សហគ្រាសដែលដឹកទំនិញតាមផ្លូវទឹកជាអន្តរជាតិ ត្រូវជាប់កាតព្វកិច្ចបង់ប្រាក់រំដោះពន្ធលើ​ប្រាក់ចំណូលអត្រា ១% នៃផលរបរប្រចាំខែ

អនុលោមតាមមាត្រា២៨ នៃច្បាប់ស្តីពីសារពើពន្ធ បាន​គូសបញ្ជាក់ឱ្យដឹងថា សហគ្រាសដែលធ្វើសកម្មភាពដឹកជញ្ជូនទំនិញតាមផ្លូវទឹកជាអន្តរជាតិ ត្រូវជាប់កាតព្វកិច្ចបង់ប្រាក់រំដោះពន្ធលើប្រាក់ចំណូលតាមអត្រា ១% នៃ​ផលរបរប្រចាំខែ រួមបញ្ចូលទាំងពន្ធអាករនានា លើក​លែងតែ​អាករលើ​តម្លៃ​បន្ថែម។

តាម​សេចក្តី​ប្រកាស​ចេញដោយ​ក្រសួង​សេដ្ឋកិច្ច និង​ហិរញ្ញវត្ថុ ស្តី​ពី​«កាតព្វកិច្ច​ចំពោះ​សកម្មភាព​ភាព​អាជីវកម្ម​ដឹក​ជញ្ជូន​តាម​ផ្លូវ​ទឹកជា​អន្តរ​ជាតិ» បាន​ឱ្យដឹងថា សហគ្រាសដឹកជញ្ជូនទំនិញ តាមផ្លូវទឹកជាអន្តរជាតិ​ជាអ្នកជាប់ពន្ធ​អនិវាសនជន ដែល​បានបង់ពន្ធលើប្រាក់ចំណូលដូចមានចែងក្នុងប្រការ«ថ» នៃប្រកាសនេះ មិនតម្រូវ​ឱ្យ​បង់ប្រាក់​រំដោះ​ពន្ធលើប្រាក់ចំណូលប្រចាំខែ ពន្ធអប្បបរមា និងមិនត្រូវឱ្យអនុវត្តពន្ធកាត់ទុក​ចំពោះ​ប្រាក់ចំណូល​​ប្រភព​​កម្ពុជា​ទៀតឡើយ គឺ​លើក​លែងតែពន្ធកាត់ទុកលើថ្លៃឈ្នួលចលនទ្រព្យ និងអចលនទ្រព្យ និងពន្ធលើប្រាក់បៀវត្សរបស់បុគ្គលនិវាសនជន។

មួយវិញទៀត តាមមាត្រា២០ នៃច្បាប់ស្តីពីសារពើពន្ធ​ដដែល បានចែង​ថា​សហគ្រាស​ដែល​ធ្វើសកម្មភាពដឹកជញ្ជូនទំនិញតាម ផ្លូវទឹកជាអន្តរជាតិ ត្រូវបង់ពន្ធលើ​ប្រាក់​ចំណូល​តាមអត្រា ២០% ចំពោះប្រាក់ចំណូលជាប់ពន្ធដែលសម្រេចបានដោយសហគ្រាសដឹកជញ្ជូន ទំនិញតាមផ្លូវទឹកជាអន្តរជាតិ និងភ្នាក់ងារដឹក​ជញ្ជូនទំនិញតាមផ្លូវទឹកជាអន្តរជាតិ ដែលជាអ្នកជាប់ពន្ធនិវាសនជន ស្ថិតក្នុងរបបស្វ័យប្រកាស។

បន្ថែមពីនេះក៏ត្រូវបង់អត្រា ២០% ចំពោះ​ប្រាក់​ចំណូល​ប្រភព​កម្ពុជា ដែល​សម្រេច​បាន​ដោយ​សហគ្រាស​ដឹកជញ្ជូន​ទំនិញ​តាម​ផ្លូវទឹក​ជា​អន្តរជាតិ​ដែល​ជាអ្នកជាប់ពន្ធអនិវាសនជន។ មូលដ្ឋានគិតពន្ធចំពោះប្រាក់ចំណូល ប្រភពកម្ពុជា ត្រូវ​អនុវត្តស្របតាមវាក្យខណ្ឌ ខ នៃក នៃកថាខណ្ឌទី២ នៃប្រការ៤ នៃប្រកាសនេះ។

ក្នុង​សេចក្តី​ប្រកាស​ដដែល ក៏​បាន​ឱ្យដឹង​បន្ថែម​ថា សហគ្រាស​ដែលជា​គ្រឹះស្ថាន​អចិន្ត្រៃយ៍​របស់​បុគ្គល​អនិវាសនជន​ដែល​ធ្វើ​សកម្មភាព​ដឹកជញ្ជូន​ទំនិញ តាម​ផ្លូវទឹកជាអន្តរជាតិ ត្រូវមានកាតព្វកិច្ច​កាត់ទុក​ពន្ធលើ​ប្រាក់​ចំណូល​របស់​បុគ្គលអនិវាសនជន​នោះ ស្របតាម កថាខណ្ឌទី២ នៃប្រការថ នៃប្រកាសនេះ បង់ជូន​រដ្ឋបាលសារពើពន្ធ​យ៉ាងយឺតបំផុតត្រឹមថ្ងៃទី២០ នៃខែបន្ទាប់ពី ខែ​ដែល​ការទូទាត់ថ្លៃដឹកជញ្ជូនបានកើតឡើង។

សម្រាប់ការទូទាត់ សំដៅដល់ប្រតិបត្តិការណាមួយមុនគេក្នុងចំណោមពេលចេញវិក្កយបត្រ ឬពេលបំពេញសេវា ឬពេលទូទាត់ប្រាក់។ ពន្ធលើ ប្រាក់ចំណូល​ដែលបានកាត់​ទុកតាម​ប្រការនេះ គឺជាការទទួលខុសត្រូវរបស់គ្រឹះស្ថានអចិន្ត្រៃយ៍ និងជាពន្ធចុង ក្រោយរបស់បុគ្គល​អនិវាសនជន​ដែលធ្វើ​សកម្មភាព​ដឹកជញ្ជូន​ទំនិញ​តាមផ្លូវទឹកជាអន្តរជាតិ។

ក្នុង​នោះ​សហគ្រាសដឹកជញ្ជូនទំនិញតាមផ្លូវទឹកជាអន្តរជាតិ ដែលជាសហគ្រាសរបស់ភាគីនៃកិច្ចព្រមព្រៀងស្តីពី ការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធជាមួយកម្ពុជា ត្រូវអនុវត្តតាមបទប្បញ្ញត្តិទាក់ទិននឹងការដឹកជញ្ជូនទំនិញតាមផ្លូវទឹកជាអន្តរជាតិ និងវិធាន និងនីតិវិធីពាក់ព័ន្ធនឹងការអនុវត្តកិច្ចព្រមព្រៀងស្តីពីការលុបបំបាត់ការយកពន្ធត្រួតគ្នា ពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធនិងការចៀសវាងពន្ធ៕