរបស់សហរដ្ឋអាមេរិកមួយ​នេះ បន្តប្រឈមមុខនឹងការខូចខាតកេរ្តិ៍ឈ្មោះក្នុងតំបន់ និងកំណើននៃការ​ប្រកួតប្រជែង​។ នេះបើតាមការចុះផ្សាយរបស់បណ្ដាញទូរទស្សន៍ CNBC។

យោងតាមសមាគមក្រុមហ៊ុនផលិតរថយន្តអឺរ៉ុប (ACEA) ក្រុមហ៊ុន Tesla បានលក់រថយន្តចំនួន ៧ ២៦១ គ្រឿង នៅអឺរ៉ុប ក្នុងខែមេសា ដោយធ្លាក់ចុះ ៤៩ ភាគរយ ធៀប​នឹង​រយៈពេលដូចគ្នាឆ្នាំមុន។ ​ការ​ធ្លាក់​ចុះ​​នេះ ​បាន​កើត​ឡើង​​ខណៈ​ការ​លក់​រថយន្ត​អគ្គិសនី​​សរុប​នៅអឺរ៉ុប បាន​កើន​ឡើង ៣៤,១ ភាគរយ ក្នុងខែមេសា ដូចគ្នា។

បញ្ហា​នេះ បណ្ដាលមកពីការខូចខាតកេរ្តិ៍ឈ្មោះនៃម៉ាកយីហោរបស់ Tesla ជុំវិញការពាក់ព័ន្ធនយោបាយអាមេរិក​ របស់លោក ម៉ាសក៍ ក៏ដូចជាការគាំទ្រពួកស្ដាំនិយមអឺរ៉ុប និងទំនោរគាំទ្រពួកណាហ្ស៊ីរបស់លោក។ ​មនោសញ្ចេតនាប្រឆាំងលោក ម៉ាសក៍ បណ្ដាលឱ្យអតិថិជនអឺរ៉ុប​ធ្វើពហិការប្រឆាំងរថយន្ត Tesla ខណៈក្រុមហ៊ុនរងការប្រកួតប្រជែងកាន់តែខ្លាំងឡើងៗ ជាពិសេសពីក្រុមហ៊ុនចិន។

ចន្លោះពីខែមករា ដល់ខែមេសា ការលក់រថយន្តរបស់​ Tesla បានធ្លាក់ចុះជិត ៤០ ភាគរយ។​ ខណៈក្រុមហ៊ុនចេញនូវរថយន្ត Model Y ប្រភេទ SUV ថ្មី ស៊េរីរថយន្តរបស់ក្រុមហ៊ុន Tesla កាន់តែចាស់ទៅៗ ដោយមិនទាន់មានម៉ូឌែលថ្មីជាមួយតម្លៃសមរម្យដូចគ្នានឹងគូប្រជែង។ ​

​ជាមួយគ្នានេះ ការប្រកួតប្រជែងកំពុងឡើងកំដៅ រួមទាំងពីក្រុមហ៊ុនផលិតរថយន្តជាប្រពៃណីនៅអឺរ៉ុប និងក្រុមហ៊ុនចិន។ កាល​ពី​សប្តាហ៍​មុន ទិន្នន័យ​បាន​បង្ហាញ​ថា ក្រុមហ៊ុនផលិតរថយន្តអគ្គិសនីចិន BYD ​បាន​លក់​រថយន្ត​អគ្គិសនី​​លើស Tesla នៅ​អឺរ៉ុប​ជា​លើក​ដំបូង។

ក្រៅពីនេះ គេក៏មើលឃើញផងដែរថា អតិថិជនអឺរ៉ុប​មាន​ក៏ទំនោរ​ទិញរថយន្តកូនកាត់ ដែលប្រើទាំងថ្ម និងប្រេងឥន្ធនៈ។ ​យ៉ាងណាមិញ ​Tesla លក់តែរថយន្តអគ្គិសនីពេញ​ទីប៉ុណ្ណោះ ​ព្រោះមិនទាន់មាន​រថយន្តកូនកាន់នោះទេ៕