ឥណ្ឌូណេស៊ី កាណាដា គ្រោងចុះកិច្ចព្រមព្រៀងពាណិជ្ជកម្មឆ្នាំនេះ

មន្រ្តីជាន់ខ្ពស់ឥណ្ឌូណេស៊ីម្នាក់ ​បាន​ឱ្យដឹងកាលពីពេល​ថ្មីៗនេះ​ ប្រទេសឥណ្ឌូណេស៊ី និងកាណាដា គ្រោង​នឹង​ចុះកិច្ចព្រមព្រៀងពាណិជ្ជកម្ម​មួយ​ឆ្នាំនេះ ប៉ុន្តែរដ្ឋាភិបាល​ទាំង២​ មិន​ទាន់បាន​កំណត់កាលបរិច្ឆេទជាក់​លាក់នោះទេ។ នេះបើតាមការចុះផ្សាយរបស់កាសែត Jakarta Globe ។

គម្រោងចុះហត្ថលេខានេះ រាយការណ៍ឡើងក្រោយ​ប្រទេសទាំង២ ​បាន​បិទ​បញ្ចប់ការចរចា​សំខាន់ផ្សេងៗ​សម្រាប់កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយទ្វេភាគី (CEPA) កាលពីខែធ្នូ ឆ្នាំមុន។ ក្រោមកិច្ចព្រមព្រៀងនេះ កាណាដាយល់ព្រមទម្លាក់ពន្ធសំខាន់ៗលើទំនិញឥណ្ឌូណេស៊ី ហើយ​ឥណ្ឌូណេស៊ី​ក៏នឹង​ធ្វើដូចគ្នា​ចំពោះទំនិញ​កាណាដា។​

មន្ត្រីជាន់ខ្ពស់នៅក្រសួងពាណិជ្ជកម្មឥណ្ឌូណេស៊ី លោក Djatmiko Bris Witjaksono ​បាននិយាយថា៖ «យើងនឹងចូលទៅក្នុងទីផ្សារអាមេរិកខាងជើងឆាប់ៗនេះ តាមរយៈ CEPA នាពេលខាងមុខ»។ លោក​បន្ថែមថា៖ «យើងនៅតែរង់ចាំពេលវេលាត្រឹមត្រូវដើម្បីចុះហត្ថលេខា​ប៉ុណ្ណេះ ​ហើយ​មេដឹកនាំប្រទេសទាំង​២​ នឹង​ធ្វើជាសាក្សីលើកិច្ចព្រមព្រៀង​នេះ»។​

គេមើលឃើញថា កិច្ចព្រមព្រៀងនេះ​គឺជាផ្នែកមួយ​ការធ្វើពិពិធកម្មទីផ្សាររបស់ឥណ្ឌូណេស៊ី ជាពិសេសក្រោយ​ពេល​ដែលសហរដ្ឋអាមេរិក​ដំឡើងពន្ធនាំចូលពីប្រទេសជុំវិញពិភព​លោក​ រួមទាំងឥណ្ឌូណេស៊ី និងកាណាដា។

គួរគូសបញ្ជាក់ថា ពាណិជ្ជកម្មឥណ្ឌូណេស៊ី-កាណាដា បានឈានដល់ជិត ៣,៦ ​ប៊ីលានដុល្លារក្នុងឆ្នាំ ២០២៤ ដោយឥណ្ឌូណេស៊ី​មាន​ឱនភាពពាណិជ្ជកម្មជាមួយ​កាណាដា ប្រមាណ​ ៦៩៣,២ លានដុល្លារ។ ចាប់ពីខែមករាដល់ខែមិថុនាឆ្នាំ ២០២៥ ពាណិជ្ជកម្មរវាងប្រទេសទាំង២ បានកើនឡើង ២៧ ភាគរយ​ ឈានដល់ជិត ២,៣ ប៊ីលាន​ដុល្លារ​៕