ចិនងាកទៅអាហ្វ្រិកសម្រាប់ទីផ្សារនាំចេញ ចំពេល ត្រាំ បង្កើន​គោលនយោបាយការពារនិយម

ទ្វីបអាហ្វ្រិកកំពុង​ក្លាយជាទីផ្សារនាំចេញដ៏សំខាន់មួយថ្មីសម្រាប់ប្រទេសចិន ​ក្រោយ​សហរដ្ឋអាមេរិក​បង្កើនគោលនយោបាយការពារនិយមរបស់ខ្លួន ក្រោមរូបភាព​ពន្ធគយរបស់លោក​ប្រធានាធិបតី​​ដូណាល់ ត្រាំ។

សារព័ត៌មាន​ Bloomberg បាន​ចុះផ្សាយដោយស្រង់ទិន្នន័យពីគយចិន ដែលបង្ហាញថា ការនាំចេញរបស់ចិនទៅអាហ្រ្វិកបាន​កើនឡើង ២៥ ភាគរយ ដល់ ១២២ ប៊ីលាន​ដុល្លារ ក្នុងរយៈពេល ៧ ខែដំបូងដើមឆ្នាំ ២០២៥ ដោយវ៉ាដាច់ការនាំចេញរបស់ចិន​ទៅ​ទីផ្សារណាៗទាំងអស់ រួមទាំងនៅអាស៊ី សហរដ្ឋអាមេរិក សហភាពអឺរ៉ុប និងអាមេរិកឡាទីន។

ការនាំចេញរបស់ចិន​ទៅអាហ្វ្រិកត្រឹមរយៈពេល​ ៧ ខែដើមឆ្នាំ មាន​ទំហំធំជាងបរិមាណក្នុងឆ្នាំ ២០២០ ទៅទៀត ហើយរំពឹងថានឹង​កើនលើស ២០០ ប៊ីលាន​ដុល្លារ ជាដំបូងក្នុងប្រវត្តិសាស្រ្ត។

ក្នុងនោះផងដែរ ​ចិននៅតែបន្តនាំចេញទៅកាន់ទ្វីបអាហ្រ្វិកច្រើនជាងការនាំចូល ប៉ុន្តែ​បច្ចុប្បន្ន កំពុងចាប់ផ្តើមបើកទីផ្សាររបស់ខ្លួនឱ្យបណ្ដាប្រទេសនៅអាហ្វ្រិក​ ហើយកំពុងឆ្លៀតឱកាស​ជួយកសាងហេដ្ឋារចនាសម្ព័ន្ធនៅទូទាំងទ្វីប ដើម្បីពង្រឹងអំណាច និងខ្សែច្រវ៉ាក់ផ្គត់ផ្គង់សេដ្ឋកិច្ចរបស់ខ្លួន។

អនុប្រធានផ្នែកស្រាវជ្រាវប្រចាំចិននៅក្រុមហ៊ុន Gavekal Dragonomics លោក Christopher Beddor បានឱ្យដឹងថា ក្រុមហ៊ុននាំចេញរបស់ចិនបានពង្រីកខ្លួន​ដោយជោគជ័យទៅកាន់ទីផ្សារ​កំពុងរីកចម្រើន ដូចជាទ្វីបអាហ្រ្វិក ក្នុងប៉ុន្មានឆ្នាំថ្មីៗនេះ ​ខណៈកម្សោយប្រាក់យន់ឆ្នាំនេះ នឹងជួយជំរុញឱ្យទំនិញចិនកាន់តែមានការប្រកួតប្រជែង​សម្រាប់ការនាំចេញ។

លើសពីនេះ សង្រ្គាមពាណិជ្ជកម្មរវាងសហរដ្ឋអាមេរិក និងចិន បានបង្កើនល្បឿន​នៃការអភិវឌ្ឍគំនិតផ្តួចផ្តើមខ្សែក្រវាត់ និងផ្លូវ​របស់ប្រធានាធិបតីចិន លោក ស៊ី ជីនពីង។ កន្លងមក​ ក្រុមហ៊ុនចិនបានទទួល​បាន​​កិច្ចសន្យាសាងសង់ហេដ្ឋារចនាសម្ព័ន្ធសំខាន់ៗនៅទូទាំងទ្វីបអាហ្រ្វិក ដូចជាការសាងសង់ផ្លូវរថភ្លើង សួនឧស្សាហកម្ម និងច្រើនទៀត ដែល​ជំរុញឱ្យមានតម្រូវការគ្រឿងចក្រ និងសម្ភារៈ​នាំយកពីចិននៅឆ្នាំ ២០២៥ នេះ​។

បើតាម Bloomberg នីហ្សេរីយ៉ា អាហ្រ្វិកខាងត្បូង និងអេហ្ស៊ីប គឺជា​ប្រទេសទិញទំនិញចិន​នៅអាហ្រ្វិកកំពូលៗ។ ​

​យ៉ាងណាមិញ គួរកត់សម្គាល់ថា អាហ្រ្វិក​រួមចំណែកត្រឹមតែ ៦ ភាគរយ ប៉ុណ្ណោះ នៃ​ការនាំចេញសរុបរបស់ប្រទេសចិន ពោលគឺត្រឹមពាក់កណ្តាលនៃ​ការនាំចេញទៅ​សហរដ្ឋអាមេរិក។

​ការណ៍គួរឱ្យកត់សម្គាល់នោះគឺថា ទំនិញជាច្រើនដែលត្រូវនាំចេញទៅអាមេរិក ឥឡូវនេះចិន​បង្វែរក្បាលលំហូរទៅកាន់ទ្វីបអាហ្រ្វិកសិន មុនឆ្លងទៅកាន់អាមេរិក ដោយ​នេះគឺហៅថាជា «ការឆ្លងកាត់» ដើម្បីគេចពន្ធខ្ពស់ ព្រោះបណ្ដាប្រទេសប្រទេសហ្វ្រិករងពន្ធរបស់ ត្រាំ ទាបជាង៕ ​​